ਵੱਡੀਆਂ ਕੰਪਨੀਆਂ ਵਲੋਂ ਛਾਂਟੀ ਦੀਆਂ ਖ਼ਬਰਾਂ ’ਤੇ ਚਿੰਤਾ ਪ੍ਰਗਟਾਉਣ ਬਾਰੇ ਟਵੀਟ ਕਰਨ ਮਗਰੋਂ ਚਲੀ ਗਈ ਸੀ ਜਿਸ਼ਨੂੰ ਮੋਹਨ ਦੀ ਨੌਕਰੀ
Bengaluru News: ਭਾਰਤ ਦੀ ਸਿਲੀਕਾਨ ਵੈਲੀ ਕਹੇ ਜਾਣ ਵਾਲੇ ਬੈਂਗਲੁਰੂ ’ਚ ਜਿਸ਼ਨੂੰ ਮੋਹਨ ਨਾਂ ਦੇ ਇੱਕ ਕੰਪਿਊਟਰ ਇੰਜਨੀਅਰ ਨੂੰ ਆਪਣੇ ਛੋਟੇ ਜਿਹੇ ਟਵੀਟ ਕਾਰਨ ਨੌਕਰੀ ਤੋਂ ਹੱਥ ਧੋਣਾ ਪਿਆ। ਉਹ ਫੋਰਮਾ ਨਾਂ ਦੀ ਕੰਪਨੀ (ਪਹਿਲਾਂ ਟਵਿਕ ਵਜੋਂ ਜਾਣਿਆ ਜਾਂਦਾ ਸੀ) ਦਾ ਹਿੱਸਾ ਸੀ, ਅਤੇ ਕੋਚੀ ’ਚ ਸਥਿਤ ਅਪਣੇ ਘਰ ਤੋਂ ਕੰਮ ਕਰਦਾ ਸੀ। ਉਸ ਨੇ ਟਵਿੱਟਰ ’ਤੇ ਅਪਣੀਆਂ ਚਿੰਤਾਵਾਂ ਸਾਂਝੀਆਂ ਕਰਦਿਆਂ ਸਿਰਫ਼ ਇਹ ਲਿਖਿਆ ਸੀ, ‘‘ਤਕਨੀਕੀ ਉਦਯੋਗ ’ਚ ਮੰਦੀ ਮੈਨੂੰ ਪ੍ਰੇਸ਼ਾਨ ਕਰ ਰਹੀ ਹੈ। ਮੈਨੂੰ ਲੱਗਦਾ ਹੈ ਕਿ ਮੇਰਾ ਆਤਮਵਿਸ਼ਵਾਸ ਹੇਠਲੇ ਪੱਧਰ ’ਤੇ ਪਹੁੰਚ ਗਿਆ ਹੈ।’’
ਵਿਡੰਬਨਾ ਇਹ ਹੈ ਕਿ ਅਗਲੇ ਹੀ ਦਿਨ, ਫੋਰਮਾ ਨੇ ਜਿਸ਼ਨੂੰ ਨੂੰ ਨੌਕਰੀ ਤੋਂ ਕੱਢ ਦਿਤਾ। ਪਰ ਜਿਸ਼ਨੂੰ ਨੇ ਵੀ ਹੌਸਲਾ ਨਹੀਂ ਹਾਰਿਆ ਅਤੇ ਦੁਬਾਰਾ ਟਵਿੱਟਰ ਦਾ ਸਹਾਰਾ ਲਿਆ, ਇਸ ਵਾਰ ਆਪਣੇ ਡਰ ਨੂੰ ਜ਼ਾਹਰ ਕਰਨ ਲਈ ਨਹੀਂ ਬਲਕਿ ਨਵੇਂ ਮੌਕਿਆਂ ਦੀ ਭਾਲ ਕਰਨ ਲਈ। ਵੇਖਦਿਆਂ ਹੀ ਵੇਖਦਿਆਂ ਟਵਿੱਟਰ ’ਤੇ ਤਕਨੀਕੀ ਭਾਈਚਾਰਾ ਇਕ ਨੌਕਰੀ ਮੇਲੇ ’ਚ ਬਦਲ ਗਿਆ ਅਤੇ ਉਸ ਨੂੰ ਕਈ ਨੌਕਰੀਆਂ ਦੀ ਪੇਸ਼ਕਸ਼ ਮਿਲੀ।
ਇਸ ਘਟਨਾ ਮੈਟਾ, ਗੂਗਲ, ਮਾਈਕ੍ਰੋਸਾਫਟ ਅਤੇ ਸਨੈਪ ਵਰਗੀਆਂ ਤਕਨੀਕੀ ਕੰਪਨੀਆਂ ਵਲੋਂ ਆਪਣੇ ਸੈਂਕੜੇ ਮੁਲਾਜ਼ਮਾਂ ਨੂੰ ਕੱਢਣ ਦੇ ਪਿਛੋਕੜ ’ਚ ਸਾਹਮਣੇ ਆਈ ਹੈ। ਗੂਗਲ ਨੇ ਕੁਝ ਪੈਸੇ ਬਚਾਉਣ ਲਈ ਲਗਭਗ 1,000 ਕਰਮਚਾਰੀਆਂ ਨੂੰ ਬਾਹਰ ਨਿਕਲਣ ਦਾ ਰਸਤਾ ਦਿਖਾਇਆ। ਵਿਪਰੋ ਨੇ ਸੈਂਕੜੇ ਮੱਧ-ਪੱਧਰੀ ਭੂਮਿਕਾਵਾਂ ਵਿੱਚ ਕਟੌਤੀ ਕੀਤੀ ਹੈ। ਐਮਾਜ਼ਾਨ ਵੀ ਪਿੱਛੇ ਨਹੀਂ ਹੈ ਅਤੇ ਉਸ ਨੇ ਅਪਣੇ ਪੁਨਰਗਠਨ ਦੀਆਂ ਕੋਸ਼ਿਸ਼ਾਂ ਜਾਰੀ ਰੱਖੀਆਂ ਹੋਈਆਂ ਹਨ, ਜਿਸ ’ਚ ਅਪਣੇ ਸਿਹਤ ਵਿਭਾਗਾਂ ’ਚ ਛਾਂਟੀ ਸ਼ਾਮਲ ਹੈ।
ਅਜਿਹਾ ਲੱਗਦਾ ਹੈ ਕਿ 2024 ’ਚ ਤਕਨੀਕੀ ਉਦਯੋਗ ਨਵੀਂਆਂ ਖੋਜਾਂ ਦੀ ਬਜਾਏ ਅਪਣੀ ਹੋਂਦ ਨੂੰ ਬਚਾਉਣ ’ਚ ਲੱਗਾ ਹੋਇਆ ਹੈ। ਪਰ ਜਿਸ਼ਨੂੰ ਵਰਗੇ ਲੋਕ ਇਨ੍ਹਾਂ ਚੁਨੌਤੀਆਂ ਦਾ ਡੱਟ ਕੇ ਸਾਹਮਣਾ ਕਰ ਰਹੇ ਹਨ।
(For more Punjabi news apart from Bengaluru News techie's tweet on tech recession leads to job loss, stay tuned to Rozana Spokesman)
