ਰਾਜਨੀਤਕ ਮਾਹਰ ਮੰਨਦੇ ਹਨ ਕਿ ਇਸ ਵਾਰ ਪੰਜਾਬ ਤੋਂ ਹੋਈਆਂ ਦਲ ਬਦਲੀਆਂ ਨੇ ਪਿਛਲੇ ਸਾਰੇ ਰਿਕਾਰਡ ਤੋੜ ਕੇ ਰੱਖ ਦਿਤੇ ਹਨ।
PM Modi's Punjab visit: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ 23 ਤੇ 24 ਮਈ ਨੂੰ ਪੰਜਾਬ ਵਿਚ 3 ਚੋਣ ਰੈਲੀਆਂ ਨੂੰ ਸੰਬੋਧਨ ਕਰਨ ਅਰਥਾਤ ਪੰਜਾਬ ਆਮਦ ਮੌਕੇ ਇਥੋਂ ਦੇ ਕਾਂਗਰਸੀਆਂ ਲਈ ਭੁਲੇਖੇ ਪੈਣੇ ਜਾਂ ਗਲਤਫ਼ਹਿਮੀ ਪੈਦਾ ਹੋਣੀ ਸੁਭਾਵਕ ਹੈ ਕਿਉਂਕਿ ਮਾਲਵੇ ਦੇ ਕਾਂਗਰਸੀਆਂ ਲਈ 23 ਮਈ ਨੂੰ ਪਟਿਆਲਾ ਵਿਖੇ, ਜਦਕਿ 24 ਮਈ ਨੂੰ ਦੁਆਬੇ ਦੇ ਕਾਂਗਰਸੀਆਂ ਨੂੰ ਜਲੰਧਰ ਅਤੇ ਮਾਝੇ ਦੇ ਕਾਂਗਰਸੀਆਂ ਨੂੰ ਗੁਰਦਾਸਪੁਰ ਵਿਖੇ ਬਹੁਤ ਵੱਡੇ ਭੁਲੇਖੇ ਪੈਣਗੇ।
ਰਾਜਨੀਤਕ ਮਾਹਰਾਂ ਅਨੁਸਾਰ ਜਦੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਸਮੁੱਚੇ ਮਾਲਵਾ ਇਲਾਕੇ ਦੇ ਭਾਜਪਾ ਉਮੀਦਵਾਰਾਂ ਦੇ ਹੱਕ ਵਿਚ ਪਟਿਆਲੇ ਤੋਂ ਸੰਬੋਧਨ ਕਰਨਗੇ ਤਾਂ ਉਕਤ ਸਟੇਜ ’ਤੇ ਉਨ੍ਹਾਂ ਦੇ ਖੱਬੇ ਸੱਜੇ ਕੈਪਟਨ ਅਮਰਿੰਦਰ ਸਿੰਘ, ਸੁਨੀਲ ਕੁਮਾਰ ਜਾਖੜ, ਮਹਾਰਾਣੀ ਪ੍ਰਨੀਤ ਕੌਰ, ਮਨਪ੍ਰੀਤ ਸਿੰਘ ਬਾਦਲ, ਕੇਵਲ ਸਿੰਘ ਢਿੱਲੋਂ, ਰਾਣਾ ਗੁਰਮੀਤ ਸਿੰਘ ਸੋਢੀ, ਰਵਨੀਤ ਸਿੰਘ ਬਿੱਟੂ, ਸੁਸ਼ੀਲ ਰਿੰਕੂ, ਕਰਮਜੀਤ ਕੌਰ ਚੌਧਰੀ, ਫ਼ਤਹਿਜੰਗ ਸਿੰਘ ਬਾਜਵਾ ਵਰਗੇ ਕਿਸੇ ਸਮੇਂ ਮੂਹਰਲੀ ਕਤਾਰ ਦੇ ਸੀਨੀਅਰ ਕਾਂਗਰਸੀ ਰਹੇ ਆਗੂਆਂ ਦੀਆਂ ਕੁਰਸੀਆਂ ਦੇਖ ਕੇ ਅਤੇ ਪੰਡਾਲ ਵਿਚ ਵੀ ਉਪਰੋਕਤ ਦਰਸਾਏ ਗਏ ਭਾਜਪਾਈ ਬਣੇ ਆਗੂਆਂ ਦੇ ਨਾਲ ਜੁੜੇ ਪੰਚ, ਸਰਪੰਚ, ਕੌਂਸਲਰ, ਪ੍ਰਧਾਨ, ਮੇਅਰ ਅਤੇ ਹੋਰ ਵੱਖ-ਵੱਖ ਅਹੁਦਿਆਂ ’ਤੇ ਬਿਰਾਜਮਾਨ ਰਹੇ ਵਿਅਕਤੀਆਂ ਦੀ ਬਹੁਤਾਤ ਕਾਂਗਰਸੀ ਵਰਕਰਾਂ ਲਈ ਭੰਬਲਭੂਸੇ ਦਾ ਸਬੱਬ ਬਣੇਗੀ।
ਉਪਰੋਕਤ ਕਾਂਗਰਸ ਤੋਂ ਭਾਜਪਾਈ ਬਣੇ ਆਗੂਆਂ ਨੂੰ ਪ੍ਰਧਾਨ ਮੰਤਰੀ ਦੇ ਨਾਲ ਜਲੰਧਰ ਅਤੇ ਗੁਰਦਾਸਪੁਰ ਵਿਖੇ ਵੀ ਜਾਣਾ ਪਵੇਗਾ, ਉੱਥੇ ਵੀ ਅਜਿਹੀ ਸਥਿਤੀ ਹੀ ਦੇਖਣ ਨੂੰ ਮਿਲੇਗੀ, ਜਿੱਥੇ ਪੁਰਾਣੇ ਕਾਂਗਰਸੀ ਵਰਕਰਾਂ ਨੂੰ ਭੁਲੇਖੇ ਪੈਣਗੇ ਕਿ ਕਿਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਭੁਲੇਖੇ ਨਾਲ ਕਾਂਗਰਸ ਦੀ ਸਟੇਜ ਸਾਂਝੀ ਕਰ ਰਹੇ ਹਨ, ਕਿਉਂਕਿ ਕਾਂਗਰਸ ਲਈ ਪ੍ਰਚਾਰ ਕਰਨ ਵਾਲਿਆਂ ਅਤੇ ਅਜੇ ਤੱਕ ਕਾਂਗਰਸ ਦੇ ਝੰਡੇ ਝੰਡੀਆਂ ਸਾਂਭੀ ਬੈਠੇ ਵਫ਼ਾਦਾਰ ਕਾਂਗਰਸੀ ਵਰਕਰਾਂ ਲਈ ਇਹ ਪਲ ਦਿਲਚਸਪ, ਰੌਚਕ ਅਤੇ ਹੈਰਾਨੀਜਨਕ ਹੋਵੇਗਾ। ਰਾਜਨੀਤਕ ਮਾਹਰ ਮੰਨਦੇ ਹਨ ਕਿ ਇਸ ਵਾਰ ਪੰਜਾਬ ਤੋਂ ਹੋਈਆਂ ਦਲ ਬਦਲੀਆਂ ਨੇ ਪਿਛਲੇ ਸਾਰੇ ਰਿਕਾਰਡ ਤੋੜ ਕੇ ਰੱਖ ਦਿਤੇ ਹਨ।
(For more Punjabi news apart from PM Modi's Punjab visit will be a cause of trouble for Congress, stay tuned to Rozana Spokesman)
