ਇਹ ਨੌਜਵਾਨ ਮੈਸੂਰ ਤੋਂ ਭਾਜਪਾ ਸੰਸਦ ਮੈਂਬਰ ਪ੍ਰਤਾਪ ਸਿਮਹਾ ਵਲੋਂ ਜਾਰੀ ਕੀਤੇ ਗਏ ਪਾਸ ਰਾਹੀਂ ਸਦਨ ਵਿਚ ਦਾਖਲ ਹੋਏ।
Parliament Security Breach: ਸੰਸਦ ਦੀ ਦਰਸ਼ਕ ਗੈਲਰੀ ਵਿਚ ਛਾਲ ਮਾਰਨ ਵਾਲੇ ਦੋ ਨੌਜਵਾਨਾਂ ਬਾਰੇ ਅਹਿਮ ਜਾਣਕਾਰੀ ਸਾਹਮਣੇ ਆਈ ਹੈ। ਮੀਡੀਆ ਰੀਪੋਰਟਾਂ ਮੁਤਾਬਕ ਇਕ ਨੌਜਵਾਨ ਦਾ ਨਾਂਅ ਸਾਗਰ ਸ਼ਰਮਾ ਹੈ ਜਦਕਿ ਦੂਜੇ ਦਾ ਨਾਂਅ ਮਨੋਰੰਜਨ ਹੈ। ਮਨੋਰੰਜਨ ਕੰਪਿਊਟਰ ਵਿਦਿਆਰਥੀ ਹੈ ਅਤੇ ਮੈਸੂਰ ਦਾ ਰਹਿਣ ਵਾਲਾ ਹੈ। ਇਸ ਦੌਰਾਨ ਸਾਗਰ ਦੇ ਪਾਸ ਦੀ ਤਸਵੀਰ ਵੀ ਸਾਹਮਣੇ ਆਈ ਹੈ, ਇਹ ਨੌਜਵਾਨ ਮੈਸੂਰ ਤੋਂ ਭਾਜਪਾ ਸੰਸਦ ਮੈਂਬਰ ਪ੍ਰਤਾਪ ਸਿਮਹਾ ਵਲੋਂ ਜਾਰੀ ਕੀਤੇ ਗਏ ਪਾਸ ਰਾਹੀਂ ਸਦਨ ਵਿਚ ਦਾਖਲ ਹੋਏ।
ਦੋਵਾਂ ਨੂੰ ਗ੍ਰਿਫਤਾਰ ਕਰਨ ਤੋਂ ਬਾਅਦ ਦਿੱਲੀ ਪੁਲਿਸ ਉਨ੍ਹਾਂ ਨੂੰ ਪਾਰਲੀਮੈਂਟ ਸਟਰੀਟ ਥਾਣੇ ਲੈ ਗਈ। ਸੁਰੱਖਿਆ 'ਚ ਢਿੱਲ ਦੀ ਸੂਚਨਾ ਮਿਲਦੇ ਹੀ ਦਿੱਲੀ ਪੁਲਿਸ ਕਮਿਸ਼ਨਰ ਸਜੇ ਅਰੋੜਾ ਸੰਸਦ ਭਵਨ ਪਹੁੰਚੇ। ਇਸ ਤੋਂ ਪਹਿਲਾਂ ਦਿੱਲੀ ਪੁਲਿਸ ਨੇ ਸੰਸਦ ਭਵਨ ਦੇ ਬਾਹਰੋਂ ਦੋ ਪ੍ਰਦਰਸ਼ਨਕਾਰੀਆਂ ਨੂੰ ਹਿਰਾਸਤ ਵਿਚ ਲਿਆ ਸੀ। ਇਨ੍ਹਾਂ ਵਿਚੋਂ ਇਕ ਨੀਲਮ ਨਾਂਅ ਦੀ ਔਰਤ ਹੈ, ਜਿਸ ਦੀ ਉਮਰ 42 ਸਾਲ ਹੈ। ਦੂਜੇ ਪ੍ਰਦਰਸ਼ਨਕਾਰੀ ਦੀ ਪਛਾਣ 25 ਸਾਲਾ ਅਮੋਲ ਸ਼ਿੰਦੇ ਵਜੋਂ ਹੋਈ ਹੈ। ਦੋਵਾਂ ਨੂੰ ਟਰਾਂਸਪੋਰਟ ਭਵਨ ਦੇ ਬਾਹਰੋਂ ਗ੍ਰਿਫ਼ਤਾਰ ਕੀਤਾ ਗਿਆ।
ਹਮਲੇ ਤੋਂ ਤੁਰੰਤ ਬਾਅਦ ਆਈਬੀ ਦੇ ਸੀਨੀਅਰ ਅਧਿਕਾਰੀਆਂ ਦੀ ਇਕ ਟੀਮ ਇਸ ਕੁਤਾਹੀ ਦੀ ਜਾਂਚ ਲਈ ਸੰਸਦ ਭਵਨ ਪਹੁੰਚੀ। ਸਬੂਤ ਇਕੱਠੇ ਕਰਨ ਲਈ ਆਈਬੀ ਤੋਂ ਇਲਾਵਾ ਐਫਐਸਐਲ ਦੀ ਟੀਮ ਵੀ ਸੰਸਦ ਪਹੁੰਚੀ ਹੈ। ਆਈਬੀ ਟੀਮ ਨੇ ਸਾਗਰ ਸ਼ਰਮਾ ਅਤੇ ਮਨਰੰਜਨ ਤੋਂ ਪੁਛਗਿਛ ਕੀਤੀ ਹੈ। ਇਹ ਦੋਵੇਂ ਸੰਸਦ ਦੀ ਦਰਸ਼ਕ ਗੈਲਰੀ ਤੋਂ ਸੰਸਦ ਮੈਂਬਰਾਂ ਦੇ ਬੈਂਚ 'ਤੇ ਚੜ੍ਹ ਗਏ ਸਨ।
ਇਸ ਦੌਰਾਨ ਸਦਨ ਵਿਚ ਮੌਜੂਦ ਸੰਸਦ ਮੈਂਬਰਾਂ ਨੇ ਨੌਜਵਾਨ ਨੂੰ ਫੜ ਕੇ ਕੁੱਟਿਆ, ਜਿਸ ਦਾ ਵੀਡੀਉ ਵੀ ਸਾਹਮਣੇ ਆਇਆ ਹੈ।
(For more news apart from Parliament Lok Sabha Visitor Gallery Security Breach Latest News in Punjabi, stay tuned to Rozana Spokesman)
