ਪਿਓ ਨੇ ਹਸਪਤਾਲ ਪ੍ਰਸ਼ਾਸਨ ਨੂੰ ਬੱਚੇ ਦੀ ਲਾਸ਼ ਲਿਜਾਉਣ ਲਈ ਐਂਬੁਲੈਂਸ ਉਪਲੱਬਧ ਕਰਵਾਉਣ ਬਾਰੇ ਕਿਹਾ ਸੀ
ਨਾਲੰਦਾ : ਚਮਕੀ ਬੁਖ਼ਾਰ ਨੂੰ ਲੈ ਕੇ ਜਿੱਥੇ ਬਿਹਾਰ ਦੇ ਸਾਰੇ ਸਰਕਾਰੀ ਹਸਪਤਾਲਾਂ ਨੂੰ ਅਲਰਟ ਜਾਰੀ ਕਰ ਕੇ ਸਿਹਤ ਸੇਵਾਵਾਂ ਮੁਫ਼ਤ ਦਿੱਤੇ ਜਾਣ ਬਾਰੇ ਕਿਹਾ ਗਿਆ ਹੈ, ਉਥੇ ਹੀ ਮੁੱਖ ਮੰਤਰੀ ਨੀਤੀਸ਼ ਕੁਮਾਰ ਦੇ ਆਪਣੇ ਜ਼ਿਲ੍ਹੇ 'ਚ ਇਕ ਵਾਰ ਫਿਰ ਮਨੁੱਖਤਾ ਨੂੰ ਸ਼ਰਮਸਾਰ ਕਰ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ 7 ਸਾਲਾ ਬੇਟੇ ਦੀ ਮੌਤ ਤੋਂ ਬਾਅਦ ਲਾਸ਼ ਨੂੰ ਘਰ ਪਹੁੰਚਾਉਣ ਲਈ ਜਦੋਂ ਐਂਬੁਲੈਂਸ ਨਾ ਮਿਲੀ ਤਾਂ ਪਿਓ ਆਪਣੇ ਮੋਢੇ 'ਤੇ ਰੱਖ ਕੇ ਪੈਦਲ ਘਰ ਲੈ ਗਿਆ।
Child death
ਜਾਣਕਾਰੀ ਮੁਤਾਬਕ ਨਾਲੰਦਾ ਜ਼ਿਲ੍ਹੇ ਦੇ ਸਾਗਰ ਸੀਤਾ ਬਿਗਹਾ ਦਾ ਰਹਿਣ ਵਾਲਾ ਬੱਚਾ ਪਿੰਡ 'ਚ ਹੀ ਅਚਾਨਕ ਬੇਹੋਸ਼ ਹੋ ਗਿਆ ਸੀ। ਮਾਪੇ ਉਸ ਨੂੰ ਪਹਿਲਾਂ ਪਿੰਡ ਦੇ ਸਿਹਤ ਕੇਂਦਰ 'ਚ ਲੈ ਗਏ, ਜਿਥੋਂ ਉਸ ਨੂੰ ਸਦਰ ਹਸਪਤਾਲ ਬਿਹਾਰ ਸ਼ਰੀਫ਼ ਰੈਫ਼ਰ ਕਰ ਦਿੱਤਾ ਗਿਆ। ਬੱਚੇ ਦਾ ਪਿਤਾ ਉਸ ਨੂੰ ਲੈ ਕੇ ਹਸਪਤਾਲ ਪੁੱਜਾ, ਜਿੱਥੇ ਡਾਕਟਰਾਂ ਨੇ ਬੱਚੇ ਨੂੰ ਮ੍ਰਿਤਕ ਐਲਾਨ ਦਿੱਤਾ।
Bihar : Man carries baby's body on shoulders as hospital denies ambulance
ਬੱਚੇ ਦੇ ਪਿਤਾ ਨੇ ਹਸਪਤਾਲ ਪ੍ਰਸ਼ਾਸਨ ਤੋਂ ਮ੍ਰਿਤਕ ਬੱਚੇ ਦੀ ਲਾਸ਼ ਲਿਜਾਉਣ ਲਈ ਐਂਬੁਲੈਂਸ ਉਪਲੱਬਧ ਕਰਵਾਉਣ ਬਾਰੇ ਕਿਹਾ, ਪਰ ਹਸਪਤਾਲ ਵੱਲੋਂ ਕੋਈ ਮਦਦ ਨਾ ਕੀਤੀ ਗਈ। ਉਹ ਹਸਪਤਾਲ ਅੰਦਰ ਕਾਫ਼ੀ ਦੇਰ ਤਕ ਆਪਣੇ ਬੱਚੇ ਦੀ ਲਾਸ਼ ਲੈ ਕੇ ਇਧਰ-ਉਧਰ ਘੁੰਮਦਾ ਰਿਹਾ, ਪਰ ਕਿਸੇ ਅਧਿਕਾਰੀ ਜਾਂ ਮੁਲਾਜ਼ਮ ਨੇ ਉਸ ਦੀ ਗੱਲ ਨਾ ਸੁਣੀ। ਇਸ ਮਗਰੋਂ ਉਹ ਪੈਦਲ ਹੀ ਘਰ ਨੂੰ ਚੱਲ ਪਿਆ।
Bihar: Man in Nalanda carries body of his child on his shoulders allegedly due to unavailability of an ambulance at the govt hospital. DM Nalanda, Yogendra Singh, says, "An inquiry will be conducted, if negligence is found, strict action will be taken." pic.twitter.com/TdF9rkZKST
— ANI (@ANI) 25 June 2019
ਉਧਰ ਨਾਲੰਦਾ ਦੇ ਜ਼ਿਲ੍ਹਾ ਅਧਿਕਾਰੀ ਯੋਗੇਂਦਰ ਸਿੰਘ ਨੇ ਇਸ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕਰਵਾਉਣ ਦੇ ਆਦੇਸ਼ ਦਿੱਤੇ ਹਨ। ਉਨ੍ਹਾਂ ਦੱਸਿਆ ਕਿ ਹਸਪਤਾਲ ਮੁਲਾਜ਼ਮਾਂ ਦਾ ਕਹਿਣਾ ਹੈ ਕਿ ਬੱਚੇ ਦੇ ਪਿਓ ਨੂੰ ਗੱਡੀ ਉਪਲੱਬਧ ਕਰਵਾਉਣ ਬਾਰੇ ਕਿਹਾ ਗਿਆ ਸੀ। ਉਸ ਸਮੇਂ ਹਸਪਤਾਲ 'ਚ ਕੋਈ ਐਂਬੁਲੈਂਸ ਮੌਜੂਦ ਨਹੀਂ ਸੀ। ਇਸ ਲਈ ਉਸ ਨੂੰ ਰੁਕਣ ਲਈ ਕਿਹਾ ਗਿਆ ਸੀ ਪਰ ਬੱਚੇ ਦਾ ਪਿਓ ਨਾ ਰੁਕਿਆ।
