ਲਗਾਤਾਰ ਸੰਘਰਸ਼ ਤੇ ਸੇਵਾ ‘ਚ ਯੋਗਦਾਨ ਪਾ ਰਹੇ ਰਣਜੀਤ ਬਾਵਾ
ਨਵੀਂ ਦਿੱਲੀ (ਅਰਪਨ ਕੌਰ): ਦਿੱਲੀ ਵਿਚ ਕਿਸਾਨਾਂ ਦਾ ਸੰਘਰਸ਼ ਤੇ ਸੇਵਾ ਦੋਵੇਂ ਜਾਰੀ ਹਨ। ਇਸ ਵਿਚ ਹਰ ਕੋਈ ਵਧ ਚੜ ਕੇ ਅਪਣਾ ਸਹਿਯੋਗ ਦੇ ਰਿਹਾ ਹੈ। ਇਸ ਦੇ ਚਲਦਿਆਂ ਪੰਜਾਬੀਆਂ ਦਾ ਬਾਵਾ ਰਣਜੀਤ ਬਾਵਾ ਵੀ ਕਿਸਾਨੀ ਮੋਰਚੇ ਵਿਚ ਸੇਵਾ ਕਰਨ ਪਹੁੰਚ ਰਹੇ ਹਨ। ਖ਼ਾਲਸਾ ਏਡ ਵੱਲੋਂ ਕੀਤੀ ਜਾ ਰਹੀ ਸੇਵਾ ਵਿਚ ਯੋਗਦਾਨ ਪਾਉਣ ਪਹੁੰਚੇ ਰਣਜੀਤ ਬਾਵਾ ਨੇ ਕਿਹਾ ਕਿ ਉਹਨਾਂ ਨੂੰ ਦਿੱਲੀ ਪਹੁੰਚ ਕੇ ਬਹੁਤ ਸਕੂਨ ਮਿਲ ਰਿਹਾ ਹੈ।
Ranjit Bawa at Farmer Protest
ਖਾਲਸਾ ਏਡ ਵੱਲੋਂ ਕੀਤੀ ਜਾ ਰਹੀ ਸੇਵਾ ਬਹੁਤ ਵੱਡੀ ਹੈ। ਉਹਨਾਂ ਕਿਹਾ ਕਿ ਉਹ ਇੱਥੇ ਤਿੰਨ ਵਾਰ ਆ ਚੁੱਕੇ ਹਨ ਕਿਉਂਕਿ ਕੰਮ ਹੋਣ ਦੇ ਬਾਵਜੂਦ ਵੀ ਉਹਨਾਂ ਦਾ ਪੰਜਾਬ ਮਨ ਨਹੀਂ ਲੱਗ ਰਿਹਾ, ਹਮੇਸ਼ਾਂ ਅਪਣੇ ਲੋਕਾਂ ਲਈ ਉਹਨਾਂ ਦਾ ਦਿਲ ਧੜਕ ਰਿਹਾ ਹੈ। ਰਣਜੀਤ ਬਾਵਾ ਨੇ ਕਿਹਾ ਕਿ ਪ੍ਰਮਾਤਮਾ ਦੀ ਕਿਰਪਾ ਹੈ ਕਿ ਉਹਨਾਂ ਨੂੰ ਇਹ ਸੇਵਾ ਮਿਲੀ।
Ranjit Bawa at Farmer Protest
ਸੰਘਰਸ਼ ਦੇ ਭਵਿੱਖ ਬਾਰੇ ਬੋਲਦਿਆਂ ਬਾਵੇ ਨੇ ਕਿਹਾ ਕਿ ਦੋ ਢਾਈ ਮਹੀਨਿਆਂ ਦੇ ਸੰਘਰਸ਼ ਤੋਂ ਬਾਅਦ ਦਿੱਲੀ ਪਹੁੰਚ ਚੁੱਕੇ ਹਾਂ ਤੇ ਅਗਲਾ ਬੰਨਾ ਬਹੁਤ ਨੇੜੇ ਹੈ। ਜਦੋਂ ਆਗੂ ਮਜ਼ਬੂਤ ਹੋਣ ਤਾਂ ਸੰਘਰਸ਼ ਹਮੇਸ਼ਾਂ ਕਾਮਯਾਬ ਹੁੰਦੇ ਹਨ। ਲੋਕ ਵੀ ਤਨੋਂ ਮਨੋਂ ਪੰਜਾਬ ਦੀ ਹੋਂਦ ਬਚਾਉਣ ਲਈ ਲੱਗੇ ਹੋਏ ਹਨ।
Ranjit Bawa at Farmer Protest
ਰਾਸ਼ਟਰੀ ਮੀਡੀਆ ‘ਤੇ ਬੋਲਦਿਆਂ ਕਿਹਾ ਕਿ ਨੈਸ਼ਨਲ ਮੀਡੀਆ ਨੇ ਘਟੀਆ ਪੱਧਰ ‘ਤੇ ਕੰਮ ਕੀਤਾ। ਸੱਚਾਈ ਤੇ ਪੰਜਾਬ ਪੱਖੀ ਖਬਰਾਂ ਦੀ ਕਵਰੇਜ ਕਰਨ ਲਈ ਉਹਨਾਂ ਨੇ ਪੰਜਾਬੀ ਮੀਡੀਆ ਦਾ ਧੰਨਵਾਦ ਕੀਤਾ। ਉਹਨਾਂ ਕਿਹਾ ਕਿ ਹੁਣ ਲੋਕ ਜਾਗਰੂਕ ਹਨ ਤੇ ਇਹ ਲਹਿਰ ਵਿਸ਼ਵ ਪੱਧਰੀ ਲੋਕਾਂ ਦੀ ਲਹਿਰ ਬਣ ਚੁੱਕੀ ਹੈ। ਜਿੰਨਾ ਮਰਜ਼ੀ ਜ਼ੋਰ ਲਗਾ ਲਿਆ ਜਾਵੇ, ਲੋਕਾਂ ਨੂੰ ਗੁੰਮਰਾਹ ਨਹੀਂ ਕੀਤਾ ਜਾ ਸਕਦਾ।
Ranjit Bawa
ਕੰਗਨਾ ਰਣੌਤ ਬਾਰੇ ਗੱਲ ਕਰਦਿਆਂ ਰਣਜੀਤ ਬਾਵਾ ਨੇ ਕਿਹਾ ਕਿ ਸਾਨੂੰ ਇਸ ਤੋਂ ਕੋਈ ਫਰਕ ਨਹੀਂ ਪੈਂਦਾ ਕਿਉਂਕਿ ਇਹ ਸਾਡਾ ਮਸਲਾ ਨਹੀਂ ਹੈ। ਜਿਸ ਇਨਸਾਨ ਨੂੰ ਘਰੇ ਇੱਜ਼ਤ ਨਹੀਂ ਮਿਲਦੀ, ਉਸ ਨੂੰ ਬਾਹਰ ਵੀ ਨਹੀਂ ਮਿਲਦੀ। ਜੇਕਰ ਅਸੀਂ ਅਪਣੇ ਲੋਕਾਂ ਲਈ ਖੜਾਂਗੇ ਤਾਂ ਸਾਨੂੰ ਦੁਨੀਆਂ ‘ਚ ਹਰ ਪਾਸੇ ਮਾਣ ਮਿਲੇਗਾ। ਬਜ਼ੁਰਗਾਂ ਖਿਲਾਫ਼ ਗਲਤ ਸ਼ਬਦਾਵਲੀ ਵਰਤਣ ਲਈ ਉਹਨਾਂ ਨੇ ਕੰਗਨਾ ਦੀ ਨਿੰਦਾ ਕੀਤੀ।
Ranjit Bawa
ਉਹਨਾਂ ਕਿਹਾ ਕਿ ਆਉਣ ਵਾਲੇ ਸਮੇਂ ਵਿਚ ਇਸ ਤਰ੍ਹਾਂ ਦੇ ਲੋਕਾਂ ਨੂੰ ਪੰਜਾਬ ਵਿਚ ਨਹੀਂ ਵੜਨ ਦਿੱਤਾ ਜਾਵੇਗਾ, ਜੇ ਆ ਵੀ ਗਏ ਤਾਂ ਅਸੀਂ ਹਿਸਾਬ ਕਿਤਾਬ ਪੂਰਾ ਕਰ ਲਵਾਂਗੇ। ਗੁਰਦਾਸ ਮਾਨ ਬਾਰੇ ਗੱਲ ਕਰਦਿਆਂ ਰਣਜੀਤ ਬਾਵਾ ਨੇ ਕਿਹਾ ਕਿ ਉਹਨਾਂ ਨੇ ਇਕ-ਦੋ ਵਾਰ ਗੁਰਦਾਸ ਮਾਨ ਨਾਲ ਗੱਲ ਕੀਤੀ, ਉਹ ਬਹੁਤ ਟੁੱਟੇ ਹੋਏ ਸਨ।
Gurdas Maan
ਉਹਨਾਂ ਦਾ ਧੰਨਵਾਦ ਕਿ ਉਹਨਾਂ ਨੇ ਇੱਥੇ ਆਉਣ ਦਾ ਹੌਂਸਲਾ ਕੀਤਾ। ਮਾਨ ਸਾਹਬ ਇੱਥੇ ਚੱਲ ਕੇ ਆਏ ਬਹੁਤ ਚੰਗੀ ਗੱਲ ਹੈ। ਲੋਕਾਂ ਦੀ ਕਚਹਿਰੀ ਵਿਚ ਕੋਈ ਵੱਡਾ ਨਹੀਂ ਹੁੰਦਾ, ਲੋਕ ਹੀ ਵੱਡੇ ਨਹੀਂ ਹੁੰਦੇ। ਉਹਨਾਂ ਨੇ ਗੁਰਦਾਸ ਮਾਨ ਨੂੰ ਬੋਲਣ ਨਹੀਂ ਦਿੱਤਾ, ਇਹ ਉਹਨਾਂ ਦਾ ਨਜ਼ਰੀਆ ਹੈ। ਕਲਾਕਾਰ ਨੂੰ ਲੋਕਾਂ ਤੋਂ ਪਿੱਛੇ ਨਹੀਂ ਹਟਣਾ ਚਾਹੀਦਾ, ਉਹ ਕਦੀ ਨਾ ਕਦੀ ਜ਼ਰੂਰ ਮਾਫ ਕਰਨਗੇ।
Ranjit Bawa
ਰਣਜੀਤ ਬਾਵਾ ਨੇ ਕਿਹਾ ਕਿ ਇਹ ਬਹੁਤ ਚੰਗੀ ਗੱਲ ਹੈ ਕਿ ਇਸ ਸੰਘਰਸ਼ ਵਿਚ ਕੋਈ ਸਿਆਸੀ ਪਾਰਟੀ ਸ਼ਾਮਲ ਨਹੀਂ ਹੋਈ। ਸੰਘਰਸ਼ ਦੇ ਚਲਦਿਆਂ ਪੰਜਾਬ ਦੀ ਸਿਆਸਤ ਵੱਡੇ ਪੱਧਰ ‘ਤੇ ਬਦਲੇਗੀ। ਹੁਣ ਪੰਜਾਬ ਵਿਚ ਗਾਇਕੀ ਵੀ ਬਦਲ ਗਈ ਹੈ। ਹੁਣ ਲੋਕ ਵੀ ਇਸ ਗਾਇਕੀ ਨੂੰ ਪ੍ਰਵਾਨ ਕਰ ਰਹੇ ਹਨ ਤੇ ਪਿਆਰ ਦੇ ਰਹੇ ਹਨ। ਹੋਰ ਵੀ ਕਈ ਚੀਜ਼ਾਂ ‘ਚ ਬਦਲਾਅ ਆਵੇਗਾ।
