ਨਿੱਜੀ ਖੇਤਰ ਦੇ ਆਈਸੀਆਈਸੀਆਈ ਬੈਂਕ ਨੇ ਆਪਣੇ ਗਾਹਕਾਂ ਨੂੰ ਵੱਡਾ ਝਟਕਾ ਦਿੱਤਾ ਹੈ।
ਨਵੀਂ ਦਿੱਲੀ: ਨਿੱਜੀ ਖੇਤਰ ਦੇ ਆਈਸੀਆਈਸੀਆਈ ਬੈਂਕ ਨੇ ਆਪਣੇ ਗਾਹਕਾਂ ਨੂੰ ਵੱਡਾ ਝਟਕਾ ਦਿੱਤਾ ਹੈ। ਬੈਂਕ ਵੱਲੋਂ ਬਚਤ ਖਾਤੇ 'ਚ ਨਕਦ ਜਮ੍ਹਾਂ ਕਰਾਉਣ ਜਾਂ ਕਢਵਾਉਣ ‘ਤੇ ਚਾਰਜ ਵਧਾਉਣ ਦਾ ਐਲਾਨ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਏਟੀਐਮ ਤੋਂ ਨਕਦੀ ਕਢਵਾਉਣ ਦੇ ਨਿਯਮ ਵੀ ਬਦਲ ਗਏ ਹਨ। ਇਹ ਸਾਰੇ ਨਿਯਮ ਅੱਜ ਯਾਨੀ 15 ਦਸੰਬਰ ਤੋਂ ਲਾਗੂ ਹਨ।
ਆਈਸੀਆਈਸੀਆਈ ਬੈਂਕ ਦੀ ਵੈਬਸਾਈਟ ਅਨੁਸਾਰ 15 ਦਸੰਬਰ ਤੋਂ ਪੈਸੇ ਕਢਵਾਉਣ ਅਤੇ ਜਮ੍ਹਾਂ ਕਰਵਾਉਣ 'ਤੇ ਚਾਰਜ ਵਧਾਏ ਗਏ ਹਨ। ਦਰਅਸਲ ਬੈਂਕ ਵੱਲੋਂ ਬਚਤ ਖਾਤੇ 'ਤੇ 4 ਵਾਰ ਮੁਫਤ ਨਕਦੀ ਲੈਣ-ਦੇਣ ਦੀ ਸਹੂਲਤ ਦਿੱਤੀ ਜਾਂਦੀ ਹੈ। ਇਸ ਸੀਮਾ ਨੂੰ ਪਾਰ ਕੀਤੇ ਜਾਣ ‘ਤੇ ਬੈਂਕ ਖਾਤਾਧਾਰਕਾਂ ਨੂੰ 150 ਰੁਪਏ ਦਾ ਚਾਰਜ ਦੇਣਾ ਹੋਵੇਗਾ।
ਵੈਬਸਾਈਟ 'ਤੇ ਦਿੱਤੀ ਜਾਣਕਾਰੀ ਅਨੁਸਾਰ ਜੇਕਰ ਆਈਸੀਆਈਸੀਆਈ ਬੈਂਕ ਦਾ ਗਾਹਕ ਆਪਣੀ ਹੋਮ ਬ੍ਰਾਂਚ ਤੋਂ ਨਕਦ ਕਢਵਾਉਂਦਾ ਹੈ, ਤਾਂ ਉਹ ਇਕ ਮਹੀਨੇ ਵਿਚ 2 ਲੱਖ ਰੁਪਏ ਤੱਕ ਦੀ ਨਕਦ ਕਢਵਾ ਸਕਦਾ ਹੈ। ਇਸ ਤੋਂ ਵੱਧ ਨਕਦੀ ਕਢਵਾਉਣ ਦੀ ਸਥਿਤੀ ਵਿਚ, ਹਰ 1000 ਰੁਪਏ ‘ਤੇ 5 ਰੁਪਏ ਦੇ ਹਿਸਾਬ ਨਾਲ ਚਾਰਜ ਲਿਆ ਜਾਵੇਗਾ। ਇਹ ਚਾਰਜ ਘੱਟੋ ਘੱਟ 150 ਰੁਪਏ ਹੋਵੇਗਾ।
ਇਸ ਦੇ ਨਾਲ ਹੀ ਜੇਕਰ ਬੈਂਕ ਦੀ ਗਾਹਕ ਹੋਮ ਸ਼ਾਖਾ ਦੀ ਬਜਾਏ ਕਿਸੇ ਹੋਰ ਬ੍ਰਾਂਚ ਤੋਂ ਨਕਦੀ ਕਢਵਾਉਂਦਾ ਹੈ, ਤਾਂ ਸਿਰਫ 25000 ਰੁਪਏ ਤੱਕ ਦਾ ਕੋਈ ਚਾਰਜ ਨਹੀਂ ਲੱਗੇਗਾ। ਇਸ ਤੋਂ ਜ਼ਿਆਦਾ ਨਕਦੀ ਲੈਣ-ਦੇਣ ਦੀ ਸਥਿਤੀ ਵਿਚ 1000 ਰੁਪਏ ‘ਤੇ 5 ਰੁਪਏ ਦੇ ਹਿਸਾਬ ਨਾਲ ਚਾਰਜ ਲਏ ਜਾਣਗੇ। ਇਥੇ ਵੀ ਘੱਟੋ ਘੱਟ 150 ਰੁਪਏ ਦਾ ਚਾਰਜ ਤੈਅ ਕੀਤਾ ਗਿਆ।
ਹਾਲਾਂਕਿ ਥਰਡ ਪਾਰਟੀ ਨੂੰ 25,000 ਰੁਪਏ ਪ੍ਰਤੀ ਦਿਨ ਦੀ ਸੀਮਾ ਤੱਕ ਲੈਣ-ਦੇਣ ਕਰਨ ਦੀ ਆਗਿਆ ਹੋਵੇਗੀ। ਜਦਕਿ ਪ੍ਰਤੀ ਟ੍ਰਾਂਜੈਕਸ਼ਨ 'ਤੇ 150 ਰੁਪਏ ਵਸੂਲੇ ਜਾਣਗੇ। ਇਸੇ ਤਰ੍ਹਾਂ ਇਕ ਮਹੀਨੇ ਵਿਚ ਏਟੀਐਮ ਤੋਂ ਨਕਦੀ ਲੈਣ-ਦੇਣ ਦੀ ਸੀਮਾ 5 ਨਿਰਧਾਰਤ ਕੀਤੀ ਗਈ ਹੈ। ਭਾਵ ਤੁਸੀਂ ਏਟੀਐਮ ਮਸ਼ੀਨ ਤੋਂ ਮਹੀਨੇ ਵਿਚ ਸਿਰਫ 5 ਵਾਰ ਨਕਦ ਲੈਣ-ਦੇਣ ਕਰ ਸਕਦੇ ਹੋ। ਇਸ ਤੋਂ ਬਾਅਦ ਪ੍ਰਤੀ ਟ੍ਰਾਂਜੈਕਸ਼ਨ 'ਤੇ 20 ਰੁਪਏ ਦੇਣੇ ਪੈਣਗੇ।