ਮਸ਼ਹੂਰ ਟੈਕਨਾਲੋਜੀ ਕੰਪਨੀ ਐਪਲ ਨੇ iPhone SE ਨੂੰ ਛੱਡ ਕੇ ਆਪਣੇ ਸਾਰੇ ਆਈਫੋਨਜ਼ ਮਾਡਲ ਦੀਆਂ ਕੀਮਤਾਂ 'ਚ ਇਜ਼ਾਫਾ ਕੀਤਾ ਹੈ। ਭਾਰਤ ਸਰਕਾਰ ਨੇ ਹਾਲ ਹੀ 'ਚ ਮੋਬਾਇਲ ਹੈਂਡਸੈੱਟ 'ਤੇ ਸੀਮਾ ਸ਼ੁਲਕ 10 ਫੀਸਦੀ ਤੋਂ ਵਧਾ ਕੇ 15 ਫੀਸਦੀ ਕਰ ਦਿੱਤਾ ਹੈ।
ਜਿਸ ਤੋਂ ਬਾਅਦ ਐਪਲ ਨੇ ਆਪਣੇ ਆਈਫੋਨ ਦੀਆਂ ਕੀਮਤਾਂ 'ਚ 3.5 ਫੀਸਦੀ ਦਾ ਇਜ਼ਾਫਾ ਕੀਤਾ। ਨਵੀਆਂ ਕੀਮਤਾਂ ਸਵੇਰ ਤੋਂ ਹੀ ਲਾਗੂ ਹੋ ਗਈਆਂ ਹਨ। ਆਈਫੋਨ ਐੱਸ. ਈ. ਦੀਆਂ ਕੀਮਤਾਂ ਇਸ ਲਈ ਨਹੀਂ ਵਧੀਆਂ, ਕਿਉਂਕਿ ਭਾਰਤ 'ਚ ਹੀ ਅਸੈਂਬਲ ਕੀਤਾ ਜਾਂਦਾ ਹੈ।
ਸਰਕਾਰ ਦੇ ਫੈਸਲੇ ਦਾ ਸਭ ਤੋਂ ਜ਼ਿਆਦਾ ਅਸਰ ਐਪਲ ਨੂੰ ਹੀ ਹੋਇਆ ਹੈ ਕਿਉਂਕਿ ਇਸ ਦੇ ਭਾਰਤ 'ਚ ਵੇਚੇ ਜਾਣ ਵਾਲੇ 88 ਫੀਸਦੀ ਹੈਂਡਸੈੱਟ ਆਯਾਤ ਕੀਤੇ ਜਾਂਦੇ ਹਨ। ਕੰਪਨੀ ਸਿਰਫ ਆਈਫੋਨ ਐੱਸ. ਈ. ਮਾਡਲ ਨੂੰ ਬੈਂਗਲੂਰੂ 'ਚ ਅਸੈਂਬਲ ਕਰਦੀ ਹੈ।
ਇਹ ਹੋਣਗੀਆਂ ਨਵੀਆਂ ਕੀਮਤਾਂ -
ਉਦਾਹਰਣ ਦੇ ਤੌਰ 'ਤੇ 256 ਜੀ. ਬੀ. ਵਾਲਾ iPhone X ਹੁਣ 3000-3500 ਰੁਪਏ ਮਹਿੰਗਾ ਮਿਲੇਗਾ। ਹੁਣ ਇਸ ਦੀ ਕੀਮਤ 1.05 ਲੱਖ ਰੁਪਏ ਹੋਵੇਗੀ। ਆਈਫੋਨ 6 ਅਤੇ ਆਈਫੋਨ 6 ਐੱਸ ਦੀਆਂ ਕੀਮਤਾਂ 1500 ਰੁਪਏ ਵਧੀਆਂ ਹਨ।
ਇਸ ਤਰ੍ਹਾਂ ਆਈਫੋਨ 6 ਹੁਣ 30,780 ਰੁਪਏ ਅਤੇ ਆਈਫੋਨ 6 ਐੱਸ ਹੁਣ 41,550 ਰੁਪਏ 'ਚ ਮਿਲੇਗਾ। ਐਪਲ ਨੇ ਆਪ ਨਵੀਆਂ ਕੀਮਤਾਂ ਦੀ ਪੁਸ਼ਟੀ ਕੀਤੀ ਅਤੇ ਇੰਨ੍ਹਾਂ ਨੂੰ ਆਪਣੀ ਵੈੱਬਸਾਈਟ 'ਤੇ ਵੀ ਅਪਡੇਟ ਕਰ ਦਿੱਤਾ ਹੈ।
