ਸਵੇਰੇ 7 ਵਜੇ ਤੋਂ ਸ਼ਾਮ 5 ਵਜੇ ਤਕ ਕੀਤੀ ਜਾਵੇਗੀ ਸੋਕੇਲਾ ਤਾਯਾਂਗ ਦੇ ਵੋਟ ਪਾਉਣ ਲਈ ਆਉਣ ਦੀ ਉਡੀਕ
ਈਟਾਨਗਰ: ਅਰੁਣਾਚਲ ਪ੍ਰਦੇਸ਼ ’ਚ 19 ਅਪ੍ਰੈਲ ਨੂੰ ਹੋਣ ਵਾਲੀਆਂ ਚੋਣਾਂ ਤੋਂ ਇਕ ਦਿਨ ਪਹਿਲਾਂ ਅੰਜਵਾ ਜ਼ਿਲ੍ਹੇ ’ਚ ਚੋਣ ਅਧਿਕਾਰੀਆਂ ਦੀ ਇਕ ਟੀਮ 39 ਕਿਲੋਮੀਟਰ ਪੈਦਲ ਚੱਲ ਕੇ ਅੰਜਵਾ ਜ਼ਿਲ੍ਹੇ ਦੇ ਦੂਰ-ਦੁਰਾਡੇ ਦੇ ਮਾਲੋਗਾਮ ਪਿੰਡ ਜਾਵੇਗੀ ਤਾਂ ਜੋ ਇਥੇ ਰਹਿੰਦੀ ਇਕੱਲੀ ਵੋਟਰ 44 ਸਾਲ ਦੀ ਸੋਕੇਲਾ ਤਾਯਾਂਗ ਵੋਟ ਪਾ ਸਕੇ।
ਤਾਯਾਂਗ ਲਈ, ਚੀਨ ਸਰਹੱਦ ਦੇ ਨੇੜੇ ਪਿੰਡ ’ਚ ਇਕ ਅਸਥਾਈ ਪੋਲਿੰਗ ਸਟੇਸ਼ਨ ਸਥਾਪਤ ਕੀਤਾ ਜਾਵੇਗਾ। ਚੋਣ ਅਧਿਕਾਰੀਆਂ ਮੁਤਾਬਕ ਮਾਲੋਗਾਮ ’ਚ ਬਹੁਤ ਘੱਟ ਪਰਵਾਰ ਹਨ ਪਰ ਤਾਯਾਂਗ ਨੂੰ ਛੱਡ ਕੇ ਬਾਕੀ ਸਾਰੇ ਹੋਰ ਪੋਲਿੰਗ ਸਟੇਸ਼ਨਾਂ ’ਤੇ ਵੋਟਰ ਰਜਿਸਟਰਡ ਹਨ। ਤਾਯਾਂਗ ਕਿਸੇ ਹੋਰ ਪੋਲਿੰਗ ਸਟੇਸ਼ਨ ’ਤੇ ਤਬਦੀਲ ਹੋਣ ਲਈ ਤਿਆਰ ਨਹੀਂ ਹੈ। ਅਧਿਕਾਰੀਆਂ ਨੇ ਦਸਿਆ ਕਿ ਚੋਣ ਅਧਿਕਾਰੀਆਂ ਅਤੇ ਸੁਰੱਖਿਆ ਕਰਮਚਾਰੀਆਂ ਸਮੇਤ ਚੋਣ ਟੀਮ ਅਣਕਿਆਸੇ ਮੌਸਮ ਦੇ ਵਿਚਕਾਰ ਹਾਯੂਲਿਆਂਗ ਤੋਂ ਮਾਲੋਗਾਮ ਤਕ ਦਾ ਮੁਸ਼ਕਲ ਸਫ਼ਰ ਕਰੇਗੀ ਤਾਂ ਜੋ ਤਾਯਾਂਗ ਅਪਣੀ ਵੋਟ ਪਾ ਸਕੇ।
ਤਾਯਾਂਗ ਹਾਯੂਲਿਆਂਗ ਵਿਧਾਨ ਸਭਾ ਹਲਕੇ ਅਤੇ ਅਰੁਣਾਚਲ ਪੂਰਬੀ ਲੋਕ ਸਭਾ ਹਲਕੇ ਤੋਂ ਵੋਟਰ ਹੈ। ਸੰਯੁਕਤ ਮੁੱਖ ਚੋਣ ਅਧਿਕਾਰੀ ਲਿਚੇਨ ਕੋਯੂ ਨੇ ਦਸਿਆ, ‘‘ਹਾਯੂਲਿਆਂਗ ਤੋਂ ਮਾਲੋਗਾਮ ਤਕ ਦੀ ਯਾਤਰਾ ’ਚ ਸਾਰਾ ਦਿਨ ਪੈਦਲ ਚੱਲਣਾ ਪੈਂਦਾ ਹੈ।’’ ਕੋਊ ਨੇ ਕਿਹਾ ਕਿ ਹਰ ਇਨਸਾਨ ਨੂੰ ਵੋਟ ਪਾਉਣ ਦਾ ਅਧਿਕਾਰ ਹੈ, ਭਾਵੇਂ ਉਹ ਥਾਂ ਕਿੰਨੀ ਵੀ ਦੂਰ ਕਿਉਂ ਨਾ ਹੋਵੇ। ਉਨ੍ਹਾਂ ਕਿਹਾ ਕਿ ਪੋਲਿੰਗ ਟੀਮ ਨੂੰ ਵੋਟਿੰਗ ਵਾਲੇ ਦਿਨ ਸਵੇਰੇ 7 ਵਜੇ ਤੋਂ ਸ਼ਾਮ 5 ਵਜੇ ਤਕ ਉੱਥੇ ਰਹਿਣਾ ਪੈ ਸਕਦਾ ਹੈ ਕਿਉਂਕਿ ਉਨ੍ਹਾਂ ਨੂੰ ਨਹੀਂ ਪਤਾ ਕਿ ਤਯਾਂਗ ਕਦੋਂ ਵੋਟ ਪਾਉਣ ਆਵੇਗੀ।
ਮੁੱਖ ਚੋਣ ਅਧਿਕਾਰੀ ਪਵਨ ਕੁਮਾਰ ਸੈਨ ਨੇ ਕਿਹਾ, ‘‘ਇਹ ਹਮੇਸ਼ਾ ਗਿਣਤੀ ਬਾਰੇ ਨਹੀਂ ਹੁੰਦਾ, ਬਲਕਿ ਇਹ ਯਕੀਨੀ ਬਣਾਉਣਾ ਹੁੰਦਾ ਹੈ ਕਿ ਹਰ ਕਿਸੇ ਦੀ ਗੱਲ ਸੁਣੀ ਜਾਵੇ। ਸੋਕੇਲਾ ਤਾਯਾਂਗ ਦਾ ਦ੍ਰਿਸ਼ਟੀਕੋਣ ਸਮਾਵੇਸ਼ੀ ਅਤੇ ਸਮਾਨਤਾ ਪ੍ਰਤੀ ਸਾਡੀ ਵਚਨਬੱਧਤਾ ਦੀ ਇਮਤਿਹਾਨ ਹੈ।’’ ਹਾਲਾਂਕਿ ਤਾਯਾਂਗ ਦੀ ਧੀ ਅਤੇ ਬੇਟਾ ਕਿਤੇ ਹੋਰ ਕਾਲਜਾਂ ’ਚ ਪੜ੍ਹਦੇ ਹਨ, ਪਰ ਉਹ ਮਾਲੋਗਾਮ ਨਾਲ ਜੁੜੇ ਰਹਿੰਦੇ ਹਨ। ਤਾਯਾਂਗ ਨੇ ਕਿਹਾ, ‘‘ਮੈਂ ਮੁਸ਼ਕਲ ਨਾਲ ਅਪਣੇ ਪਿੰਡ ’ਚ ਰਹਿੰਦੀ ਹਾਂ... ਆਮ ਤੌਰ ’ਤੇ ਮੈਂ ਕਿਸੇ ਕੰਮ ਲਈ ਜਾਂ ਚੋਣਾਂ ਦੌਰਾਨ ਆਉਂਦੀ ਹਾਂ। ਮੈਂ ਆਮ ਤੌਰ ’ਤੇ ਲੋਹਿਤ ਜ਼ਿਲ੍ਹੇ ਦੇ ਵਾਕਰੋ ’ਚ ਰਹਿੰਦੀ ਹਾਂ ਜਿੱਥੇ ਸਾਡੇ ਖੇਤ ਹਨ।’’
