ਜੌਹਾਨਸਬਰਗ : ਸੀਰੀਜ਼ ਦੇ ਪਹਿਲੇ 3 ਵਨ ਡੇ ਮੈਚ ਲਗਾਤਾਰ ਜਿੱਤਣ ਤੋਂ ਬਾਅਦ ਭਾਰਤੀ ਟੀਮ ਜੌਹਾਨਸਬਰਗ 'ਚ ਸੀਰੀਜ਼ 'ਤੇ ਕਬਜ਼ਾ ਕਰਨ ਉੱਤਰੇਗੀ। ਆਈ. ਸੀ. ਸੀ. ਵਨ ਡੇ ਰੈਂਕਿੰਗ 'ਚ ਨੰਬਰ ਇਕ 'ਤੇ ਮੌਜੂਦ ਭਾਰਤੀ ਟੀਮ ਦੇ ਲਈ ਦੱਖਣੀ ਅਫਰੀਕਾ ਦੀ ਧਰਤੀ 'ਤੇ ਇਹ ਪਹਿਲੀ ਦੁਵੱਲੇ ਸੀਰੀਜ਼ ਜਿੱਤ ਹੋਵੇਗੀ। ਭਾਰਤ ਨੇ ਅੱਜ ਤਕ ਦੱਖਣੀ ਅਫਰੀਕਾ ਦੌਰੇ 'ਤੇ ਇਕ ਵੀ ਵਨ ਡੇ ਸੀਰੀਜ਼ ਨਹੀਂ ਜਿੱਤੀ ਹੈ। ਦੱਖਣੀ ਅਫਰੀਕਾ ਦੌਰੇ ਦੀ ਸ਼ੁਰੂਆਤ 'ਚ ਭਾਰਤ ਦਾ ਜਿੱਤ-ਹਾਰ ਫੀਸਦੀ 0.24 ਸੀ। ਜੋ ਹੁਣ ਵੱਧ ਕੇ 0.38 ਹੋ ਗਿਆ ਹੈ। ਭਾਰਤੀ ਟੀਮ ਨੇ ਇੱਥੇ ਕੇਵਲ 5 ਮੈਚ ਜਿੱਤੇ ਹਨ ਜਦਕਿ 21 ਮੈਚਾਂ 'ਚ ਭਾਰਤ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ।
ਨਿਊ ਵਾਂਡਰਰਸ ਸਟੇਡੀਅਮ 'ਚ ਭਾਰਤੀ ਟੀਮ ਨੇ 3 ਮੈਚ ਜਿੱਤੇ ਹਨ ਤੇ 4 'ਚ ਉਨ੍ਹਾਂ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਭਾਰਤ ਦਾ 0.75 ਦਾ ਜਿੱਤ ਫੀਸਦੀ ਠੀਕ ਮੰਨਿਆ ਜਾਵੇਗਾ। ਦੱਖਣੀ ਅਫਰੀਕਾ ਖਿਲਾਫ ਇਸ ਮੈਦਾਨ 'ਤੇ ਖੇਡੇ 4 ਮੈਚਾਂ 'ਚ ਭਾਰਤੀ ਟੀਮ 3 ਮੈਚ ਹਾਰੀ ਹੈ ਤੇ ਕੇਵਲ 1 ਜਿੱਤ ਹਾਸਲ ਕੀਤੀ ਹੈ। ਉਹ ਜਿੱਤ ਵੀ ਭਾਰਤ ਨੇ 1 ਦੌੜ ਦੇ ਫਰਕ ਨਾਲ ਹਾਸਲ ਕੀਤੀ ਸੀ। ਦੱਖਣੀ ਅਫਰੀਕਾ 'ਚ ਖੇਡੀ ਵਨ ਡੇ ਸੀਰੀਜ਼ 'ਚ ਸਭ ਤੋਂ ਜ਼ਿਆਦਾ ਵਿਕਟ ਹਾਸਲ ਕਰਨ ਵਾਲੇ ਸਪਿਨ ਗੇਂਦਬਾਜ਼ ਕੀਥ ਆਰਥਰਟਨ(12) ਹੈ।
ਭਾਰਤੀ ਟੀਮ ਦੇ ਰਿਸਟ ਸਪਿਨਰ ਯੁਜਵੇਂਦਰ ਚਾਹਲ ਇਸ ਸੀਰੀਜ਼ 'ਚ ਹੁਣ ਤਕ 11 ਵਿਕਟ ਹਾਸਲ ਕਰ ਚੁੱਕਾ ਹੈ ਤੇ ਕੁਲਦੀਪ ਯਾਦਵ ਨੇ ਨਾਂ 10 ਵਿਕਟਾਂ ਹਨ। ਇਸ ਤਰ੍ਹਾਂ ਦੋਵਾਂ 'ਚੋਂ ਕੋਈ ਇਕ ਸਪਿਨਰ ਜੌਹਾਨਸਬਰਗ ਵਨ ਡੇ 'ਚ ਕੀਥ ਦਾ ਰਿਕਾਰਡ ਆਪਣੇ ਨਾਂ ਕਰ ਸਕਦਾ ਹੈ। ਕੁਲਦੀਪ ਨੂੰ ਮਾਈਕਲ ਬੇਵਨ ਨੂੰ ਪਿੱਛੇ ਛੱਡਣ ਲਈ ਸਭ ਤੋਂ ਜ਼ਿਆਦਾ ਵਿਕਟ ਹਾਸਲ ਕਰਨ ਵਾਲੇ ਚਾਈਨਾਮੈਨ ਗੇਂਦਬਾਜ਼ ਬਣਨ ਦੇ ਲਈ 5 ਹੋਰ ਵਿਕਟਾਂ ਦੀ ਜ਼ਰੂਰਤ ਹੈ। ਬ੍ਰੈਡ ਹਾਗ 156 ਵਿਕਟਾਂ ਦੇ ਨਾਲ ਇਸ ਸੂਚੀ 'ਚ ਨੰਬਰ 1 'ਤੇ ਹੈ।
ਮਹਿੰਦਰ ਸਿੰਘ ਧੋਨੀ ਹੁਣ ਵੀ ਵਨ ਡੇ 'ਚ 10,000 ਦੌੜਾਂ ਤੋਂ 88 ਦੌੜਾਂ ਦੂਰ ਹੈ। ਧੋਨੀ (9,912) ਨੇ ਕੇਪਟਾਊਨ ਵਨ ਡੇ 'ਚ ਕੇਵਲ 10 ਦੌੜਾਂ ਬਣਾਈਆਂ ਸਨ। ਜੇਕਰ ਧੋਨੀ 88 ਦੌੜਾਂ ਬਣਾ ਲੈਂਦੇ ਹਨ ਤਾਂ ਉਹ 10,000 ਦੌੜਾਂ ਬਣਾਉਣ ਵਾਲੇ ਚੌਥੇ ਭਾਰਤੀ ਤੇ 12ਵੇਂ ਕ੍ਰਿਕਟਰ ਬਣ ਜਾਣਗੇ ਤੇ ਦੁਨੀਆ ਦੇ ਪਹਿਲੇ ਵਿਕਟਕੀਪਰ ਵੀ ਬਣ ਜਾਣਗੇ। ਧੋਨੀ ਤੋਂ ਇਲਾਵਾ ਚੌਥੇ ਨੰਬਰ ਦੇ ਬੱਲੇਬਾਜ਼ ਅਜਿੰਕਿਆ ਰਹਾਣੇ ਵੀ 3,000 ਦੌੜਾਂ ਤੋਂ 88 ਦੌੜਾਂ ਦੂਰ ਹੈ, ਜੇਕਰ ਉਹ 88 ਦੌੜਾਂ ਬਣਾ ਲੈਂਦੇ ਹਨ ਤਾਂ ਉਹ ਭਾਰਤ ਦੇ 20ਵੇਂ ਬੱਲੇਬਾਜ਼ ਹੋਣਗੇ। ਭਾਰਤ ਦੇ ਸਲਾਮੀ ਬੱਲੇਬਾਜ਼ ਸ਼ਿਖਰ ਧਵਨ ਦੇ ਕਰੀਅਰ ਦਾ 100ਵਾਂ ਵਨ ਡੇ ਮੈਚ ਹੋਵੇਗਾ। ਧਵਨ ਭਾਰਤ ਦੇ ਲਈ 100 ਵਨ ਡੇ ਮੈਚ ਖੇਡਣ ਵਾਲੇ 34ਵੇਂ ਕ੍ਰਿਕਟਰ ਬਣਨਗੇ।