ਭਾਰਤੀ ਹਵਾਈ ਫ਼ੌਜ ਨੇ ਤੁਰੰਤ ਅਪਣੇ ਦੋ ਰਾਫੇਲ ਲੜਾਕੂ ਜਹਾਜ਼ ਉਸ ਯੂ.ਐਫ.ਓ. ਦੀ ਭਾਲ ਵਿਚ ਭੇਜੇ।
IAF scrambled Rafales after 'UFO' sighting: ਮਨੀਪੁਰ ਦੇ ਇੰਫਾਲ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਐਤਵਾਰ ਦੁਪਹਿਰ ਨੂੰ ਇਕ ਅਣਪਛਾਤੀ ਉਡਾਣ ਵਾਲੀ ਵਸਤੂ (ਯੂ.ਐਫ.ਓ.) ਦੇ ਨਜ਼ਰ ਆਉਣ ਕਾਰਨ ਆਮ ਉਡਾਣ ਸੇਵਾਵਾਂ ਪ੍ਰਭਾਵਤ ਹੋਈਆਂ। ਇਸ ਰੀਪੋਰਟ ਤੋਂ ਬਾਅਦ, ਭਾਰਤੀ ਹਵਾਈ ਫ਼ੌਜ ਨੇ ਤੁਰੰਤ ਅਪਣੇ ਦੋ ਰਾਫੇਲ ਲੜਾਕੂ ਜਹਾਜ਼ ਉਸ ਯੂ.ਐਫ.ਓ. ਦੀ ਭਾਲ ਵਿਚ ਭੇਜੇ।
ਇੰਡੀਆ ਟੂਡੇ ਦੀ ਰੀਪੋਰਟ ਮੁਤਾਬਕ ਭਾਰਤੀ ਹਵਾਈ ਫ਼ੌਜ ਦੇ ਉੱਚ-ਅਧਿਕਾਰੀਆਂ ਨੇ ਦਸਿਆ ਕਿ ਇੰਫਾਲ ਹਵਾਈ ਅੱਡੇ ਤੋਂ ਇਕ ਨਾਗਰਿਕ ਅਧਿਕਾਰੀ ਤੋਂ ਯੂ.ਐਫ.ਓ. ਦੇਖਣ ਬਾਰੇ ਇਕ ਸੰਦੇਸ਼ ਪ੍ਰਾਪਤ ਹੋਇਆ ਸੀ। ਇਸ ਤੋਂ ਬਾਅਦ ਇਕ ਰਾਫੇਲ ਲੜਾਕੂ ਜਹਾਜ਼ ਨੂੰ ਤੁਰੰਤ ਹਾਸ਼ਿਮਾਰਾ ਏਅਰ ਫੋਰਸ ਬੇਸ ਤੋਂ ਉਸ ਜਗ੍ਹਾ ਵੱਲ ਉਡਾਇਆ ਗਿਆ ਜਿਥੇ ਯੂਐਫਓ ਦੇਖਿਆ ਗਿਆ ਸੀ ਪਰ ਰਾਫੇਲ ਦੇ ਰਡਾਰ 'ਤੇ ਕੋਈ ਵੀ ਅਣਜਾਣ ਜਹਾਜ਼ ਜਾਂ ਵਾਹਨ ਨਜ਼ਰ ਨਹੀਂ ਆਇਆ।
ਈਸਟਰਨ ਕਮਾਂਡ ਨੇ ਕਿਹਾ ਕਿ ਭਾਰਤੀ ਹਵਾਈ ਫ਼ੌਜ ਨੇ ਏਅਰ ਡਿਫੈਂਸ ਰਿਸਪਾਂਸ ਮਕੈਨਿਜ਼ਮ ਨੂੰ ਸਰਗਰਮ ਕਰ ਦਿਤਾ ਹੈ ਕਿਉਂਕਿ ਵਿਜ਼ੂਅਲ ਇਨਪੁਟਸ ਇੰਫਾਲ ਏਅਰਪੋਰਟ ਤੋਂ ਆਏ ਸਨ। ਬੀਤੇ ਦਿਨ ਹਵਾਈ ਅੱਡੇ ਦੇ ਡਾਇਰੈਕਟਰ ਚਿਪੇਮੀ ਕੇਸ਼ਿੰਗ ਵਲੋਂ ਜਾਰੀ ਇਕ ਬਿਆਨ ’ਚ ਕਿਹਾ ਗਿਆ ਸੀ, ‘‘ਇੰਫਾਲ ਕੰਟਰੋਲਡ ਹਵਾਈ ਖੇਤਰ ’ਚ ਇਕ ਅਣਪਛਾਤੀ ਉੱਡਣ ਵਾਲੀ ਵਸਤੂ ਦੇ ਨਜ਼ਰ ਆਉਣ ਕਾਰਨ, ਦੋ ਉਡਾਣਾਂ ਨੂੰ ਮੋੜ ਦਿਤਾ ਗਿਆ ਹੈ ਅਤੇ ਤਿੰਨ ਉਡਾਣਾਂ ਦੇ ਰਵਾਨਗੀ ਦੇ ਸਮੇਂ ’ਚ ਦੇਰੀ ਹੋ ਗਈ ਹੈ। ਸਮਰੱਥ ਅਥਾਰਟੀ ਤੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ ਉਡਾਨ ਸੰਚਾਲਨ ਸ਼ੁਰੂ ਹੋਇਆ।’’
ਏਅਰ ਟ੍ਰੈਫਿਕ ਕੰਟਰੋਲ (ਏ.ਟੀ.ਸੀ.) ਦੇ ਇਕ ਅਧਿਕਾਰੀ ਨੇ ਦਸਿਆ ਕਿ ਉਨ੍ਹਾਂ ਨੂੰ ਦੁਪਹਿਰ 2:30 ਵਜੇ ਕੇਂਦਰੀ ਉਦਯੋਗਿਕ ਸੁਰੱਖਿਆ ਬਲ (ਸੀ.ਆਈ.ਐਸ.ਐਫ.) ਤੋਂ ਇਕ ਸੁਨੇਹਾ ਮਿਲਿਆ, ਜਿਸ ’ਚ ਉਨ੍ਹਾਂ ਨੂੰ ਦਸਿਆ ਗਿਆ ਕਿ ਹਵਾਈ ਅੱਡੇ ਦੇ ਨੇੜੇ ਇਕ ਯੂ.ਐਫ.ਓ. ਦਾ ਪਤਾ ਲਗਾਇਆ ਗਿਆ ਹੈ। ਅਧਿਕਾਰੀ ਨੇ ਕਿਹਾ, ‘‘ਸ਼ਾਮ 4 ਵਜੇ ਤਕ, ਯੂ.ਐਫ.ਓ. ਨੰਗੀ ਅੱਖ ਨਾਲ ਏਅਰਫੀਲਡ ਦੇ ਪੱਛਮ ਵਲ ਵਧਦਾ ਵਿਖਾਈ ਦੇ ਰਿਹਾ ਸੀ।’’
(For more news apart from IAF scrambled Rafales after 'UFO' sighting, stay tuned to Rozana Spokesman)
