ਅਸੀ ਸਪੋਕਸਮੈਨ ਨਾਲ ਖੜੇ ਹਾਂ ਕਿਉਂਕਿ ਉਹ ਸੱਚ ਲਿਖਦਾ ਹੈ : ਮੰਡ
ਫ਼ਿਰੋਜ਼ਪੁਰ : ਨਾ ਬਾਦਲ ਨਾ ਕੋਈ ਹੋਰ ਰਾਜ ਨੇਤਾ ਰੋਜ਼ਾਨਾ ਸਪੋਕਸਮੈਨ ਅਖ਼ਬਾਰ ਦੀ ਆਵਾਜ਼ ਨੂੰ ਦਬਾ ਸਕਦੇ ਨਾ ਪੱਤਰਕਾਰਾਂ ਦੀ। ਅਸੀਂ ਸਪੋਕਸਮੈਨ ਅਖ਼ਬਾਰ ਅਤੇ ਉਸ ਦੇ ਮਾਲਕਾਂ ਨਾਲ ਖੜੇ ਹਾਂ ਕਿਉਂਕਿ ਉਹ ਸੱਚ ਹੀ ਛਾਪਦੇ ਤੇ ਲਿਖਦੇ ਹਨ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਅੱਜ ਸਪੋਕਸਮੈਨ ਦੇ ਪੱਤਰਕਾਰ ਨਾਲ ਸਾਂਝਾ ਕਰਦਿਆਂ ਭਾਈ ਧਿਆਨ ਸਿੰਘ ਮੰਡ ਹੋਰਾਂ ਨੇ ਕਿਹਾ ਕਿ ਪੰਜਾਬ ਵਿਚ ਸਾਡਾ ਬਰਗਾੜੀ ਮੋਰਚਾ ਲੋਕ ਲਹਿਰ ਪੈਦਾ ਕਰ ਰਿਹਾ ਹੈ ਤੇ ਦਿਨ ਬ ਦਿਨ ਲੋਕ ਭਾਰੀ ਤਦਾਦ ਵਿਚ ਸਾਡੇ ਨਾਲ ਜੁੜ ਰਹੇ ਹਨ।
ਇਹੋ ਲੋਕ ਲਹਿਰ ਪੰਜਾਬ ਵਿਚ ਲੋਕ ਰਾਜ ਦੀ ਸਥਾਪਨਾ ਕਰੇਗੀ।ਉਨ੍ਹਾਂ ਕਿਹਾ ਕਿ ਅਸੀਂ ਸੱਚ ਲਿਖ ਰਹੇ ਹਰ ਇਕ ਪੱਤਰਕਾਰ ਦੇ ਮੋਢੇ ਦੇ ਨਾਲ ਮੋਢਾ ਜੋੜ ਕੇ ਖੜੇ ਹਾਂ ਤੇ ਖੜੇ ਰਹਾਂਗੇ, ਜੇ ਮੀਡੀਆ ਨੂੰ ਹੀ ਸੱਚ ਲਿਖਣ ਦੀ ਆਜ਼ਾਦੀ ਨਹੀਂ ਹੋਵੇਗੀ ਤਾਂ ਦੇਸ਼ ਦਾ ਚੌਥਾ ਪਾਵਾ ਹੀ ਢਹਿ ਢੇਰੀ ਹੋ ਜਾਵੇਗਾ ਤੇ ਫਿਰ ਲੋਕਤੰਤਰ ਕਿਥੇ ਬਚੇਗਾ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਿਚ ਨਾ ਕਾਂਗਰਸ ਦੀਆਂ ਸਰਕਾਰਾਂ ਨੇ ਲੋਕ ਰਾਜ ਸਥਾਪਤ ਕੀਤਾ
ਤੇ ਨਾ ਬਾਦਲਾਂ ਨੇ, ਪੰਜਾਬ ਅੰਦਰ ਅੱਜ ਜੰਗਲ ਵਰਗਾ ਰਾਜ ਹੈ, ਕਾਨੂੰਨ ਵਿਵਸਥਾ ਦੀ ਸਥਿਤੀ ਪੰਜਾਬ ਅੰਦਰ ਡਾਵਾਂਡੋਲ ਹੈ। ਮੰਡ ਨੇ ਕਿਹਾ ਕਿ ਅਸੀਂ ਗੁਰੂ ਗ੍ਰੰਥ ਸਾਹਿਬ ਦੀਆਂ ਬੇਅਦਬੀਆਂ ਅਤੇ ਬਰਗਾੜੀ ਦੇ ਮਾਮਲੇ ਨੂੰ ਲੈ ਕੇ ਇਨਸਾਫ਼ ਲੈਣ ਵਾਸਤੇ ਮੋਰਚਾ ਡੱਟ ਕੇ ਲਾਇਆ ਹੋਇਆ ਹੈ ਤੇ ਇਨਸਾਫ਼ ਲੈਣ ਤੋਂ ਬਾਅਦ ਹੀ ਇਸ ਮੋਰਚੇ ਨੂੰ ਹਟਾਇਆ ਜਾਵੇਗਾ।
