ਕਿਹਾ, ਘਰੋਂ ਸਿਰ ’ਤੇ ਚਿੱਟਾ ਸਾਫ਼ਾ (ਕਫਨ) ਰੱਖ ਕੇ ਤੁਰੇ ਸਾਂ, ਮੋਰਚਾ ਫਤਿਹ ਕਰ ਕੇ ਹੀ ਪਰਤਾਂਗੇ
ਨਵੀਂ ਦਿੱਲੀ (ਚਰਨਜੀਤ ਸੁਰਖਾਬ) : ਕਿਸਾਨੀ ਸੰਘਰਸ਼ ਆਪਣੀਆਂ ਵਿਲੱਖਣ ਪੈੜਾਂ ਅਤੇ ਸੁਨਹਿਰੀ ਇਤਿਹਾਸ ਸਿਰਜਦਾ ਹੋਇਆ ਅਪਣੀ ਜਿੱਤ ਵੱਲ ਵਧਦਾ ਜਾ ਰਿਹਾ ਹੈ। ਸੰਘਰਸ਼ੀ ਯੋਧਿਆਂ ਵਲੋਂ ਸਿਰਜੇ ਜਾ ਰਹੇ ਇਤਿਹਾਸ ਨੂੰ ਆਉਣ ਵਾਲੀਆਂ ਪੀੜ੍ਹੀਆਂ ਮਾਣ ਨਾਲ ਵਾਚਿਆ ਕਰਨਗੀਆਂ। ਕੇਂਦਰ ਸਰਕਾਰ ਭਾਵੇਂ ਅਜੇ ਤਕ ਅਪਣੀ ਹੱਠ-ਧਰਮੀ ’ਤੇ ਕਾਇਮ ਰਹਿੰਦਿਆਂ ਤਰ੍ਹਾਂ ਤਰ੍ਹਾਂ ਦੇ ਹੱਥਕੰਡੇ ਵਰਤ ਕਿਸਾਨੀ ਘੋਲ ਨੂੰ ਲੀਹੋ ਲਾਹੁਣ ਦੀ ਸਿਰਤੋੜ ਕੋਸ਼ਿਸ਼ ਕਰ ਰਹੀ ਹੈ, ਪਰ ਦੂਜੇ ਪਾਸੇ ਸਰਕਾਰ ਨਾਲ ਮੱਥਾ ਲਾਈ ਬੈਠੇ ਮਰਜੀਵੜਿਆਂ ਦੀ ਫ਼ੌਜ ਚੜ੍ਹਦੀ ਕਲਾਂ ’ਚ ਕਰੋ ਜਾਂ ਮਰੋ ਦੀ ਲੜਾਈ ਲੜ ਰਹੀ ਹੈ।
Delhi Dharna
ਸਪੋਕਸਮੈਨ ਟੀਵੀ ਨਾਲ ਗੱਲਬਾਤ ਕਰਦਿਆਂ ਕਿਸਾਨ ਆਗੂ ਹਰਬੰਸ ਸਿੰਘ ਕੋੜਾ ਜ਼ਿਲ਼੍ਹਾ ਪ੍ਰਧਾਨ ਬਲਾਕ ਮੱਲਾਵਾਲਾ ਨੇ ਦਸਿਆ ਕਿ ਮੇਰੀ ਉਮਰ ਇਸ ਵੇਲੇ 82 ਸਾਲ ਹੈ ਅਤੇ ਜਦੋਂ ਮੈਂ ਦਿੱਲੀ ਲਈ ਘਰੋਂ ਰਵਾਨਾ ਹੋਇਆ ਤਾਂ ਮੇਰੇ ਦੋ ਪੜੋਤੇ ਤੇ ਪੜੋਤੀ ਮੇਰੀਆਂ ਲੱਤਾਂ ਨੂੰ ਚਿੰਬੜ ਗਏ ਅਤੇ ਪੁਛਣ ਲੱਗੇ ਕਿ ਤੁਸੀਂ ਕਿੱਥੇ ਜਾ ਰਹੇ ਹੋ? ਹਰਬੰਸ ਸਿੰਘ ਕੋੜਾ ਮੁਤਾਬਕ ਉਨ੍ਹਾਂ ਨੇ ਅਪਣੇ ਸਿਰ ’ਤੇ ਚਿੱਟਾ ਸਾਫਾ ਰੱਖ ਕੇ ਅਪਣੀ ਚੌਥੀ ਪੀੜ੍ਹੀ ਦੇ ਵਾਰਸਾਂ ਨੂੰ ਆਖਿਆ ਮੈਂ ਸਿਰ ’ਤੇ ਕਫਨ ਬੰਨ ਕੇ ਤੁਰਿਆ ਹਾਂ। ਮੈਂ ਵਾਪਸ ਪਰਤਾਂਗਾ ਜਾਂ ਨਹੀਂ, ਇਸ ਬਾਰੇ ਕੁੱਝ ਪਤਾ ਨਹੀਂ ਹੈ ਪਰ ਮੈਂ ਤੁਹਾਡੇ ਭਵਿੱਖ ਦੀ ਲੜਾਈ ਲੜਨ ਜਾ ਰਿਹਾ ਅਤੇ ਜਿੱਤ ਹੋਈ ਤਾਂ ਵਾਪਸ ਪਰਤਾਂਗਾ ਵਰਨਾ ਨਹੀਂ।
Delhi Dharna
ਉਨ੍ਹਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਮੁਖਾਤਿਬ ਹੁੰਦਿਆਂ ਇਕ ਰਾਜੇ ਦੀ ਕਹਾਣੀ ਸੁਣਾਈ ਕਿ ਇਕ ਰਾਜਾ ਸੀ, ਜਿਸ ’ਤੇ ਕੋਈ ਦੂਜਾ ਰਾਜਾ ਹਮਲਾ ਕਰਨ ਵਾਲਾ ਸੀ। ਰਾਜੇ ਦੇ ਦਰਬਾਰੀਆਂ ਨੇ ਰਾਜੇ ਨੂੰ ਇਸ ਬਾਰੇ ਸੂਚਿਤ ਕੀਤਾਂ ਰਾਜੇ ਦਾ ਜਵਾਬ ਸੀ, ਆਉਣ ਦਿਓ ਮੈਂ ਪ੍ਰਬੰਧ ਕੀਤਾ ਹੋਇਐ। ਫਿਰ ਜਦੋਂ ਦੂਜੇ ਰਾਜਾ ਦੀਆਂ ਫ਼ੌਜਾਂ ਸਮੇਤ ਕਿਲੇ ਲਾਗੇ ਪਹੁੰਚ ਗਈਆਂ ਤਾਂ ਦਰਬਾਰੀਆਂ ਨੇ ਰਾਜੇ ਨੂੰ ਇਕ ਫਿਰ ਸੂਚਿਤ ਕੀਤਾ ਤਾਂ ਰਾਜੇ ਨੇ ਕਿਹਾ, ਕੋਈ ਨਾ ਆਉਣ ਦਿਓ ਮੈਂ ਸਾਰਾ ਪ੍ਰਬੰਧ ਕਰ ਰਖਿਆ ਹੈ।
Delhi Dharna
ਜਦੋਂ ਦਰਬਾਰੀਆਂ ਨੇ ਕਿਹਾ ਕਿ ਹੁਣ ਤਾਂ ਦੁਸ਼ਮਣ ਦੀਆਂ ਫ਼ੌਜਾਂ ਕਿੱਲੇ ਦੀਆਂ ਕੰਧਾਂ ਨੂੰ ਪਾਰ ਕਰ ਅੰਦਰ ਆਉਣ ਲੱਗੀਆਂ ਹਨ ਤਾਂ ਰਾਜੇ ਨੇ ਸਾਫ਼ਾ ਚੁਕਿਆ ਤਾਂ ਉਥੋਂ ਜਾਂਦਾ ਹੋਇਆ ਬੋਲਿਆ, ਸਾਭੋ ਆਪਣਾ ਰਾਜ-ਭਾਗ, ਮੈਂ ਤਾਂ ਚੱਲਿਆ ਹਾਂ।’’ ਸੋ ਸਾਡੀ ਮੋਦੀ ਨੂੰ ਵੀ ਇਹੀ ਸਲਾਹ ਹੈ ਕਿ ਉਹ ਸਾਫਾ ਚੁੱਕ ਕੇ ਚਲਿਆ ਜਾਵੇ, ਕਿਉਂਕਿ ਉਸ ਕੋਲ ਹੁਣ ਹੋਰ ਕੋਈ ਚਾਰਾ ਨਹੀਂ ਹੈ।
Delhi Dharna
ਪੜਪੋਤਿਆਂ ਦੀ ਯਾਦ ਆਉਣ ਸਬੰਧੀ ਪੁਛੇ ਸਵਾਲ ਦੇ ਜਵਾਬ ਵਿਚ ਬਾਬੇ ਨੇ ਕਿਹਾ ਕਿ ਮੈਂ ਅੱਠ ਦਿਨ ਫਿਰੋਜ਼ਪੁਰ ਟੇਸ਼ਨ ’ਤੇ ਮੋਰਚੇ ਵਿਚ ਰਿਹਾ ਸਾਂ। ਜਦੋਂ ਮੇਰੇ ਸਾਥੀ ਮੈਨੂੰ ਬੁਲਾਉਣ ਆਉਂਦੇ ਸਨ ਤਾਂ ਰੌ ਪੈਂਦੇ ਸਨ। ਸਪੋਕਸਮੈਨ ਟੀਵੀ ਦੇ ਪੱਤਰਕਾਰ ਵਲੋਂ ਇਸ ਬਾਬੇ ਦੀ ਪੜੋਤਿਆ ਨਾਲ ਵੀਡੀਓ ਕਾਲ ਕਰਵਾਈ। ਦੋਵੇਂ ਪਾਸਿਉਂ ਜਜ਼ਬਾਤੀ ਦੁਆ-ਸਲਾਮ ਹੋਈ। ਬਾਬੇ ਨੇ ਪੜੋਤਿਆਂ ਨੂੰ ਮੁੜ ਜਜ਼ਬਾਤੀ ਸ਼ਬਦ ਬੋਲੇ ਜਿਸ ਤੋਂ ਬਾਅਦ ਦੋਵੇਂ ਪਾਸੇ ਮਾਹੌਲ ਸੰਜੀਦਗੀ ਭਰਪੂਰ ਹੋ ਗਿਆ। ਅੱਖਾਂ ਭਰ ਕੇ ਅਪਣੀ ਚੌਥੀ ਪੀੜ੍ਹੀ ਨੂੰ ਮੁਖਾਤਿਬ ਹੁੰਦਿਆਂ ਇਸ ਬਾਬੇ ਨੇ ਮੋਰਚਾ ਫਤਿਹ ਕਰ ਕੇ ਹੀ ਵਾਪਸ ਪਰਤਣ ਦਾ ਧਰਵਾਸਾ ਦਿਤਾ ਜਦਕਿ ਦੂਜੇ ਪਾਸੇ ਬਾਬੇ ਦੇ ਪੜਪੋਤਿਆਂ ਨੇ ਉਨ੍ਹਾਂ ਬਗੈਰ ਦਿਲ ਨਾ ਲੱਗਣ ਦੀ ਗੱਲ ਕਹੀ।
