ਮਾਪਿਆਂ ਨੂੰ ਅਪਣੇ ਬੱਚਿਆਂ ਨੂੰ ਡਕਾਰ ਦਿਵਾਉਣ ਦੀ ਸਲਾਹ ਦਿਤੇ ਜਾਣ ਦੇ ਬਾਵਜੂਦ, ਇਸ ਵਿਸ਼ੇ ’ਤੇ ਬਹੁਤ ਸਾਰੇ ਖੋਜ ਸਬੂਤ ਉਪਲਬਧ ਨਹੀਂ ਹਨ

(ਕਾਰਲੀਨ ਗ੍ਰਿਬਲ, ਵੈਸਟਰਨ ਸਿਡਨੀ ਯੂਨੀਵਰਸਿਟੀ ਨੀਨਾ ਜੇਨ ਚਾਡ, ਸਿਡਨੀ ਯੂਨੀਵਰਸਿਟੀ) 

ਸਿਡਨੀ: ਮਾਪਿਆਂ ਨੂੰ ਅਕਸਰ ਸਲਾਹ ਦਿਤੀ ਜਾਂਦੀ ਹੈ ਕਿ ਉਹ ਦੁੱਧ ਪਿਲਾਉਣ ਤੋਂ ਬਾਅਦ ਅਪਣੇ ਬੱਚਿਆਂ ਨੂੰ ਡਕਾਰ ਦਿਵਾਉਣ। ਕੁੱਝ ਲੋਕ ਸੋਚਦੇ ਹਨ ਕਿ ਦੁੱਧ ਪਿਲਾਉਣ ਤੋਂ ਬਾਅਦ ਡਕਾਰ ਦਿਵਾਉਣਾ ਬੱਚੇ ਦੇ ਰੋਣ ਨੂੰ ਘਟਾਉਣ ਜਾਂ ਰੋਕਣ ਲਈ ਮਹੱਤਵਪੂਰਨ ਹੈ, ਜਾਂ ਇਸ ਨਾਲ ਦੁੱਧ ਪਿਲਾਉਣ ਤੋਂ ਬਾਅਦ ਬੱਚੇ ਦੇ ਦੁੱਧ ਬਾਹਰ ਕੱਢਣ ਦੀ ਸੰਭਾਵਨਾ ਘਟ ਜਾਂਦੀ ਹੈ। ਇਹ ਸੱਚ ਹੈ ਕਿ ਬੱਚੇ, ਬਾਲਗਾਂ ਵਾਂਗ, ਖਾਣਾ ਖਾਂਦੇ ਸਮੇਂ ਹਵਾ ਨਿਗਲ ਲੈਂਦੇ ਹਨ। ਡਕਾਰ ਲੈਣ ਨਾਲ ਇਹ ਹਵਾ ਸਾਡੀ ਪਾਚਨ ਪ੍ਰਣਾਲੀ ਦੇ ਉੱਪਰਲੇ ਹਿੱਸੇ ਤੋਂ ਬਾਹਰ ਨਿਕਲ ਜਾਂਦੀ ਹੈ। ਇਸ ਲਈ ਜਦੋਂ ਕੋਈ ਬੱਚਾ ਦੁੱਧ ਪੀਣ ਤੋਂ ਬਾਅਦ ਰੋਦਾ ਹੈ, ਤਾਂ ਬਹੁਤ ਸਾਰੇ ਮੰਨਦੇ ਹਨ ਕਿ ਇਹ ਇਸ ਲਈ ਹੈ ਕਿਉਂਕਿ ਬੱਚੇ ਨੂੰ ‘ਡਕਾਰ’ ਦਿਵਾਉਣ ਦੀ ਜ਼ਰੂਰਤ ਹੈ। ਹਾਲਾਂਕਿ, ਜ਼ਰੂਰੀ ਨਹੀਂ ਹੈ ਕਿ ਇਹ ਸੱਚ ਹੀ ਹੋਵੇ।

ਦੁੱਧ ਪੀਣ ਤੋਂ ਬਾਅਦ ਬੱਚੇ ਕਿਉਂ ਰੋਂਦੇ ਜਾਂ ‘ਦੁੱਧ ਬਾਹਰ’ ਕਿਉਂ ਕਢਦੇ ਹਨ? 

ਬੱਚੇ ਕਈ ਕਾਰਨਾਂ ਕਰ ਕੇ ਰੋਂਦੇ ਹਨ ਜਿਨ੍ਹਾਂ ਦਾ ‘ਫਸੀ ਹੋਈ ਹਵਾ’ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ। ਉਹ ਉਦੋਂ ਰੋਦੇ ਹਨ ਜਦੋਂ ਉਹ ਭੁੱਖੇ, ਠੰਢੇ, ਗਰਮ, ਡਰੇ ਹੋਏ, ਥੱਕੇ ਹੋਏ, ਇਕੱਲੇ, ਪਰੇਸ਼ਾਨ ਹੋਣ, ਉਨ੍ਹਾਂ ਨੂੰ ਸ਼ਾਂਤ ਹੋਣ ਲਈ ਵੱਡਿਆਂ ਦੀ ਮਦਦ ਦੀ ਜ਼ਰੂਰਤ ਹੋਵੇ, ਬੇਆਰਾਮੀ ਜਾਂ ਦਰਦ ’ਚ, ਜਾਂ ਕਦੇ ਵੀ ਕਿਸੇ ਅਣਜਾਣ ਕਾਰਨ ਕਰ ਕੇ। ਅਸਲ ’ਚ, ਸਾਡੇ ਕੋਲ ਬਿਨਾਂ ਕਿਸੇ ਪਛਾਣੇ ਜਾਣ ਵਾਲੇ ਕਾਰਨ ਦੇ ਰੋਣ ਲਈ ਨਾਂ ਵੀ ਹੈ; ਇਸ ਨੂੰ ‘ਕੋਲਿਕ’ ਕਿਹਾ ਜਾਂਦਾ ਹੈ। ‘ਦੁੱਧ ਉਗਲਣਾ’ - ਜਦੋਂ ਕੋਈ ਬੱਚਾ ਦੁੱਧ ਪੀਣ ਤੋਂ ਬਾਅਦ ਹੌਲੀ-ਹੌਲੀ ਥੋੜ੍ਹਾ ਜਿਹਾ ਦੁੱਧ ਉਗਲਦਾ ਹੈ - ਇਹ ਆਮ ਗੱਲ ਹੈ ਕਿਉਂਕਿ ਨਵਜੰਮੇ ਬੱਚੇ ਦੇ ਪੇਟ ਦੇ ਸਿਖਰ ’ਤੇ ਮਾਸਪੇਸ਼ੀਆਂ ਪੂਰੀ ਤਰ੍ਹਾਂ ਪੱਕੀਆਂ ਨਹੀਂ ਹੁੰਦੀਆਂ। ਇਸ ਦਾ ਮਤਲਬ ਇਹ ਹੈ ਕਿ ਜੋ ਹੇਠਾਂ ਜਾਂਦਾ ਹੈ ਉਹ ਆਸਾਨੀ ਨਾਲ ਉੱਪਰ ਵਾਪਸ ਜਾ ਸਕਦਾ ਹੈ। ਵਾਰ-ਵਾਰ ਥੁੱਕਣਾ ਉਦੋਂ ਹੁੰਦਾ ਹੈ ਜਦੋਂ ਬੱਚੇ ਦਾ ਪੇਟ ਬਹੁਤ ਜ਼ਿਆਦਾ ਭਰ ਜਾਂਦਾ ਹੈ, ਉਨ੍ਹਾਂ ਦੇ ਪੇਟ ’ਤੇ ਦਬਾਅ ਪੈਂਦਾ ਹੈ ਜਾਂ ਲੇਟਣ ਤੋਂ ਬਾਅਦ ਉਨ੍ਹਾਂ ਨੂੰ ਚੁੱਕ ਲਿਆ ਜਾਂਦਾ ਹੈ। ਜਿਵੇਂ-ਜਿਵੇਂ ਬੱਚੇ ਵੱਡੇ ਹੁੰਦੇ ਹਨ, ਦੁੱਧ ਪਿਲਾਉਣ ਤੋਂ ਬਾਅਦ ਦੁੱਧ ਨੂੰ ਵਾਪਸ ਉਗਲਣ ਦੀ ਪ੍ਰਕਿਰਿਆ ਘੱਟ ਜਾਂਦੀ ਹੈ। ਇਕ ਮਹੀਨੇ ਦੇ ਤਿੰਨ-ਚੌਥਾਈ ਬੱਚੇ ਦਿਨ ’ਚ ਘੱਟੋ-ਘੱਟ ਇਕ ਵਾਰ ਦੁੱਧ ਪਿਲਾਏ ਜਾਣ ਤੋਂ ਬਾਅਦ ਥੋੜ੍ਹਾ ਜਿਹਾ ਦੁੱਧ ਬਾਹਰ ਕੱਢ ਦਿੰਦੇ ਹਨ। ਲਗਭਗ ਅੱਧੇ ਬੱਚੇ ਪੰਜ ਮਹੀਨਿਆਂ ਦੇ ਹੋਣ ਤਕ ਦੁੱਧ ਬਾਹਰ ਕਢਣਾ ਬੰਦ ਕਰ ਦਿੰਦੇ ਹਨ ਅਤੇ ਲਗਭਗ ਸਾਰੇ (96٪) ਅਪਣੇ ਪਹਿਲੇ ਜਨਮਦਿਨ ਤਕ ਦੁੱਧ ਬਾਹਰ ਕਢਣਾ ਬੰਦ ਕਰ ਦਿੰਦੇ ਹਨ। 

ਕੀ ਡਕਾਰ ਲੈਣ ਨਾਲ ਰੋਣਾ ਜਾਂ ਦੁੱਧ ਉਗਲਣਾ ਘਟਾਉਣ ’ਚ ਮਦਦ ਮਿਲਦੀ ਹੈ? 

ਮਾਪਿਆਂ ਨੂੰ ਅਪਣੇ ਬੱਚਿਆਂ ਨੂੰ ਡਕਾਰ ਦਿਵਾਉਣ ਦੀ ਸਲਾਹ ਦਿਤੇ ਜਾਣ ਦੇ ਬਾਵਜੂਦ, ਇਸ ਵਿਸ਼ੇ ’ਤੇ ਬਹੁਤ ਸਾਰੇ ਖੋਜ ਸਬੂਤ ਉਪਲਬਧ ਨਹੀਂ ਹਨ। ਭਾਰਤ ’ਚ ਕੀਤੇ ਗਏ ਇਕ ਅਧਿਐਨ ’ਚ, 35 ਨਵਜੰਮੇ ਬੱਚਿਆਂ ਦੀ ਦੇਖਭਾਲ ਕਰਨ ਵਾਲਿਆਂ ਨੂੰ ਅਪਣੇ ਬੱਚਿਆਂ ਨੂੰ ਡਕਾਰ ਦਿਵਾਉਣ ਲਈ ਉਤਸ਼ਾਹਤ ਕੀਤਾ ਗਿਆ, ਜਦਕਿ 36 ਨਵਜੰਮੇ ਬੱਚਿਆਂ ਦੀ ਦੇਖਭਾਲ ਕਰਨ ਵਾਲਿਆਂ ਨੂੰ ਡਕਾਰ ਦਿਵਾਉਣ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿਤੀ ਗਈ ਸੀ। ਅਗਲੇ ਤਿੰਨ ਮਹੀਨਿਆਂ ਲਈ, ਮਾਵਾਂ ਅਤੇ ਦੇਖਭਾਲ ਕਰਨ ਵਾਲਿਆਂ ਨੇ ਰੀਕਾਰਡ ਕੀਤਾ ਕਿ ਕੀ ਉਨ੍ਹਾਂ ਦਾ ਬੱਚਾ ਦੁੱਧ ਪਿਲਾਉਣ ਤੋਂ ਬਾਅਦ ਵਾਪਸ ਉਗਲਦਾ ਹੈ ਅਤੇ ਕੀ ਉਨ੍ਹਾਂ ’ਚ ਉੱਚੀ ਆਵਾਜ਼ ’ਚ ਰੋਣ ਦੇ ਸੰਕੇਤ ਵਿਖਾਈ ਦਿਤੇ ਸਨ। ਇਸ ਅਧਿਐਨ ’ਚ ਪਾਇਆ ਗਿਆ ਕਿ ਡਕਾਰ ਮਾਰਨ ਨਾਲ ਰੋਣਾ ਘੱਟ ਨਹੀਂ ਹੋਇਆ ਅਤੇ ਅਸਲ ’ਚ ਦੁੱਧ ਬਾਹਰ ਕੱਢਣ ’ਚ ਵਾਧਾ ਦਰਜ ਕੀਤਾ ਗਿਆ।  

ਮੈਨੂੰ ਦੁੱਧ ਬਾਹਰ ਕੱਢਣ ਜਾਂ ਰੋਣ ਬਾਰੇ ਕਦੋਂ ਚਿੰਤਤ ਹੋਣਾ ਚਾਹੀਦਾ ਹੈ? 

ਜ਼ਿਆਦਾਤਰ ਰੋਣਾ ਅਤੇ ਦੁੱਧ ਬਾਹਰ ਕਢਣਾ ਆਮ ਗੱਲ ਹੈ। ਹਾਲਾਂਕਿ, ਇਹ ਵਿਵਹਾਰ ਆਮ ਨਹੀਂ ਹਨ: 

• ਖਾਣ ਤੋਂ ਇਨਕਾਰ ਕਰਨਾ
• ਬਹੁਤ ਜ਼ਿਆਦਾ ਦੁੱਧ ਬਾਹਰ ਕੱਢਣ ਕਾਰਨ ਭਾਰ ਵਧਣ ਦੀ ਰਫਤਾਰ ਘੱਟ ਹੋ ਜਾਣਾ
• ਖੰਘ ਜਾਂ ਘਰਘਰਾਹਟ ਦੀਆਂ ਸਮੱਸਿਆਵਾਂ
• ਦੁੱਧ ਪਿਲਾਉਂਦੇ ਸਮੇਂ ਖੂਨ ਨਾਲ ਉਲਟੀਆਂ ਹੋਣੀਆਂ

ਜੇ ਤੁਹਾਡੇ ਬੱਚੇ ’ਚ ਇਨ੍ਹਾਂ ’ਚੋਂ ਕੋਈ ਲੱਛਣ ਹਨ, ਤਾਂ ਕਿਸੇ ਡਾਕਟਰ ਜਾਂ ਬਾਲ ਸਿਹਤ ਨਰਸ ਕੋਲ ਜਾਓ। ਜੇ ਤੁਹਾਡਾ ਬੱਚਾ ਉਲਟੀਆਂ ਤੋਂ ਪਰੇਸ਼ਾਨ ਨਹੀਂ ਹੈ ਅਤੇ ਉਸ ਦੇ ਕੋਈ ਹੋਰ ਲੱਛਣ ਨਹੀਂ ਹਨ, ਤਾਂ ਇਹ ਕੱਪੜਿਆਂ ਖ਼ਰਾਬ ਕਰਨ ਤੋਂ ਵੱਧ ਕੁੱਝ ਨਹੀਂ ਹੈ। ਇਹ ਕੋਈ ਅਜਿਹੀ ਚੀਜ਼ ਨਹੀਂ ਹੈ ਜਿਸ ਨੂੰ ਡਾਕਟਰੀ ਧਿਆਨ ਦੀ ਲੋੜ ਹੈ। ਬੱਚਿਆਂ ਲਈ ਬਹੁਤ ਰੋਣਾ ਅਤੇ ਮਚਲਣਾ ਵੀ ਆਮ ਗੱਲ ਹੈ; ਦਿਨ ’ਚ ਦੋ ਘੰਟੇ, ਲਗਭਗ ਪਹਿਲੇ ਛੇ ਹਫਤਿਆਂ ਦਾ ਔਸਤ ਹੈ। ਤਿੰਨ ਮਹੀਨਿਆਂ ਦੀ ਉਮਰ ਤਕ ਪਹੁੰਚਦੇ-ਪਹੁੰਚਦੇ, ਇਹ ਆਮ ਤੌਰ ’ਤੇ ਪ੍ਰਤੀ ਦਿਨ ਲਗਭਗ ਇਕ ਘੰਟਾ ਤਕ ਘੱਟ ਜਾਂਦਾ ਹੈ। ਇਸ ਤੋਂ ਵੱਧ ਰੋਣ ਦਾ ਮਤਲਬ ਇਹ ਨਹੀਂ ਹੈ ਕਿ ਕੁੱਝ ਗਲਤ ਹੈ। ਇਕ ਚੌਥਾਈ ਛੋਟੇ ਬੱਚੇ ਉਦੋਂ ਰੋਦੇ ਹਨ ਜਦੋਂ ਉਨ੍ਹਾਂ ਨੂੰ ਪੇਟ ਦਾ ਦਰਦ ਜਾਂ ਕੜਵਲ ਹੁੰਦੇ ਹਨ, ਪਰ ਇਹ ਸਮੇਂ ਦੇ ਨਾਲ ਅਪਣੇ ਆਪ ਦੂਰ ਹੋ ਜਾਂਦੇ ਹਨ। ਜੇ ਤੁਹਾਡਾ ਬੱਚਾ ਔਸਤ ਤੋਂ ਵੱਧ ਰੋ ਰਿਹਾ ਹੈ ਜਾਂ ਤੁਸੀਂ ਚਿੰਤਤ ਹੋ ਕਿ ਕੁੱਝ ਗਲਤ ਹੋ ਸਕਦਾ ਹੈ, ਤਾਂ ਤੁਹਾਨੂੰ ਅਪਣੇ ਡਾਕਟਰ ਜਾਂ ਬਾਲ ਸਿਹਤ ਨਰਸ ਨੂੰ ਮਿਲਣਾ ਚਾਹੀਦਾ ਹੈ। 

ਹਰ ਕੋਈ ਅਪਣੇ ਬੱਚੇ ਨੂੰ ਡਕਾਰ ਨਹੀਂ ਦਿਵਾਉਂਦਾ

ਦੁਨੀਆਂ ਦੇ ਕੁੱਝ ਹਿੱਸਿਆਂ ’ਚ ਬੱਚਿਆਂ ਨੂੰ ਡਕਾਰ ਦਿਵਾਉਣਾ ਇਕ ਰਵਾਇਤੀ ਅਭਿਆਸ ਹੈ, ਪਰ ਦੂਜਿਆਂ ’ਚ ਨਹੀਂ। ਉਦਾਹਰਣ ਵਜੋਂ, ਇੰਡੋਨੇਸ਼ੀਆ ’ਚ ਕੀਤੀ ਗਈ ਖੋਜ ’ਚ ਪਾਇਆ ਗਿਆ ਹੈ ਕਿ ਜ਼ਿਆਦਾਤਰ ਛਾਤੀ ਦਾ ਦੁੱਧ ਚੁੰਘਾਉਣ ਵਾਲੀਆਂ ਮਾਵਾਂ ਦੁੱਧ ਪਿਲਾਉਣ ਤੋਂ ਬਾਅਦ ਅਪਣੇ ਬੱਚਿਆਂ ਨੂੰ ਬਹੁਤ ਘੱਟ ਜਾਂ ਕਦੇ ਡਕਾਰ ਨਹੀਂ ਦਿਵਾਉਂਦੀਆਂ। ਬੱਚੇ ਨੂੰ ਸਲਿੰਗ ਜਾਂ ਬੇਬੀ ਕੈਰੀਅਰ ’ਤੇ ਲਿਜਾਣ ਨਾਲ ਬੱਚਿਆਂ ਦੇ ਰੋਣ ਦੇ ਸਮੇਂ ਨੂੰ ਘਟ ਕੀਤਾ ਜਾ ਸਕਦਾ ਹੈ। ਜਿਨ੍ਹਾਂ ਬੱਚਿਆਂ ਨੂੰ ਅਪਣੀ ਮਾਂ ਜਾਂ ਕਿਸੇ ਹੋਰ ਦੇਖਭਾਲ ਕਰਨ ਵਾਲੇ ਵਲੋਂ ਦੁੱਧ ਪਿਲਾਉਣ ਤੋਂ ਬਾਅਦ ਗੋਦੀ ਚੱਲ ਲਿਆ ਜਾਂਦਾ ਹੈ, ਬਿਨਾਂ ਸ਼ੱਕ ਬੱਚਿਆਂ ਨੂੰ ਉਸ ਨੇੜਤਾ ਅਤੇ ਗਤੀਵਿਧੀ ਤੋਂ ਆਰਾਮ ਮਿਲਦਾ ਹੈ।

ਸਲਿੰਗ ’ਚ ਵੀ ਬੱਚਿਆਂ ਨੂੰ ਮਜ਼ਬੂਤੀ ਨਾਲ ਅਤੇ ਸਿੱਧਾ ਰੱਖਿਆ ਜਾ ਰਿਹਾ ਹੈ, ਜੋ ਉਨ੍ਹਾਂ ਨੂੰ ਨਿਗਲੀ ਗਈ ਹਵਾ ਡਕਾਰ ਰਾਹੀਂ ਕੱਢਣ ’ਚ ਮਦਦ ਕਰਦੀ ਹੈ। ਸਲਿੰਗ ਦੀ ਵਰਤੋਂ ਕਰਨਾ ਬੱਚੇ ਦੀ ਦੇਖਭਾਲ ਕਰਨਾ ਆਸਾਨ ਬਣਾ ਸਕਦਾ ਹੈ। ਅਧਿਐਨਾਂ ਨੇ ਇਹ ਵੀ ਵਿਖਾਇਆ ਹੈ ਕਿ ਜਦੋਂ ਔਰਤਾਂ ਬੇਬੀ ਸਲਿੰਗ ਦੀ ਵਰਤੋਂ ਕਰਦੀਆਂ ਹਨ ਤਾਂ ਉਨ੍ਹਾਂ ’ਚ ਡਿਪਰੈਸ਼ਨ ਦੀ ਦਰ ਘੱਟ ਹੁੰਦੀ ਹੈ ਅਤੇ ਲੰਮੇ ਸਮੇਂ ਤਕ ਛਾਤੀ ਦਾ ਦੁੱਧ ਚੁੰਘਾਉਣ ਦੀ ਸੰਭਾਵਨਾ ਵਧੇਰੇ ਹੁੰਦੀ ਹੈ। ਇਹ ਮਹੱਤਵਪੂਰਨ ਹੈ ਕਿ ਬੇਬੀ ਕੈਰੀਅਰ ਅਤੇ ਸਲਿੰਗ ਨੂੰ ਸੁਰੱਖਿਅਤ ਤਰੀਕੇ ਨਾਲ ਵਰਤਿਆ ਜਾਵੇ, ਇਸ ਲਈ ਇਸ ਨੂੰ ਕਿਵੇਂ ਕਰਨਾ ਹੈ ਇਸ ਬਾਰੇ ਨਵੀਨਤਮ ਸਲਾਹ ਨਾਲ ਅਪਡੇਟ ਰਹਿਣਾ ਯਕੀਨੀ ਬਣਾਓ। 

ਕੀ ਮੈਨੂੰ ਅਪਣੇ ਬੱਚੇ ਨੂੰ ਡਕਾਰ ਦਿਵਾਉਣਾ ਚਾਹੀਦਾ ਹੈ? 

ਇਹ ਤੁਹਾਡੇ ’ਤੇ ਨਿਰਭਰ ਕਰਦਾ ਹੈ। ਅਪਣੇ ਬੱਚੇ ਨੂੰ ਹੌਲੀ-ਹੌਲੀ ਡਕਾਰ ਦਿਵਾਉਣਾ ਨੁਕਸਾਨਦੇਹ ਨਹੀਂ ਹੈ। ਜੇ ਤੁਸੀਂ ਸੋਚਦੇ ਹੋ ਕਿ ਡਕਾਰ ਦਿਵਾਉਣਾ ਤੁਹਾਡੇ ਬੱਚੇ ਲਈ ਮਦਦਗਾਰ ਹੈ, ਤਾਂ ਜੋ ਤੁਸੀਂ ਕਰ ਰਹੇ ਹੋ ਉਸ ਨੂੰ ਜਾਰੀ ਰੱਖੋ। ਜੇ ਹਰ ਦੁੱਧ ਪਿਲਾਉਣ ਤੋਂ ਬਾਅਦ ਅਪਣੇ ਬੱਚੇ ਨੂੰ ਡਕਾਰ ਦਿਵਾਉਣ ਦੀ ਕੋਸ਼ਿਸ਼ ਕਰਨਾ ਤੁਹਾਨੂੰ ਜਾਂ ਤੁਹਾਡੇ ਬੱਚੇ ਨੂੰ ਤਣਾਅ ਦਾ ਕਾਰਨ ਬਣ ਰਿਹਾ ਹੈ, ਤਾਂ ਤੁਹਾਨੂੰ ਅਜਿਹਾ ਕਰਨ ਦੀ ਲੋੜ ਨਹੀਂ ਹੈ।