ਸਰਕਾਰ ਨੇ ਕਣਕ ਖ਼ਰੀਦ ’ਚ ਬਣਾਇਆ 3.82 ਕਰੋੜ ਟਨ ਦਾ ਨਵਾਂ ਰੀਕਾਰਡ
ਨਵੀਂ ਦਿੱਲੀ, 17 ਜੂਨ : ਸਰਕਾਰ ਨੇ 2020-21 ਦੇ ਖ਼ਰੀਦ ਵਰ੍ਹੇ ਵਿਚ ਹੁਣ ਤਕ 3.82 ਕਰੋੜ ਟਨ ਕਣਕ ਖ਼ਰੀਦੀ ਹੈ ਜੋ ਇਕ ਰੀਕਾਰਡ ਹੈ। ਇਸ ਦੇ ਨਾਲ ਹੀ ਕੇਂਦਰੀ ਅੰਨ ਭੰਡਾਰ ਵਿਚ ਸੱਭ ਤੋਂ ਵੱਧ ਕਣਕ ਦੇਣ ਵਾਲੇ ਪੰਜਾਬ ਨੂੰ ਹੁਣ ਮੱਧ ਪ੍ਰਦੇਸ਼ ਨੇ ਪਛਾੜ ਦਿਤਾ ਹੈ। ਮੱਧ ਪ੍ਰਦੇਸ਼ ਦੇਸ਼ ਦੇ ਕੇਂਦਰੀ ਅੰਨ ਭੰਡਾਰ ਵਿਚ ਕਣਕ ਦੇਣ ਵਾਲਾ ਸੱਭ ਤੋਂ ਵੱਡਾ ਰਾਜ ਬਣ ਗਿਆ ਹੈ।
ਖਾਧ ਮੰਤਰਾਲੇ ਦੇ ਬਿਆਨ ਮੁਤਾਬਕ ਸਰਕਾਰੀ ਖ਼ਰੀਦ ਨਾਲ ਪੂਰੇ ਭਾਰਤ ਵਿਚ 42 ਲੱਖ ਕਿਸਾਨਾਂ ਨੂੰ ਫ਼ਾਇਦਾ ਪੁੱਜਾ ਹੈ ਅਤੇ ਉਨ੍ਹਾਂ ਨੂੰ ਕਣਕ ਦੇ ਘੱਟੋ ਘੱਟ ਸਮਰਥਨ ਮੁੱਲ ਯਾਨੀ ਐਮਐਸਪੀ ਦੇ ਰੂਪ ਵਿਚ ਲਗਭਗ 73500 ਕਰੋੜ ਰੁਪਏ ਦਾ ਭੁਗਤਾਨ ਕੀਤਾ ਜਾ ਚੁਕਾ ਹੈ। ਕਣਕ ਖ਼ਰੀਦ ਦਾ ਪਿਛਲਾ ਰੀਕਾਰਡ 2012-13 ਵਿਚ 3.81 ਕਰੋੜ ਟਨ ਦਾ ਸੀ।
ਕਣਕ ਦੀ ਖ਼ਰੀਦ 2019-20 ਵਿਚ 3.41 ਕਰੋੜ ਟਨ ਸੀ। ਕਣਕ ਦੀ ਵਢਾਈ ਦਾ ਸਮਾਂ ਮਾਰਚ ਤੋਂ ਅਪ੍ਰੈਲ ਤਕ ਚਲਦਾ ਹੈ ਹਾਲਾਂਕਿ ਬਹੁਤੀ ਖ਼ਰੀਦ ਪਹਿਲੇ ਤਿੰਨ ਮਹੀਨਿਆਂ ਵਿਚ ਕੀਤੀ ਜਾਂਦੀ ਹੈ। ਚਾਲੂ ਵਰ੍ਹੇ ਲਈ ਕਣਕ ਖ਼ਰੀਦ ਦਾ ਟੀਚਾ 4.07 ਕਰੋੜ ਟਨ ਤੈਅ ਕੀਤਾ ਗਿਆ ਹੈ। ਐਫ਼ਸੀਆਈ ਅਤੇ ਰਾਜ ਏਜੰਸੀਆਂ ਐਮਐਸਪੀ ’ਤੇ ਕਣਕ ਖ਼ਰੀਦਦੀਆਂ ਹਨ। (ਏਜੰਸੀ)
