ਇਕ ਪਰਵਾਰ ਨੂੰ ਪੂਜਣ ਦੇ ਆਦੀ ਲੋਕ ਲੋਕਤੰਤਰ ਦੀ ਪੂਜਾ ਹੀ ਨਹੀਂ ਕਰ ਸਕਦੇ
ਬਾਗਪਤ (ਯੂਪੀ), 27 ਮਈ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਦਲਿਤ ਅਤਿਆਚਾਰ ਰੋਕਥਾਮ ਕਾਨੂੰਨ ਨੂੰ ਕਮਜ਼ੋਰ ਕਰਨ ਤੋਂ ਲੈ ਕੇ ਕਿਸਾਨ ਮਸਲਿਆਂ 'ਤੇ 'ਝੂਠ ਅਤੇ ਅਫ਼ਵਾਹ' ਫੈਲਾਉਣ ਲਈ ਕਾਂਗਰਸ 'ਤੇ ਵਰ੍ਹਦਿਆਂ ਕਿਹਾ ਕਿ ਜਿਨ੍ਹਾ ਨੂੰ ਇਕ ਪਰਵਾਰ ਦੀ ਪੂਜਾ ਕਰਨ ਦੀ ਆਦਤ ਹੋਵੇ, ਉਹ ਮੋਦੀ ਦਾ ਵਿਰੋਧ ਕਰਨ ਦੇ ਚੱਕਰ ਵਿਚ ਦੇਸ਼ ਦਾ ਵਿਰੋਧ ਕਰਨ ਲੱਗੇ ਹਨ।
ਐਕਸਪ੍ਰੈਸਵੇਅ ਦਾ ਉਦਘਾਟਨ ਕਰਨ ਮਗਰੋਂ ਰੈਲੀ ਨੂੰ ਸੰਬੋਧਨ ਕਰਦਿਆਂ ਮੋਦੀ ਨੇ ਕਿਹਾ ਕਿ ਕਾਂਗਰਸ ਅਪਣੇ ਤੁੱਛ ਰਾਜਨੀਤਕ ਫ਼ਾਇਦੇ ਲਈ ਖੁਲੇਆਮ ਝੂਠ ਫੈਲਾ ਰਹੀ ਹੈ। ਉਨ੍ਹਾਂ ਕਿਹਾ, 'ਇਕ ਪਰਵਾਰ ਨੂੰ ਪੂਜਣ ਦੇ ਆਦੀ ਲੋਕ ਲੋਕਤੰਤਰ ਦੀ ਪੂਜਾ ਕਰ ਹੀ ਨਹੀਂ ਸਕਦੇ। ਮੋਦੀ ਨੇ ਕਿਹਾ ਕਿ ਚੋਣ ਹਾਰਨ ਮਗਰੋਂ ਉਹ ਘਬਰਾਏ ਹੋਏ ਹਨ। ਉਨ੍ਹਾਂ ਕਿਹਾ, 'ਉਹ ਮੋਦੀ ਦੇ ਵਿਰੋਧ ਵਿਚ ਦੇਸ਼ ਦਾ ਵਿਰੋਧ ਕਰਨ ਲੱਗੇ ਹਨ।' ਗੁਆਂਢ ਦੀ ਕੈਰਾਨਾ ਲੋਕ ਸਭਾ ਸੀਟ 'ਤੇ ਕਲ ਹੋਣ ਵਾਲੀਆਂ ਜ਼ਿਮਨੀ ਚੋਣਾਂ ਤੋਂ ਪਹਿਲਾਂ ਅੱਜ ਕੀਤੀ ਗਈ ਰੈਲੀ ਵਿਚ ਮੋਦੀ ਨੇ ਨਾਗਰਿਕਾਂ ਨੂੰ ਕਿਹਾ ਕਿ ਉਹ ਵੇਖੋ ਕਿ ਦੋਵੇਂ ਪਾਸੇ ਕਿਹੜੇ ਲੋਕ ਖੜੇ ਹਨ।
ਉਨ੍ਹਾਂ ਕਿਹਾ, 'ਇਕ ਪਾਸੇ ਉਹ ਲੋਕ ਹਨ ਜਿਨ੍ਹਾਂ ਲਈ ਉਨ੍ਹਾਂ ਦਾ ਪਰਵਾਰ ਹੀ ਦੇਸ਼ ਹੈ। ਮੇਰੇ ਲਈ ਮੇਰਾ ਦੇਸ਼ ਹੀ ਮੇਰਾ ਪਰਵਾਰ ਹੈ।' ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਦੇਸ਼ ਦੇ ਗੰਨਾ ਕਿਸਾਨਾਂ ਦੀ ਸਰਕਾਰ ਮਦਦ ਕਰੇਗੀ। ਪ੍ਰਤੀ ਕੁਇੰਟਲ ਗੰਨੇ 'ਤੇ 5.5 ਰੁਪਏ ਦੀ ਮਦਦ ਕੀਤੀ ਜਾਵੇਗੀ। ਮੋਦੀ ਨੇ ਕਿਹਾ ਕਿ ਕਾਂਗਰਸ ਨੇ ਸੁਪਰੀਮ ਕੋਰਟ 'ਤੇ ਉਂਗਲੀ ਚੁੱਕ ਕੇ, ਚੋਣ ਆਯੋਗ ਅਤੇ ਈਵੀਐਮ 'ਤੇ ਸ਼ੱਕ ਪ੍ਰਗਟ ਕਰ ਕੇ, ਰਿਜ਼ਰਵ ਬੈਂਕ ਅਤੇ ਇਸ ਦੀਆਂ ਨੀਤੀਆਂ ਨੂੰ ਸ਼ੱਕ ਦੀ ਨਜ਼ਰ ਨਾਲ ਵੇਖ ਕੇ ਅਤੇ ਉਨ੍ਹਾਂ ਦੇ ਕਾਰਨਾਮਿਆਂ ਦੀ ਜਾਂਚ ਕਰਨ ਵਾਲੀ ਹਰ ਏਜੰਸੀ 'ਤੇ ਸਵਾਲ ਚੁੱਕ ਕੇ ਵਿਸ਼ਵਾਸ ਦਾ ਸੰਕਟ ਪੈਦਾ ਕਰ ਦਿਤਾ ਹੈ।
ਉਨ੍ਹਾਂ ਕਿਹਾ ਕਿ ਵਿਰੋਧੀ ਧਿਰ ਤਾਂ ਫ਼ੌਜ ਦੀ ਬਹਾਦਰੀ ਨੂੰ ਵੀ ਨਕਾਰਦੀ ਹੈ ਜਿਸ ਨੇ ਸਰਹੱਦ ਪਾਰ ਜਾ ਕੇ ਸਰਜੀਕਲ ਹਮਲਾ ਕੀਤਾ ਅਤੇ ਉਹ ਭਾਰਤ ਦੀ ਤਾਰੀਫ਼ ਕਰਨ ਵਾਲੀਆਂ ਵਿਦੇਸ਼ ਹਸਤੀਆਂ 'ਤੇ ਵੀ ਸਵਾਲ ਚੁੱਕ ਦੇ ਹਨ। (ਏਜੰਸੀ)