ਜਦੋਂ ਉਹ ਵਿਅਕਤੀ ਸ਼ਾਰਜਾਹ ਏਅਰਪੋਰਟ ਤੇ ਪਹੁੰਚਿਆ ਤਾਂ ਉਸ ਦਾ ਪਾਸਪੋਰਟ ਜ਼ਬਤ ਕਰ ਲਿਆ ਗਿਆ
ਨਵੀਂ ਦਿੱਲੀ: ਕਦੇ-ਕਦੇ ਚੋਰੀ ਦੀਆਂ ਅਜਿਹੀਆਂ ਖਬਰਾਂ ਆਉਂਦੀਆਂ ਹਨ ਕਿ ਲੋਕ ਹੈਰਾਨ ਰਹਿ ਜਾਂਦੇ ਹਨ। ਅਜਿਹਾ ਹੀ ਇਕ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਵਿਚ ਅਫਰੀਕੀ ਵਿਅਕਤੀ ਅਪਣੇ ਪੇਟ ਵਿਚ 297 ਗ੍ਰਾਮ ਦਾ ਹੀਰਾ ਲੈ ਕੇ ਜਾ ਰਿਹਾ ਸੀ। ਪੁਲਿਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਘਟਨਾ ਸੰਯੁਕਤ ਅਰਬ ਅਮੀਰਾਤ ਦੀ ਹੈ। ਇਕ ਮੀਡੀਆ ਰਿਪੋਰਟ ਮੁਤਾਬਕ ਫੈਡਰਲ ਕਸਟਮਸ ਅਥਾਰਿਟੀ ਨੇ ਜਾਣਕਾਰੀ ਦਿੱਤੀ ਕਿ ਕੁੱਝ ਦਿਨ ਪਹਿਲਾਂ ਇਕ ਸੂਚਨਾ ਮਿਲੀ ਕਿ ਇਕ ਅਫਰੀਕੀ ਵਿਅਕਤੀ ਕੁੱਝ ਕੱਚੇ ਹੀਰੇ ਲਿਆ ਸਕਦਾ ਹੈ।
ਜਦੋਂ ਉਹ ਵਿਅਕਤੀ ਸ਼ਾਰਜਾਹ ਏਅਰਪੋਰਟ ਤੇ ਪਹੁੰਚਿਆ ਤਾਂ ਉਸ ਦਾ ਪਾਸਪੋਰਟ ਜ਼ਬਤ ਕਰ ਲਿਆ ਗਿਆ ਅਤੇ ਉਸ ਦੇ ਬੈਗ ਦੀ ਤਲਾਸ਼ੀ ਲਈ ਗਈ ਅਤੇ ਫਿਰ ਐਕਸ-ਰੇ ਹੋਇਆ। ਉਸ ਦਾ ਇਸ ਤੋਂ ਬਾਅਦ ਜੋ ਹੋਇਆ ਉਸ ਨੂੰ ਦੇਖ ਕੇ ਅਧਿਕਾਰੀਆਂ ਦੇ ਹੋਸ਼ ਉੱਡ ਗਏ। ਐਕਸ-ਰੇ ਕਰਨ ਤੋਂ ਬਾਅਦ ਅਧਿਕਾਰੀਆਂ ਨੂੰ ਪਤਾ ਲੱਗਿਆ ਕਿ ਯਾਤਰੀ ਨੇ 297 ਗ੍ਰਾਮ ਕੱਚੇ ਹੀਰੇ ਖਾ ਲਏ ਸਨ ਜਿਹਨਾਂ ਦੀ ਕੀਮਤ ਲਗਭਗ 90,000 ਡਾਲਰ ਸੀ।
ਰਿਪੋਰਟ ਮੁਤਾਬਕ ਉਸ ਵਿਅਕਤੀ ਨੇ ਹੀਰੇ ਲਈ ਯੂਏਈ ਵਿਚ ਖਰੀਦਦਾਰਾਂ ਦੀ ਤਲਾਸ਼ ਵੀ ਕਰ ਲਈ ਸੀ। ਫਿਲਹਾਲ ਉਹਨਾਂ ਤੋਂ ਪੁੱਛਗਿਛ ਕੀਤੀ ਜਾ ਰਹੀ ਹੈ। ਅਜਿਹਾ ਹੀ ਇਕ ਹੋਰ ਮਾਮਲਾ ਸਾਹਮਣੇ ਆਇਆ ਸੀ ਜਿਸ ਵਿਚ ਵਿਅਕਤੀਆਂ ਵੱਲੋਂ ਨਹੀਂ ਬਲਕਿ ਚੂਹਿਆਂ ਵੱਲੋਂ ਚੋਰੀ ਕੀਤੀ ਗਈ। ਇਹ ਕੋਈ ਅਫਵਾਹ ਨਹੀਂ ਬਲਕਿ ਸੱਚ ਹੈ। ਇਹ ਘਟਨਾ ਹੈ ਬਿਹਾਰ ‘ਚ ਪੈਂਦੇ ਪਟਨਾ ਸਾਹਿਬ ਦੀ ਜਿੱਥੇ ਕੁਝ ਚੂਹਿਆਂ ਵੱਲੋਂ ਬੇਸ਼ਕਿਮਤੀ ਹੀਰੇ ਚੋਰੀ ਕੀਤੇ ਜਾਣ ਦੀ ਗੱਲ ਸਾਹਮਣੇ ਆਈ ਹੈ।
ਜਾਣਕਾਰੀ ਮੁਤਾਬਿਕ ਪਟਨਾ ਸਾਹਿਬ ‘ਚ ਇੱਕ ਸੁਨਿਆਰੇ ਦੀ ਦੁਕਾਨ ‘ਚ ਉਸ ਵੇਲੇ ਭੜਥੂ ਪੈ ਗਿਆ ਜਦੋਂ ਉਸ ਦੇ ਅਥਾਹ ਕੀਮਤੀ ਹੀਰੇ ਗਾਇਬ ਹੋ ਗਏ। ਇਸ ਸਬੰਧੀ ਪਹਿਲਾਂ ਤਾਂ ਦੁਕਾਨ ਮਾਲਕ ਵੱਲੋਂ ਆਪਣੇ ਹੀ ਕਰਮਚਾਰੀਆਂ ‘ਤੇ ਸ਼ੱਕ ਜ਼ਾਹਰ ਕੀਤਾ ਪਰ ਜਦੋਂ ਇਸ ਸਬੰਧੀ ਜਾਂਚ ਕੀਤੀ ਗਈ ਤਾਂ ਉਹ ਨਿਰਦੋਸ਼ ਸਾਬਤ ਹੋਏ। ਇਸ ਤੋਂ ਬਾਅਦ ਜਦੋਂ ਇਸ ਦੁਕਾਨ ‘ਚ ਲੱਗੇ ਕੈਮਰਿਆਂ ਦੀ ਫੂਟੇਜ਼ ਦੇਖੀ ਗਈ ਤਾਂ ਦੇਖਣ ਵਾਲੇ ਸਾਰੇ ਹੱਕੇ-ਬੱਕੇ ਰਹਿ ਗਏ ਕਿ ਹੀਰੇ ਕਿਸੇ ਇਨਸਾਨ ਵੱਲੋਂ ਚੋਰੀ ਨਹੀਂ ਕੀਤੇ ਗਏ ਬਲਕਿ ਇੱਕ ਚੂਹੇ ਵੱਲੋਂ ਚੋਰੀ ਕੀਤੇ ਗਏ ਸਨ ਤੇ ਇਹ ਚੂਹਾ ਹੀਰਿਆਂ ਦਾ ਪੈਕਟ ਮੂੰਹ ਰਾਹੀਂ ਫੜ੍ਹ ਕੇ ਕਿਸੇ ਛੱਤ ਵਾਲੀ ਸੀਲਿੰਗ ‘ਚ ਜਾ ਛੁਪਿਆ ਹੈ ਜਿਸ ਕਾਰਨ ਹੁਣ ਹੀਰੇ ਲੱਭਣ ‘ਚ ਕਾਫੀ ਪ੍ਰੇਸ਼ਾਨੀ ਆ ਰਹੀ ਹੈ।
ਦੱਸ ਦਈਏ ਕਿ ਬਿਹਾਰ ‘ਚ ਚੂਹਿਆਂ ਵੱਲੋਂ ਵਾਪਰੀ ਇਹ ਕੋਈ ਪਹਿਲੀ ਘਟਨਾ ਨਹੀਂ ਬਲਕਿ ਇਸ ਤੋਂ ਪਹਿਲੀ ਵੀ ਕਈ ਵਾਰ ਚੂਹਿਆਂ ਦੀਆਂ ਬਿਹਾਰ ‘ਚ ਕਈ ਘਟਨਾਵਾਂ ਜਿਵੇਂ ਕਿ ਚੂਹਿਆਂ ਵੱਲੋਂ ਸਰਕਾਰੀ ਸ਼ਰਾਬ ਪੀਤੇ ਜਾਣਾ ਜਾਂ ਫਿਰ ਪਾਣੀ ਦਾ ਕੋਈ ਬੰਨ੍ਹ ‘ਚ ਖੁੱਡਾਂ ਬਣਾ ਕੇ ਤੋੜ ਦੇਣਾ ਤੇ ਹੜ੍ਹ ਲਿਆਉਣਾ ਆਦਿ ਸਾਹਮਣੇ ਆਉਂਦੀਆਂ ਹੀ ਰਹਿੰਦੀਆਂ ਨੇ। ਤੇ ਹੁਣ ਤਾਂ ਹੱਦ ਹੀ ਹੋ ਗਈ ਕਿ ਬਿਹਾਰ ਦੇ ਪਟਨਾ ਸਾਹਿਬ ‘ਚ ਚੂਹਿਆਂ ਵੱਲੋਂ ਚੋਰੀ ਵੀ ਕੀਤੀ ਗਈ ਸੀ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।