ਮਾਈਕ ਪੋਂਪੀਉ ਨੇ ਮੋਦੀ ਨਾਲ ਕੀਤੀ ਮੁਲਾਕਾਤ
ਨਵੀਂ ਦਿੱਲੀ, 26 ਜੂਨ: ਅਮਰੀਕਾ ਦੇ ਵਿਦੇਸ਼ ਮੰਤਰੀ ਮਾਈਕ ਪੋਂਪੀਉ ਨੇ ਬੁਧਵਾਰ ਨੂੰ ਧਾਰਮਕ ਆਜ਼ਾਦੀ ਦੇ ਅਧਿਕਾਰ ਦੇ ਹੱਕ 'ਚ 'ਮਜ਼ਬੂਤੀ' ਨਾਲ ਬੋਲਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਜੇ ਇਸ ਅਧਿਕਾਰ ਨਾਲ ਸਮਝੌਤਾ ਹੋਇਆ ਤਾਂ ਇਸ ਨਾਲ ਦੁਨੀਆਂ ਬਦਤਰ ਹੋ ਜਾਂਦੀ ਹੈ। ਪੋਂਪੀਉ ਦੀ ਟਿਪਣੀ ਦੀ ਅਹਿਮੀਅਤ ਇਸ ਲਈ ਹੈ ਕਿਉਂਕਿ ਕੁੱਝ ਦਿਨ ਪਹਿਲਾਂ ਹੀ ਅਮਰੀਕੀ ਵਿਦੇਸ਼ ਮੰਤਰਾਲੇ ਨੇ 2018 ਦੀ ਸਾਲਾਨਾ ਕੌਮਾਂਤਰੀ ਧਾਰਮਕ ਆਜ਼ਾਦੀ ਰੀਪੋਰਟ ਜਾਰੀ ਕੀਤੀ ਸੀ।
Religious Freedom
ਇਸ 'ਚ ਦੋਸ਼ ਲਾਇਆ ਗਿਆ ਸੀ ਕਿ ਭਾਰਤ 'ਚ 2018 'ਚ ਗਊਆਂ ਦੇ ਵਪਾਰ ਜਾਂ ਗਊ ਨੂੰ ਮਾਰਨ ਦੀ ਅਫ਼ਵਾਹ 'ਤੇ ਘੱਟ ਗਿਣਤੀ ਧਰਮ ਨਾਲ ਸਬੰਧਤ ਲੋਕਾਂ, ਖ਼ਾਸ ਕਰ ਕੇ ਮੁਸਲਮਾਨਾ ਵਿਰੁੱਧ ਕੱਟੜਪੰਥੀ ਹਿੰਦੂ ਸਮੂਹਾਂ ਨੇ ਭੀੜਾਂ ਵੱਲੋਂ ਹਿੰਸਾ ਕੀਤੀ ਗਈ ਹੈ। ਨਵੀਂ ਦਿੱਲੀ ਦੇ ਇੰਡੀਆ ਇੰਟਰਨੈਸ਼ਨਲ ਸੈਂਟਰ 'ਚ 'ਭਾਰਤ ਨੀਤੀ' ਬਾਰੇ ਅਪਣੇ ਭਾਸ਼ਣ ਵਿਚ ਪੋਮਪਿਓ ਨੇ ਕਿਹਾ, 'ਭਾਰਤ 'ਚ 4 ਪ੍ਰਮੁੱਖ ਧਰਮਾਂ ਦਾ ਜਨਮ ਹੋਇਆ ਹੈ। ਸਾਰਿਆਂ ਨੂੰ ਧਾਰਮਕ ਅਜ਼ਾਦੀ ਮਿਲੇ, ਇਸ ਲਈ ਇਸ ਨਾਲ ਖੜਾ ਹੋਣਾ ਚਾਹੀਦਾ ਹੈ। ਇਹਨਾਂ ਅਧਿਕਾਰਾਂ ਦੇ ਹੱਕ 'ਚ ਇਕੱਠਿਆਂ ਮਜ਼ਬੂਤੀ ਨਾਲ ਬੋਲਣਾ ਚਾਹੀਦਾ ਹੈ। ਜਦੋਂ ਵੀ ਇਹਨਾਂ ਅਧਿਕਾਰਾਂ ਨਾਲ ਸਮਝੌਤਾ ਕੀਤਾ ਜਾਂਦਾ ਹੈ ਤਾਂ ਦੁਨੀਆ ਬਦਤਰ ਹੁੰਦੀ ਹੈ।'
Jaish-E-Mohammed Masood Azhar
ਉਹਨਾਂ ਕਿਹਾ ਕਿ ਜੈਸ਼-ਏ-ਮੁਹੰਮਦ ਦੇ ਸਰਗਣੇ ਮਸੂਦ ਅਜ਼ਹਰ ਨੂੰ ਸੰਯੁਕਤ ਰਾਸ਼ਟਰ ਵੱਲੋਂ ਕੌਮਾਂਤਰੀ ਅਤਿਵਾਦੀ ਐਲਾਨ ਕੀਤੇ ਜਾਣ ਤੋਂ ਅਮਰੀਕਾ ਖ਼ੁਸ਼ ਹੈ। ਅਮਰੀਕੀ ਵਿਦੇਸ਼ ਮੰਤਰੀ ਨੇ ਕਿਹਾ ਕਿ ਭਾਰਤ ਨੇ ਅਤਿਵਾਦ ਦੀ ਹਮਾਇਤ ਕਰਨ ਵਾਲੇ ਫ਼ਲਸਤੀਨ ਦੇ ਐਨ.ਜੀ.ਓ. ਵਿਰੁੱਧ ਪਿੱਛੇ ਜਹੇ ਸੰਯੁਕਤ ਰਾਸ਼ਟਰ 'ਚ ਵੋਟ ਦਿੱਤੀ ਸੀ ਅਤੇ ਇਹ ਵਿਖਾਇਆ ਸੀ ਕਿ ਅਤਿਵਾਦ ਨੂੰ ਹੱਲਾਸ਼ੇਰੀ ਦੇਣਾ ਗ਼ਲਤ ਹੈ।
