ਜਨਤਕ ਖੇਤਰ ਦੀ ਦੂਜੀ ਸਭ ਤੋਂ ਵੱਡੀ ਤੇਲ ਅਤੇ ਗੈਸ ਉਤਪਾਦਕ ਕੰਪਨੀ ਆਇਲ ਇੰਡੀਆ ਲਿਮਟਡ ਨੂੰ ਚਾਲੂ ਵਿੱਤੀ ਵਰ੍ਹੇ ਦੀ ਪਹਿਲੀ ਤਿਮਾਹੀ ਵਿਚ 248.61 ਕਰੋੜ ਦਾ ਘਾਟਾ ਹੋਇਆ ਹੈ।
ਨਵੀਂ ਦਿੱਲੀ: ਜਨਤਕ ਖੇਤਰ ਦੀ ਦੂਜੀ ਸਭ ਤੋਂ ਵੱਡੀ ਤੇਲ ਅਤੇ ਗੈਸ ਉਤਪਾਦਕ ਕੰਪਨੀ ਆਇਲ ਇੰਡੀਆ ਲਿਮਟਡ ਨੂੰ ਚਾਲੂ ਵਿੱਤੀ ਵਰ੍ਹੇ ਦੀ ਪਹਿਲੀ ਤਿਮਾਹੀ ਵਿਚ 248.61 ਕਰੋੜ ਦਾ ਘਾਟਾ ਹੋਇਆ ਹੈ। ਕੱਚੇ ਤੇਲ ਦੀਆਂ ਕੀਮਤਾਂ ਉਤਪਾਦਨ ਲਾਗਤ ਤੋਂ ਹੇਠਾਂ ਆਉਣ ਕਾਰਨ ਕੰਪਨੀ ਨੂੰ ਘਾਟੇ ਦਾ ਸਾਹਮਣਾ ਕਰਨਾ ਪਿਆ ਹੈ। ਕੰਪਨੀ ਦੇ ਇਤਿਹਾਸ ਵਿਚ ਇਹ ਦੂਜਾ ਮੌਕਾ ਹੈ ਜਦੋਂ ਉਸ ਨੂੰ ਤਿਮਾਹੀ ਦੌਰਾਨ ਘਾਟਾ ਹੋਇਆ ਹੈ।
Oil
ਇਸ ਤੋਂ ਪਹਿਲੇ ਵਿੱਤੀ ਸਾਲ ਦੀ ਸਮਾਨ ਤਿਮਾਹੀ ਦੌਰਾਨ ਕੰਪਨੀ ਨੂੰ 624.80 ਕਰੋੜ ਦਾ ਲਾਭ ਹੋਇਆ ਸੀ। ਆਇਲ ਇੰਡੀਆ ਦੇ ਡਾਇਰੈਕਟਰ ਵਿੱਤ ਹਰੀਸ਼ ਮਾਧਵ ਨੇ ਸ਼ਨੀਵਾਰ ਨੂੰ ਦੱਸਿਆ ਕਿ ‘ਆਇਲ ਇੰਡੀਆ ਦੇ ਇਤਿਹਾਸ ਵਿਚ ਇਹ ਦੂਜਾ ਮੌਕਾ ਹੈ ਜਦੋਂ ਸਾਨੂੰ ਕਿਸੇ ਤਿਮਾਹੀ ਵਿਚ ਨੁਕਸਾਨ ਹੋਇਆ ਹੈ। ਇਸ ਤੋਂ ਪਹਿਲਾਂ 2018-19 ਵਿਚ ਕੰਪਨੀ ਨੂੰ ਤਿਮਾਹੀ ਘਾਟਾ ਹੋਇਆ ਸੀ’।
Oil India Limited
ਉਹਨਾਂ ਨੇ ਕਿਹਾ ਕਿ ਇਸ ਘਾਟੇ ਦਾ ਮੁੱਖ ਕਾਰਨ ਕੀਮਤਾਂ ਵਿਚ ਗਿਰਾਵਟ ਹੈ। ਇਸ ਦੌਰਾਨ ਕੰਪਨੀ ਨੂੰ ਪ੍ਰਤੀ ਬੈਰਲ ਤੇਲ ਦੇ ਉਤਪਾਦਨ ‘ਤੇ 30.43 ਡਾਲਰ ਦੀ ਕੀਮਤ ਦੀ ਪ੍ਰਾਪਤੀ ਹੋਈ। ਉੱਥੇ ਹੀ ਇਕ ਸਾਲ ਪਹਿਲਾਂ ਸਮਾਨ ਤਿਮਾਹੀ ਵਿਚ ਕੰਪਨੀ ਨੂੰ ਪ੍ਰਤੀ ਬੈਰਲ ਉਤਪਾਦਨ ‘ਤੇ 66.33 ਡਾਲਰ ਪ੍ਰਾਪਤ ਹੋਏ ਸਨ। ਮਾਧਵ ਨੇ ਕਿਹਾ ਕਿ ਉਹਨਾਂ ਦੀ ਉਤਪਾਦਨ ਲਾਗਤ 32-33 ਡਾਲਰ ਪ੍ਰਤੀ ਬੈਰਲ ਤੱਕ ਹੁੰਦੀ ਹੈ।
Oil India
ਕੱਚੇ ਤੇਲ ਦੀਆਂ ਕੀਮਤਾਂ ਵਿਚ ਗਿਰਾਵਟ ਪਹਿਲੀ ਤਿਮਾਹੀ ਵਿਚ ਘਾਟੇ ਦਾ ਮੁੱਖ ਕਾਰਨ ਹੈ। ਆਇਲ ਇੰਡੀਆ ਨੇ ਅਪ੍ਰੈਲ-ਜੂਨ ਦੀ ਤਿਮਾਹੀ ਵਿਚ 7.5 ਲੱਖ ਟਨ ਕੱਚੇ ਤੇਲ ਦਾ ਉਤਪਾਦਨ ਕੀਤਾ। ਇਕ ਸਾਲ ਪਹਿਲਾਂ ਸਮਾਨ ਤਿਮਾਹੀ ਵਿਚ ਕੰਪਨੀ ਦਾ ਕੱਚੇ ਤੇਲ ਦਾ ਉਤਪਾਦਨ 8.1 ਲੱਖ ਟਨ ਰਿਹਾ ਸੀ। ਇਸੇ ਤਰ੍ਹਾਂ ਕੰਪਨੀ ਦਾ ਕੁਦਰਤੀ ਗੈਸ ਦਾ ਉਤਪਾਦਨ ਵੀ ਘਟ ਕੇ 68 ਕਰੋੜ ਕਿਊਬਿਕ ਮੀਟਰ ਰਹਿ ਗਿਆ, ਜੋ 2019-20 ਦੀ ਪਹਿਲੀ ਤਿਮਾਹੀ ਵਿਚ 71 ਕਰੋੜ ਕਿਊਬਿਕ ਮੀਟਰ ਰਿਹਾ ਸੀ।
