ਧਰਮ ਦੇ ਨਾਮ 'ਤੇ ਚੰਦ-ਤਾਰੇ ਵਾਲੇ ਹਰੇ ਝੰਡੇ (ਪਾਕਿਸਤਾਨ ਮੁਸਲਿਮ ਲੀਗ) ਲਹਿਰਾਉਣ 'ਤੇ ਰੋਕ ਦੀ ਮੰਗ ਵਾਲੀ ਅਰਜ਼ੀ 'ਤੇ ਸੁਪਰੀਮ ਕੋਰਟ ਨੇ ਕੇਂਦਰ ਸਰਕਾਰ ਨੂੰ...
ਨਵੀਂ ਦਿੱਲੀ : ਧਰਮ ਦੇ ਨਾਮ 'ਤੇ ਚੰਦ-ਤਾਰੇ ਵਾਲੇ ਹਰੇ ਝੰਡੇ (ਪਾਕਿਸਤਾਨ ਮੁਸਲਿਮ ਲੀਗ) ਲਹਿਰਾਉਣ 'ਤੇ ਰੋਕ ਦੀ ਮੰਗ ਵਾਲੀ ਅਰਜ਼ੀ 'ਤੇ ਸੁਪਰੀਮ ਕੋਰਟ ਨੇ ਕੇਂਦਰ ਸਰਕਾਰ ਨੂੰ ਦੋ ਹਫ਼ਤੇ ਵਿਚ ਅਪਣਾ ਪੱਖ ਰੱਖਣ ਲਈ ਆਖਿਆ ਹੈ। ਦਰਅਸਲ ਸ਼ੀਆ ਯੂਪੀ ਸੈਂਟਰਲ ਵਕਫ਼ ਬੋਰਡ ਦੇ ਚੇਅਰਮੈਨ ਵਸੀਮ ਰਿਜ਼ਵੀ ਨੇ ਸੁਪਰੀਮ ਕੋਰਟ ਵਿਚ ਅਰਜ਼ੀ ਦਾਖ਼ਲ ਕਰ ਕੇ ਮੰਗ ਕੀਤੀ ਹੈ ਕਿ ਧਰਮ ਦੇ ਨਾਂ 'ਤੇ ਚੰਦ ਤਾਰੇ ਵਾਲੇ ਹਰੇ ਝੰਡੇ (ਪਾਕਿਸਤਾਨ ਮੁਸਲਿਮ ਲੀਗ) ਲਹਿਰਾਉਣ 'ਤੇ ਪਾਬੰਦੀ ਲਗਾਈ ਜਾਵੇ।
ਅਰਜ਼ੀ ਕਰਤਾ ਵਸੀਮ ਰਿਜ਼ਵੀ ਨੇ ਸੁਪਰੀਮ ਕੋਰਟ ਤੋਂ ਮੰਗ ਕੀਤੀ ਹੈ ਕਿ ਅਜਿਹੀਆਂ ਸੰਸਥਾਵਾਂ, ਵਿਅਕਤੀਆਂ ਅਤੇ ਧਾਰਮਿਕ ਸੰਸਥਾਵਾਂ ਦੇ ਵਿਰੁਧ ਕਾਰਵਾਈ ਕੀਤੀ ਜਾਵੇ ਜੋ ਪਾਕਿਸਤਾਨ ਮੁਸਲਿਮ ਲੀਗ ਵਾਲੇ ਝੰਡੇ ਲਹਿਰਾ ਰਹੇ ਹਨ ਕਿਉਂਕਿ ਇਹ ਇਸਲਾਮਕ ਝੰਡੇ ਨਹੀਂ ਹਨ। ਅਰਜ਼ੀ ਵਿਚ ਮੰਗ ਕੀਤੀ ਗਈ ਹੈ ਕਿ ਸੁਪਰੀਮ ਕੋਰਟ ਕੇਂਦਰ ਸਰਕਾਰ ਨੂੰ ਆਦੇਸ਼ ਦੇਵੇ ਕਿ ਅਜਹੀਆਂ ਥਾਵਾਂ ਦੀ ਪਛਾਣ ਕਰੇ, ਜਿੱਥੇ ਅਜਿਹੇ ਝੰਡੇ ਲਹਿਰਾਏ ਜਾਂਦੇ ਹਨ।
ਅਰਜ਼ੀਕਰਤਾ ਵਸੀਮ ਰਿਜ਼ਵੀ ਦੀ ਦਲੀਲ ਹੈ ਕਿ ਹਰੇ ਕੱਪੜੇ 'ਤੇ ਚੰਦ ਤਾਰਾ ਦੇ ਨਿਸ਼ਾਨ ਵਾਲੇ ਮੁਸਲੀਮ ਲੀਗ ਦੇ ਇਸ ਝੰਡੇ ਦਾ ਇਸਲਾਮੀ ਮਾਨਤਾਵਾਂ ਨਾਲ ਕੋਈ ਲੈਣਾ ਦੇਣਾ ਨਹੀਂ। ਨਾ ਤਾਂ ਹਰੇ ਰੰਗ ਅਤੇ ਨਾ ਹੀ ਚੰਦ ਤਾਰਾ ਇਸਲਾਮ ਦੇ ਅਭਿੰਨ ਅੰਗ ਹਨ। ਅਰਜ਼ੀ ਵਿਚ ਕਿਹਾ ਗਿਆ ਹੈ ਕਿ ਪਾਕਿਸਤਾਨ ਸਾਡਾ ਦੁਸ਼ਮਣ ਮੁਲਕ ਹੇ ਅਤੇ ਦੇਸ਼ ਵਿਚ ਅਤਿਵਾਦੀ ਗਤੀਵਿਧੀਆਂ ਲਈ ਜ਼ਿੰਮੇਵਾਰ ਹੈ।
ਇੰਨਾ ਹੀ ਨਹੀਂ ਪਾਕਿਸਤਾਨ ਸਰਹੱਦ ਪਾਰ ਅਤਿਵਾਦ ਨੂੰ ਬੜ੍ਹਾਵਾ ਵੀ ਦਿੰਦਾ ਹੈ। ਇਸ ਤੋਂ ਇਲਾਵਾ ਪਾਕਿਸਤਾਨ ਸਰਹੱਦਾਂ 'ਤੇ ਤਾਇਨਾਤ ਸਾਡੇ ਜਵਾਨਾਂ 'ਤੇ ਹਮਲਾ ਕਰਦਾ ਹੈ ਅਤੇ ਅਜਿਹੇ ਵਿਚ ਪਾਕਿਸਤਾਨ ਮੁਸਲਿਮ ਲੀਗ ਦਾ ਝੰਡਾ ਲਹਿਰਾਉਣਾ ਠੀਕ ਨਹੀਂ ਹੈ।