ਜੀਐਲ ਸਿੰਘਲ ਨੂੰ ਗਾਂਧੀ ਨਗਰ ਦੇ ਕਮਾਂਡੋ ਸਿਖਲਾਈ ਕੇਂਦਰ ਦੇ ਡਿਪਟੀ ਇੰਸਪੈਕਟਰ ਜਨਰਲ ਦੇ ਅਹੁਦੇ ਤੋਂ ਤਰੱਕੀ ਦੇ ਕੇ ਇੰਸਪੈਕਟਰ ਜਨਰਲ ਦਾ ਰੈਂਕ ਦਿਤਾ ਗਿਆ ਹੈ।
ਅਹਿਮਦਾਬਾਦ : ਗੁਜਰਾਤ ਸਰਕਾਰ ਨੇ ਇਸ਼ਰਤ ਜਹਾਂ ਕਥਿਤ ਫਰਜ਼ੀ ਮੁਠਭੇੜ ਮਾਮਲੇ ਵਿਚ ਦੋਸ਼ੀ ਅਧਿਕਾਰੀ ਜੀਐਲ ਸਿੰਘਲ ਅਤੇ ਸੋਹਰਾਬੂਦੀਨ ਸ਼ੇਖ ਮਾਮਲੇ ਵਿਚ ਬਰੀ ਹੋਏ ਹੋਰਨਾਂ 6 ਅਧਿਕਾਰੀਆਂ ਸਮੇਤ 6 ਆਈਪੈਐਸ ਅਧਿਕਾਰੀਆਂ ਦੀ ਤਰੱਕੀ ਕਰ ਦਿਤੀ। ਸੀਬੀਆਈ ਨੇ 7 ਆਈਪੀਐਸ ਅਧਿਕਾਰੀਆਂ ਵਿਰੁਧ ਇਸ਼ਰਤ ਜਹਾਂ ਮਾਮਲੇ ਵਿਚ ਦੋਸ਼ ਪੱਤਰ ਦਾਖਲ ਕੀਤਾ ਸੀ ਜਿਹਨਾਂ ਵਿਚ ਸ਼ਾਮਲ ਜੀਐਲ ਸਿੰਘਲ ਨੂੰ ਗਾਂਧੀ ਨਗਰ ਦੇ ਕਮਾਂਡੋ ਸਿਖਲਾਈ ਕੇਂਦਰ ਦੇ ਡਿਪਟੀ ਇੰਸਪੈਕਟਰ ਜਨਰਲ ਦੇ ਅਹੁਦੇ ਤੋਂ ਤਰੱਕੀ ਦੇ ਕੇ ਇੰਸਪੈਕਟਰ ਜਨਰਲ ਦਾ ਰੈਂਕ ਦਿਤਾ ਗਿਆ ਹੈ।
ਸੋਹਰਾਬੂਦੀਨ ਸ਼ੇਖ ਦੀ ਕਥਿਤ ਫਰਜ਼ੀ ਮੁਠਭੇੜ ਮਾਮਲੇ ਵਿਚ ਬੰਬੇ ਹਾਈ ਕੋਰਟ ਵੱਲੋਂ ਦੋਸ਼ ਮੁਕਤ ਕੀਤੇ ਗਏ ਵਿਪੁਲ ਅਗਰਵਾਲ ਨੂੰ ਅਹਿਮਦਾਬਾਦ ਵਿਚ ਪੁਲਿਸ ਦੇ ਸੰਯੁਕਤ ਕਮਿਸ਼ਨਰ ( ਪ੍ਰਸ਼ਾਸਨ ) ਦੇ ਅਹੁਦੇ ਤੋਂ ਤਰੱਕੀ ਦਿਤੀ ਗਈ ਹੈ। ਸਿੰਘਲ 2001 ਬੈਚ ਦੇ ਆਈਪੀਐਸ ਅਧਿਕਾਰੀ ਹਨ। ਇਸ਼ਰਤ ਜਹਾਂ ਇੰਨਕਾਉਂਟਰ ਮਾਮਲੇ ਵਿਚ ਉਹਨਾਂ ਨੂੰ ਸੀਬੀਆਈ ਨੇ 2013 ਵਿਚ ਗ੍ਰਿਫਤਾਰ ਕੀਤਾ ਸੀ। ਸੀਬੀਆਈ ਵੱਲੋਂ ਨਿਰਧਾਰਤ ਸਮੇਂ ਵਿਚ ਦੋਸ਼ ਪੱਤਰ ਦਾਖਲ ਨਹੀਂ ਕੀਤੇ ਜਾਣ ਕਾਰਨ ਉਹਨਾਂ ਨੂੰ ਕੋਰਟ ਨੇ ਜਮਾਨਤ ਦੇ ਦਿਤੀ ਸੀ।
15 ਜੂਨ 2004 ਨੂੰ ਅਹਿਮਦਾਬਾਦ ਵਿਚ ਹੋਏ ਇਕ ਪੁਲਿਸ ਇੰਨਕਾਉਂਟਰ ਵਿਚ ਇਸ਼ਰਤ ਜਹਾਂ, ਜਾਵੇਦ ਸ਼ੇਖ, ਅਮਜ਼ਦ ਰਾਣਾ ਅਤੇ ਜੌਸ਼ੀਨ ਜ਼ੌਹਰ ਨਾਮ ਦੇ ਚਾਰ ਲੋਕਾਂ ਦੀ ਮੌਤ ਹੋਈ ਸੀ। ਪੁਲਿਸ ਦੇ ਨਾਲ-ਨਾਲ ਖੁਫੀਆ ਏਜੰਸੀਆਂ ਨੇ ਦਾਅਵਾ ਕੀਤਾ ਕਿ ਇਹ ਚਾਰੋ ਲਸ਼ਕਰ-ਏ-ਤਾਈਬਾ ਦੇ ਅਤਿਵਾਦੀ ਸਨ ਅਤੇ ਉਹਨਾਂ ਦੀ ਯੋਜਨਾ ਗੁਜਰਾਤ ਦੇ ਉਸ ਵੇਲ੍ਹੇ ਦੇ ਮੁੱਖ ਮੰਤਰੀ ਨਰਿੰਦਰ ਮੋਦੀ ਦਾ ਕਤਲ ਕਰਨਾ ਸੀ। ਸੀਬੀਆਈ ਮੁਤਾਬਕ ਗੁਜਰਾਤ ਦੇ ਅਤਿਵਾਦੀ ਵਿਰੋਧੀ ਦਸਤੇ ਨੇ ਸੋਹਰਾਬੂਦੀਨ ਸ਼ੇਖ ਅਤੇ ਉਸ ਦੀ ਪਤਨੀ ਕੌਸਰ ਬੀ ਨੂੰ ਉਸ ਵੇਲ੍ਹੇ ਅਗਵਾ ਕਰ ਲਿਆ ਸੀ,
ਜਦ ਉਹ ਹੈਦਰਾਬਾਦ ਤੋਂ ਮਹਾਰਾਸ਼ਟਰਾ ਦੇ ਸਾਂਗਲੀ ਜਾ ਰਹੇ ਸਨ। ਇਹ ਦਾਅਵਾ ਕੀਤਾ ਗਿਆ ਕਿ ਉਸ ਦੇ ਪਾਕਿਸਤਾਨ ਦੇ ਅਤਿਵਾਦੀ ਸੰਗਠਨ ਲਸ਼ਕਰ-ਏ-ਤਾਈਬਾ ਦੇ ਨਾਲ ਸਬੰਧ ਸਨ। ਇਸ ਤੋਂ ਬਾਅਦ ਸ਼ੇਖ ਦੇ ਸਹਿਯੋਗੀ ਤੁਲਸੀਰਾਮ ਪ੍ਰਜਾਪਤੀ ਦਾ ਵੀ ਇੰਨਕਾਉਂਟਰ ਹੋਇਆ ਸੀ। ਅਮਿਤ ਸ਼ਾਹ ਉਸ ਵੇਲ੍ਹੇ ਗੁਜਰਾਤ ਦੇ ਗ੍ਰਹਿ ਰਾਜ ਮੰਤਰੀ ਸਨ। ਉਹਨਾਂ ਤੇ ਦੋਹਾਂ ਘਟਨਾਵਾਂ ਵਿਚ ਹੀ ਸ਼ਾਮਲ ਹੋਣ ਦਾ ਦੋਸ਼ ਲਗਾ ਸੀ। ਬੀਤੇ ਦਿਨੀ ਮੁੰਬਈ ਦੀ ਵਿਸ਼ੇਸ਼ ਅਦਾਲਤ ਨੇ ਇਸ ਮਾਮਲੇ ਦੇ ਸਾਰੇ 22 ਦੋਸ਼ੀਆਂ ਨੂੰ ਬਰੀ ਕਰ ਦਿਤਾ ਸੀ।