ਫਰਵਰੀ 2004 ਨੂੰ ਹੋਈ ਸੀ ਨਾਬਾਲਗ ਅਤੇ ਹਰਬੰਸ ਸਿੰਘ ਨਾਂਅ ਦੇ ਵਿਅਕਤੀ ਦੀ ਗ੍ਰਿਫ਼ਤਾਰੀ
Haryana News: ਕਬੂਤਰਬਾਜ਼ੀ ਦੇ ਮਾਮਲੇ ਵਿਚ 18 ਸਾਲਾਂ ਤੋਂ ਫਰਾਰ ਇਕ ਏਜੰਟ ਨੂੰ ਏਅਰਪੋਰਟ ਪੁਲਿਸ ਨੇ ਗ੍ਰਿਫ਼ਤਾਰ ਕੀਤਾ ਹੈ। ਮੁਲਜ਼ਮ ਦੀ ਪਛਾਣ ਸਵਰਨ ਸਿੰਘ ਵਜੋਂ ਹੋਈ ਹੈ। ਅਦਾਲਤ ਨੇ ਉਸ ਨੂੰ ਭਗੌੜਾ ਕਰਾਰ ਦਿਤਾ ਸੀ।
ਡੀਸੀਪੀ ਊਸ਼ਾ ਰੰਗਨਾਨੀ ਨੇ ਦਸਿਆ ਕਿ 24 ਫਰਵਰੀ 2004 ਨੂੰ ਹਰਬੰਸ ਸਿੰਘ ਨਾਂ ਦੇ ਯਾਤਰੀ ਨੂੰ ਏਅਰਪੋਰਟ ਤੋਂ ਨਾਬਾਲਗ ਨਾਲ ਫੜਿਆ ਗਿਆ ਸੀ। ਉਹ ਅਮਰੀਕਾ ਜਾਣ ਦੀ ਤਿਆਰੀ ਵਿਚ ਸਨ। ਨਾਬਾਲਗ ਦੇ ਕੋਲ ਮੌਜੂਦ ਪਾਸਪੋਰਟ ਅਤੇ ਗ੍ਰੀਨ ਕਾਰਡ ਵਿਚ ਲੱਗੀ ਫੋਟੋ ਉਸ ਨਾਲ ਵੱਖਰੀ ਸੀ। ਉਸ ਦੇ ਉਂਗਲਾਂ ਦੇ ਨਿਸ਼ਾਨ ਵੀ ਵੱਖਰੇ ਸਨ। ਪੁੱਛਗਿੱਛ ਦੌਰਾਨ ਨਾਬਾਲਗ ਨੇ ਦਸਿਆ ਕਿ ਹਰਬੰਸ ਉਸ ਨੂੰ ਕਿਸੇ ਹੋਰ ਸ਼ਨਾਖਤ ਤਹਿਤ ਅਮਰੀਕਾ ਲਿਜਾ ਰਿਹਾ ਸੀ। ਸਵਰਨ ਸਿੰਘ ਦੇ ਕਹਿਣ 'ਤੇ ਉਹ ਉਸ ਨੂੰ ਲੈ ਕੇ ਜਾ ਰਿਹਾ ਸੀ।
ਇਸ ਕਾਰਨ ਹਰਬੰਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਇਸ ਦੇ ਨਾਲ ਹੀ ਨਾਬਾਲਗ ਨੂੰ ਵੀ ਫੜ ਲਿਆ ਗਿਆ। ਉਦੋਂ ਤੋਂ ਸਵਰਨ ਸਿੰਘ ਫਰਾਰ ਸੀ। ਅਦਾਲਤ ਨੇ ਉਸ ਨੂੰ 2004 ਵਿਚ ਹੀ ਭਗੌੜਾ ਕਰਾਰ ਦਿਤਾ ਸੀ, ਜਿਸ ਮਗਰੋਂ ਉਹ ਅੰਡਰਗ੍ਰਾਊਂਡ ਹੋ ਗਿਆ। ਹਾਲ ਹੀ 'ਚ ਪੁਲਿਸ ਟੀਮ ਨੂੰ ਸੂਚਨਾ ਮਿਲੀ ਕਿ ਉਹ ਕੁਰੂਕਸ਼ੇਤਰ 'ਚ ਹੈ। ਇਸ ਸੂਚਨਾ 'ਤੇ ਏ.ਸੀ.ਪੀ. ਚੰਦਰਸ਼ੇਖਰ ਦੀ ਅਗਵਾਈ 'ਚ ਐੱਸਐੱਚਓ ਯਸ਼ਪਾਲ ਸਿੰਘ ਦੀ ਟੀਮ ਨੇ ਛਾਪਾ ਮਾਰ ਕੇ ਉਸ ਨੂੰ ਕਾਬੂ ਕਰ ਲਿਆ। ਪੁੱਛਗਿੱਛ ਦੌਰਾਨ ਉਸ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ ਖੇਤੀ ਕਰਦਾ ਹੈ। ਉਸ ਨੇ ਜਲਦੀ ਪੈਸੇ ਕਮਾਉਣ ਲਈ ਧੋਖਾਧੜੀ ਕੀਤੀ ਸੀ।
(For more Punjabi news apart from Proclaimed offender captured in Kurukshetra after 18 years, stay tuned to Rozana Spokesman)
