ਯਸ਼ਰਾਜ ਫ਼ਿਲਮਜ਼ ਬਾਲੀਵੁੱਡ ਦਾ ਇਕ ਬਹੁਤ ਵੱਡਾ ਨਾਮ ਹੈ ਅਤੇ ਯਸ਼ਰਾਜ ਫ਼ਿਲਮਜ਼ ਦੀਆਂ ਫ਼ਿਲਮਾਂ ਨੇ ਬਾਲੀਵੁੱਡ ਵਿਚ ਵੱਖਰਾ ਮੁਕਾਮ ਬਣਾਇਆ ਹੈ .......
ਯਸ਼ਰਾਜ ਫ਼ਿਲਮਜ਼ ਬਾਲੀਵੁੱਡ ਦਾ ਇਕ ਬਹੁਤ ਵੱਡਾ ਨਾਮ ਹੈ ਅਤੇ ਯਸ਼ਰਾਜ ਫ਼ਿਲਮਜ਼ ਦੀਆਂ ਫ਼ਿਲਮਾਂ ਨੇ ਬਾਲੀਵੁੱਡ ਵਿਚ ਵੱਖਰਾ ਮੁਕਾਮ ਬਣਾਇਆ ਹੈ | ਇਸੇ ਸਿਲਸਿਲੇ ਨੂੰ ਕਾਇਮ ਰੱਖਦੇ ਹੋਏ ਯਸ਼ਰਾਜ ਫਿਲਮਜ਼ ਅਪਣੀ ਆਉਣ ਵਾਲੀ ਫਿਲਮ 'ਠੱਗਸ ਆਫ ਹਿੰਦੁਸਤਾਨ' ਨਾਲ ਦਰਸ਼ਕਾਂ ਦੀ ਦੀਵਾਲੀ ਨੂੰ ਖਾਸ ਬਣਾਉਣ ਜਾ ਰਹੇ ਹਨ । ਇਸ ਫਿਲਮ ਵਿਚ ਪਹਿਲੀ ਵਾਰ ਬਾਲੀਵੁੱਡ ਦੇ ਦੋ ਸੁਪਰ ਸਟਾਰ ਅਮਿਤਾਭ ਬੱਚਨ ਅਤੇ ਅਮੀਰ ਖਾਨ ਇਕੱਠੇ ਨਜ਼ਰ ਆਉਣਗੇ | ਇਸਦੇ ਨਾਲ ਹੀ ਕੈਟਰੀਨਾ ਕੈਫ ਤੇ ਫਾਤਿਮਾ ਸਨਾ ਸ਼ੇਖ ਇਸ ਫਿਲਮ ਵਿਚ ਅਦਾਕਾਰੀ ਦੇ ਜਲਵੇ ਬਿਖੇਰਣਗੀਆਂ | 'ਠੱਗਸ ਆਫ ਹਿੰਦੁਸਤਾਨ' ਆਉਣ ਵਾਲੇ ਦਿਨਾਂ 'ਚ ਰਿਲੀਜ਼ ਹੋਣ ਵਾਲੀ ਸਭ ਤੋਂ ਵੱਡੀ ਫਿਲਮ ਹੈ ਤੇ ਨਿਰਮਾਤਾ ਇਸ ਨੂੰ ਵੱਡੇ ਪੱਧਰ ਦੀ ਫਿਲਮ ਬਣਾਉਣ 'ਚ ਕੋਈ ਕਸਰ ਨਹੀਂ ਛੱਡ ਰਹੇ ਹਨ।
ਇਸ ਫਿਲਮ ਦੇ ਨਿਰਮਾਤਾ ਨੇ ਫਿਲਮ ਨੂੰ ਬਿਹਤਰ ਬਣਾਉਣ ਲਈ ਬਹੁਤ ਸਾਰੇ ਤਜ਼ੁਰਬੇ ਕੀਤੇ ਹਨ ਅਤੇ ਇਸਦੀ ਲੋਕੇਸ਼ਨ ਲਈ ਨਿਰਮਾਤਾਵਾਂ ਨੇ ਜਗ੍ਹਾ-ਜਗ੍ਹਾ 'ਤੇ ਯਾਤਰਾ ਕੀਤੀ | ਦਰਸ਼ਕਾਂ ਨੂੰ ਅਨੰਦਮਈ ਅਨੁਭਵ ਪ੍ਰਦਾਨ ਕਰਨ ਲਈ ਇਸ ਫਿਲਮ ਨੂੰ ਬਹੁਤ ਅਦਭੁਤ ਜਗ੍ਹਾਵਾਂ 'ਤੇ ਫਿਲਮਾਇਆ ਗਿਆ ਹੈ | ਇਨ੍ਹਾਂ ਸਥਾਨਾਂ ਦੀ ਖਾਸ ਗੱਲ ਇਹ ਹੈ ਕਿ ਇਨ੍ਹਾਂ ਦੀ ਖੂਬਸੂਰਤੀ ਫਿਲਮ ਨੂੰ ਹੋਰ ਨਿਖਾਰ ਦੇਵੇਗੀ | ਤੁਹਾਨੂੰ ਦੱਸ ਦੇਈਏ ਕਿ ਵਿਸ਼ਵ ਪ੍ਰਸਿੱਧ ਟੀਵੀ ਸੀਰੀਜ਼ 'ਗੇਮ ਆਫ ਥਰੋਨਜ਼' ਨੂੰ ਵੀ ਇਨ੍ਹਾਂ ਜਗ੍ਹਾਵਾਂ 'ਤੇ ਫਿਲਮਾਇਆ ਗਿਆ ਹੈ |
ਸੂਤਰਾਂ ਦੀ ਮੰਨੀਏ ਤਾਂ 'ਠੱਗਸ ਆਫ ਹਿੰਦੁਸਤਾਨ' ਦੀ ਟੀਮ ਨੇ ਮਾਲਟਾ 'ਚ ਇਸ ਨੂੰ ਵੱਡੇ ਪੱਧਰ 'ਤੇ ਫਿਲਮਾਇਆ ਹੈ, ਇਹ ਉਹ ਸਥਾਨ ਹੈ, ਜਿਥੇ 'ਗੇਮਸ ਆਫ ਥ੍ਰੋਨਸ' ਦੀ ਸ਼ੂਟਿੰਗ ਕੀਤੀ ਗਈ ਸੀ। ਮਾਲਟਾ 'ਚ ਕੁਝ ਅਸਾਧਾਰਨ ਤੇ ਹੈਰਾਨ ਕਰਨ ਵਾਲੀਆਂ ਥਾਵਾਂ ਹਨ, ਜੋ ਦੇਖਣ 'ਚ ਬੇਹੱਦ ਖੂਬਸੂਰਤ ਹਨ। ਇਹ ਇਕ ਅਜਿਹੀ ਥਾਂ ਹੈ, ਜਿਸ ਨੂੰ ਬਹੁਤ ਸਾਰੇ ਲੋਕਾਂ ਨੇ ਨਹੀਂ ਦੇਖਿਆ ਤੇ 'ਠੱਗਸ ਆਫ ਹਿੰਦੁਸਤਾਨ' ਰਾਹੀਂ ਲੋਕਾਂ ਨੂੰ ਇਨ੍ਹਾਂ ਖੂਬਸੂਰਤ ਨਜ਼ਾਰਿਆਂ ਨੂੰ ਦੇਖਣ ਦਾ ਮੌਕਾ ਮਿਲੇਗਾ |
ਆਮਿਰ ਖਾਨ ਆਪਣੀਆਂ ਫਿਲਮਾਂ ਲਈ ਕਾਫੀ ਮਿਹਨਤ ਕਰਦੇ ਹਨ ਤੇ ਆਪਣੇ ਕਿਰਦਾਰ ਲਈ ਉਹ ਆਪਣੀ ਬਾਡੀ ਨੂੰ ਵੀ ਬਹੁਤ ਛੇਤੀ ਬਦਲ ਲੈਂਦੇ ਹਨ। ਆਪਣੀ ਪਿਛਲੀ ਫਿਲਮ 'ਦੰਗਲ' ਲਈ ਉਨ੍ਹਾਂ ਨੇ ਆਪਣਾ ਭਾਰ 120 ਕਿਲੋ ਤਕ ਕੀਤਾ | ਫਿਲਹਾਲ ਆਮਿਰ 'ਠੱਗਸ ਆਫ ਹਿੰਦੁਸਤਾਨ' ਦੀ ਸ਼ੂਟਿੰਗ ਕਰ ਰਹੇ ਹਨ ਤੇ ਇਸ ਫਿਲਮ ਲਈ ਉਨ੍ਹਾਂ ਨੇ ਆਪਣਾ 50 ਕਿਲੋ ਭਾਰ ਘੱਟ ਕਰ ਲਿਆ ਹੈ। ਹੁਣ ਆਮਿਰ ਆਪਣੇ ਨਾਰਮਲ ਭਾਰ 70 ਕਿਲੋ 'ਤੇ ਆ ਗਏ ਹਨ।