ਇਹ ਗਠ-ਜੋੜ ਕੇਵਲ ਕਰਨਾਟਕ ਤਕ ਹੀ ਸੀਮਿਤ ਨਹੀਂ ਹੈ
ਬੰਗਲੂਰੂ, ਕਰਨਾਟਕ ਦੇ ਨਵੇਂ ਬਣਨ ਜਾ ਰਹੇ ਮੁਖ ਮੰਤਰੀ ਐਚਡੀ ਕੁਮਾਰਸਵਾਮੀ ਨੇ ਸੋਮਵਾਰ ਨੂੰ ਯੂਪੀਏ ਦੀ ਪ੍ਰਧਾਨ ਸੋਨੀਆ ਗਾਂਧੀ ਅਤੇ ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਨਾਲ ਮੁਲਾਕਾਤ ਕੀਤੀ। ਇਸ ਮੁਲਾਕਾਤ ਨੇ ਇਹ ਸੁਨੇਹਾ ਦਿੱਤਾ ਹੈ ਕਿ ਕਾਂਗਰਸ ਇਸ ਗਠ-ਜੋੜ ਨੂੰ ਲੰਬਾ ਲਿਜਾਣਾ ਚਾਹੁੰਦੀ ਹੈ। ਇਹ ਗਠ-ਜੋੜ ਕੇਵਲ ਕਰਨਾਟਕ ਤਕ ਹੀ ਸੀਮਿਤ ਨਹੀਂ ਹੈ।
ਕਾਗਰਸ ਇਸ ਗਠਜੋੜ ਨੂੰ 2019 ਦੀਆਂ ਲੋਕ ਸਭਾ ਚੋਣਾਂ ਤਕ ਲਿਜਾ ਕੇ ਅਗਲੀਆਂ ਆਮ ਚੋਣਾਂ ਜਿੱਤਣ ਦੇ ਮੂਡ ਵਿਚ ਹੈ ਪਰ ਸਰਕਾਰ ਬਣਨ ਤੋਂ ਪਹਿਲਾਂ ਹੀ ਦੋਹਾਂ ਪਾਰਟੀਆਂ ਵਿਚ ਦਰਾੜ ਬਣਦੀ ਨਜ਼ਰ ਆ ਰਹੀ ਹੈ। ਭਾਵੇਂ ਕੁਮਾਰ ਸੁਆਮੀ ਨੇ ਸਹੁੰ ਚੁੱਕ ਸਮਾਗਮ ਲਈ ਸਾਰੀਆਂ ਵਿਰੋਧੀ ਪਾਰਟੀਆਂ ਦੇ ਆਗੂਆਂ ਨੂੰ ਸੱਦਾ ਦਿਤਾ ਹੈ ਪਰ ਫਿਰ ਵੀ ਵਿਚੇ ਵਿਚ ਗਠਜੋੜ ਵਾਲੀਆਂ ਪਾਰਟੀਆਂ ਵਿਚ ਦਰਾੜ ਨਜ਼ਰ ਆ ਰਹੀ ਹੈ
ਜਿਸ ਦੇ ਕੁਝ ਕਾਰਨ ਹਨ-ਪਹਿਲਾ: ਸਰਕਾਰ ਦੌਰਾਨ ਕਾਂਗਰਸ 30-30 ਮਹੀਨੇ ਦਾ ਫਾਰਮੂਲਾ ਚਾਹੁੰਦੀ ਸੀ ਪਰ ਜੇਡੀਐਸ ਨੇ ਇਸ ਨੂੰ ਇਤਿਹਾਸ ਵਲ ਦੇਖਦਿਆਂ ਖ਼ਾਰਜ਼ ਕਰ ਦਿਤਾ। ਦੂਜਾ : ਭਾਵੇਂ ਕਾਂਗਰਸ ਹਾਈ ਕਮਾਨ ਨੇ ਇਹ ਸਪੱਸ਼ਟ ਕਰ ਦਿਤਾ ਕਿ ਕਾਂਗਰਸ ਕੋਈ ਸ਼ਰਤ ਨਹੀਂ ਰਖੇਗੀ ਪਰ ਇਤਿਹਾਸ ਦਸਦਾ ਹੈ ਕਿ ਕਾਂਗਰਸ ਨੇ ਜਿਸ ਨੂੰ ਵੀ ਸਮਰਥਨ ਦਿਤਾ ਬਾਅਦ ਵਿਚ ਅਪਣੀਆਂ ਸ਼ਰਤਾਂ ਮੰਨਵਾਉਣੀਆਂ ਸ਼ੁਰੂ ਕਰ ਦਿੰਦੀ ਹੈ।
ਤੀਜਾ : ਇਸ ਸ਼ਸੋਪੰਜ 'ਚ ਅਜੇ ਤਕ ਇਹ ਤੈਅ ਨਹੀਂ ਹੋ ਸਕਿਆ ਕਿ ਕਾਂਗਰਸ ਵਲੋਂ ਕਿੰਨੇ ਉਪ ਮੁੱਖ ਮੰਤਰੀ ਹੋਣਗੇ ਜਾਂ ਕੌਣ ਹੋਵੇਗਾ ਕਿਉਂਕਿ ਕਈ ਕਾਂਗਰਸੀ ਆਗੂ ਕੁਮਾਰ ਸੁਆਮੀ ਦੇ ਹੇਠਾਂ ਲੱਗ ਕੇ ਕੰਮ ਕਰਨ ਨੂੰ ਤਿਆਰ ਨਹੀਂ ਹਨ। ਚੌਥਾ : ਗ੍ਰਹਿ ਵਿਭਾਗ ਸਬੰਧੀ ਵੀ ਦੋਹਾਂ ਪਾਰਟੀਆਂ 'ਚ ਮਤਭੇਦ ਹਨ ਕਿਉਂਕਿ ਦੋਹੇਂ ਪਾਰਟੀਆਂ ਇਸ ਮੰਤਰਾਲੇ ਨੂੰ ਅਪਣੇ ਅਪਣੇ ਕੋਲ ਰਖਣਾ ਚਾਹੁੰਦੀਆਂ ਹਨ।
ਪੰਜਵਾਂ : ਉਪ ਮੁੱਖ ਮੰਤਰੀ ਦਾ ਅਹੁਦਾ ਇਕ ਪਾਸੇ ਮੁਸਲਮਾਨਾਂ ਵਲੋਂ ਵੀ ਮੰਗਿਆ ਜਾ ਰਿਹਾ ਹੈ ਤੇ ਦੂਜੇ ਪਾਸੇ ਲਿੰਗਾਇਤ ਇਸ ਦੀ ਮੰਗ ਕਰ ਰਹੇ ਹਨ। ਇਹ ਵੀ ਦੇਖਣਾ ਪਵੇਗਾ ਕਿ ਸਰਕਾਰ ਬਣਾਉਣ ਵੇਲੇ ਕਿਸ ਨੂੰ ਖ਼ੁਸ਼ ਕੀਤਾ ਜਾਂਦਾ ਹੈ ਤੇ ਕਿਸ ਨੂੰ ਨਾਰਾਜ਼। ਇਸ ਤੋਂ ਇਲਾਵਾ ਤਕਰਾਰ ਇਹ ਵੀ ਹੈ ਕਿ ਕਾਂਗਰਸ ਦੋਹੇਂ ਉਪ ਮੁੱਖ ਮੰਤਰੀਆਂ ਦੇ ਅਹੁਦੇ ਅਪਣੇ ਕੋਲ ਰੱਖ ਕੇ ਉਸ ਵਿਚੋਂ ਇਕ ਅਹੁਦਾ ਦਲਿਤਾਂ ਨੂੰ ਦੇਣਾ ਚਾਹੁੰਦੀ ਹੈ।
ਛੇਵਾਂ : ਕੈਬਨਿਟ ਵਿਚ ਮੰਤਰੀਆਂ ਦਾ ਅਨੁਪਾਤ ਕੀ ਹੋਵੇਗਾ ਇਹ ਵੀ ਦੇਖਣਾ ਪਵੇਗਾ ਕਿਉਂਕਿ ਪਹਿਲਾਂ ਇਹ ਵੀ ਕਿਹਾ ਜਾ ਰਿਹਾ ਸੀ ਕਿ ਜੇਡੀਐਸ ਮੰਤਰੀਆਂ ਦਾ ਅਨੁਪਾਤ ਕਾਗਰਸ ਨਾਲੋਂ ਵੱਧ ਚਾਹੁੰਦੀ ਹੈ।
ਉਪਰੋਕਤ ਕਾਰਨਾਂ ਨੂੰ ਦੇਖਦੇ ਹੋਏ ਇੰਜ ਲਗਦਾ ਹੈ ਕਿ ਦੋਹਾਂ ਪਾਰਟੀਆਂ ਨੂੰ ਉਨ੍ਹਾਂ ਦੀ ਸਿਆਸੀ ਮਜਬੂਰੀ ਨੇੜੇ ਲੈ ਕੇ ਆਈ ਹੈ। ਦੇਖਣਾ ਇਹ ਹੋਵੇਗਾ ਕਿ ਸਰਕਾਰ ਬਣਨ ਤੋਂ ਬਾਅਦ ਕਿੰਨਾ ਚਿਰ ਸਹੀ ਸਲਾਮਤ ਚਲਦੀ ਹੈ।