ਨਵੀਂ ਪੁਸਤਕ ਵਿਚ ਗੁਰਇਤਿਹਾਸ ਦਾ ਜ਼ਿਕਰ ਤਕ ਨਹੀਂ ਕੀਤਾ ਗਿਆ

ਕੋਟਕਪੂਰਾ : ਸਿੱਖ ਇਤਿਹਾਸ ਨਵਾਂ ਲਿਖਣ ਜਾਂ ਬਦਲਣ ਸਬੰਧੀ ਚਲੀਆਂ ਚਰਚਾਵਾਂ ਦਾ ਵਿਰੋਧ ਕਰਨ ਵਾਲੀਆਂ ਚਿੰਤਕ ਧਿਰਾਂ ਤਾਂ ਅਵੇਸਲੀਆਂ ਹੋ ਗਈਆਂ ਪਰ ਉਨ੍ਹਾਂ ਨੂੰ ਸ਼ਾਇਦ ਨਹੀਂ ਪਤਾ ਕਿ 12ਵੀਂ ਜਮਾਤ 'ਚ ਪਿਛਲੇ ਕਈ ਸਾਲਾਂ ਤੋਂ ਪੰਜਾਬੀ ਅਤੇ ਅੰਗਰੇਜ਼ੀ ਭਾਸ਼ਾ 'ਚ ਪੜ੍ਹਾਈ ਜਾਣ ਵਾਲੀ ਪੁਸਤਕ 'ਚ ਜੋ ਪੰਜਾਬ ਦਾ ਇਤਿਹਾਸ ਦਰਸਾਇਆ ਜਾ ਰਿਹਾ ਸੀ, ਇਸ ਵਾਰ ਚੁੱਪ-ਚਪੀਤੇ ਉਸ ਨੂੰ ਬਦਲ ਦਿਤਾ ਗਿਆ ਹੈ। ਪਹਿਲਾਂ ਪੜ੍ਹਾਈਆਂ ਜਾਣ ਵਾਲੀਆਂ ਪੁਸਤਕਾਂ 'ਚ ਵਿਦਿਆਰਥੀ ਗੁਰੂ ਸਾਹਿਬਾਨਾਂ ਦਾ ਜੀਵਨ, ਉਨ੍ਹਾਂ ਦੀਆਂ ਸਿਖਿਆਵਾਂ, ਸ਼ਹੀਦੀ ਸਮੇਤ ਸਿੱਖ ਇਤਿਹਾਸ, ਬੰਦਾ ਸਿੰਘ ਬਹਾਦਰ, ਦਲ ਖ਼ਾਲਸਾ, ਸਿੱਖ ਮਿਸਲਾਂ, ਮਹਾਰਾਜਾ ਰਣਜੀਤ ਸਿੰਘ ਦਾ ਜੀਵਨ ਅਤੇ ਜਿੱਤਾਂ, ਮਹਾਰਾਜਾ ਦਾ ਸ਼ਾਸਨ ਪ੍ਰਬੰਧ, ਮਹਾਰਾਜਾ ਦਾ ਆਚਰਨ ਅਤੇ ਸ਼ਖ਼ਸੀਅਤ, ਐਂਗਲੋ ਸਿੱਖ ਸਬੰਧ, ਪਹਿਲਾ ਐਂਗਲੋ ਸਿੱਖ ਯੁੱਧ, ਦੂਜਾ ਐਂਗਲੋ ਸਿੱਖ ਯੁੱਧ ਅਤੇ ਪੰਜਾਬ ਦਾ ਮਿਲਾਉਣਾ ਆਦਿ ਸਮੇਤ ਇਤਿਹਾਸ ਦੇ ਹੋਰ ਬਹੁਤ ਕਿੱਸੇ ਮੌਜੂਦ ਹੁੰਦੇ ਸਨ

12th Class Book

ਪਰ ਇਸ ਵਾਰ ਪੰਜਾਬ ਦੇ ਇਤਿਹਾਸ ਵਾਲੀ ਇਸ ਪੁਸਤਕ 'ਚ ਬੰਦਾ ਸਿੰਘ ਬਹਾਦਰ, ਸਿੱਖ ਕੌਮ ਦਾ ਸੰਘਰਸ਼, ਦਲ ਖ਼ਾਲਸਾ, ਮਿਸਲਾਂ, ਮਹਾਰਾਜਾ ਰਣਜੀਤ ਸਿੰਘ ਆਦਿਕ ਤੋਂ ਬਿਨਾਂ ਸਿੱਖ ਇਤਿਹਾਸ ਬਾਰੇ ਹੋਰ ਕੁੱਝ ਵੀ ਨਹੀਂ ਦਰਸਾਇਆ ਗਿਆ। ਇਕ ਸਕੂਲ ਅਧਿਆਪਕ ਨੇ ਅਪਣਾ ਨਾਂ ਨਾ ਛਾਪਣ ਦੀ ਸ਼ਰਤ 'ਤੇ ਦਸਿਆ ਕਿ ਪਹਿਲਾਂ ਪੰਜਾਬ ਸਕੂਲ ਸਿਖਿਆ ਬੋਰਡ ਵਲੋਂ ਸਿਲੇਬਸ ਜਾਰੀ ਕੀਤਾ ਜਾਂਦਾ ਸੀ ਅਤੇ ਪ੍ਰਾਈਵੇਟ ਪ੍ਰਕਾਸ਼ਨਾ ਵਲੋਂ ਗਾਈਡ ਟਾਈਪ ਕਿਤਾਬਾਂ ਛਾਪ ਕੇ ਸਰਕਾਰੀ/ਗ਼ੈਰ ਸਰਕਾਰੀ ਸਕੂਲਾਂ 'ਚ ਪੜ੍ਹਾਈਆਂ ਜਾਂਦੀਆਂ ਸਨ ਪਰ ਇਸ ਵਾਰ ਪੰਜਾਬ ਸਕੂਲ ਸਿਖਿਆ ਬੋਰਡ ਨੇ ਖ਼ੁਦ ਅਪਣੇ ਤੌਰ 'ਤੇ ਜੋ ਇਤਿਹਾਸ ਦੀ ਕਿਤਾਬ ਛਾਪੀ ਹੈ, ਉਸ ਵਿਚ ਗੁਰਇਤਿਹਾਸ ਦਾ ਜ਼ਿਕਰ ਤਕ ਨਹੀਂ ਅਤੇ ਉਪਰੋਕਤ ਦਰਸਾਏ ਅਨੁਸਾਰ ਮਿਸਲਕਾਲ, ਦਲ ਖ਼ਾਲਸਾ ਆਦਿਕ ਦਾ ਬਹੁਤ ਹੀ ਸੰਖੇਪ 'ਚ ਜ਼ਿਕਰ ਹੈ।