ਜੀ.ਐਸ.ਟੀ. ਤੇ ਨੋਟ ਬੰਦੀ ਬੇਹੁਦਾ ਫ਼ੈਸਲੇ ਸਾਬਤ ਹੋਏ
ਚੰਡੀਗੜ੍ਹ : ਕਾਂਗਰਸ ਉਮੀਦਵਾਰਾਂ ਦੀ ਰੈਲੀ ਵਿਚ ਚੋਣ ਪ੍ਰਚਾਰ ਕਰਨ ਆਏ ਸੀਨੀਅਰ ਨੇਤਾ ਅਤੇ ਸਾਬਕਾ ਮੰਤਰੀ ਅਨੰਦ ਸ਼ਰਮਾ ਨੇ ਅੱਜ ਦੁਪਹਿਰੇ ਕੀਤੀ ਪ੍ਰੈਸ ਕਾਨਫ਼ਰੰਸ ਵਿਚ ਦਾਅਵਾ ਕੀਤਾ ਕਿ ਮੌਜੂਦਾ ਲੋਕ ਸਭਾ ਚੋਣਾਂ ਵਿਚ ਕਾਂਗਰਸ ਪਾਰਟੀ ਹੀ ਸੱਭ ਤੋਂ ਵੱਡੀ ਅਤੇ ਮੋਹਰੀ ਪਾਰਟੀ ਬਣ ਕੇ ਸਾਹਮਣੇ ਆਵੇਗੀ।
Modi
ਡਾ. ਮਨਮੋਹਨ ਸਿੰਘ ਸਰਕਾਰ ਦੇ 10 ਸਾਲਾਂ ਦੇ ਕਾਰਜਕਾਲ ਅਤੇ ਕੇਂਦਰ ਵਿਚ ਭਾਜਪਾ ਦੀ ਮੋਦੀ ਸਰਕਾਰ ਦੇ ਪਿਛਲੇ 5 ਸਾਲਾਂ ਦੀ ਕਾਰਗੁਜ਼ਾਰੀ ਦੀ ਤੁਲਨਾ ਕਰਦੇ ਹੋਏ ਆਨੰਦ ਸ਼ਰਮਾ ਨੇ ਕਿਹਾ ਕਿ ਮੋਦੀ ਸਰਕਾਰ ਵੇਲੇ ਅਪਣੀਆਂ ਗ਼ਲਤ ਨੀਤੀਆਂ ਅਤੇ ਆਰਥਕ ਖੇਤਰ ਵਿਚ ਕੀਤੇ ਬੇਹੁਦਾ ਫ਼ੈਸਲਿਆਂ ਕਾਰਨ ਨੌਜੁਆਨਾਂ ਤੇ ਕਿਰਤੀਆਂ ਨੂੰ 5 ਕਰੋੜ ਨੌਕਰੀਆਂ ਤੋਂ ਲਾਂਭੇ ਕੀਤਾ ਗਿਆ। ਉਨ੍ਹਾਂ ਕਿਹਾ ਕਿ ਜੀ.ਐਸ.ਟੀ. ਤੇ ਨੋਟ ਬੰਦੀ ਕਾਰਨ ਲੱਖਾਂ ਕਾਰੋਬਾਰ ਬੰਦ ਹੋ ਗਏ।
Punjab election
ਚੋਣਾਂ ਦੇ ਆਖਰੀ ਗੇੜ 19 ਮਈ ਨੂੰ ਵੋਟਾਂ ਪਾਉਣ ਉਪਰੰਤ 23 ਮਈ ਨੂੰ ਗਿਣਤੀ ਵਾਲੇ ਦਿਨ ਮੁਲਕ ਵਿਚ ਕਾਂਗਰਸ ਪਾਰਟੀ ਨੂੰ ਸਭ ਤੋਂ ਵੱਡੀ ਗਿਣਤੀ ਵਾਲੇ ਮੈਂਬਰਾਂ ਦਾ ਦਲ ਸਾਹਮਣੇ ਆਉਣ ਦਾ ਭਰੋਸਾ ਜਿਤਾਉਂਦੇ ਹੋਏ ਇਸ ਨੇਤਾ ਨੇ ਕਿਹਾ ਕਿ ਸਾਰੀਆਂ ਗ਼ੈਰ ਭਾਜਪਾ ਗਰੁਪਾਂ ਦੀ ਸਾਂਝੀ ਬੈਠਕ ਹੋਵੇਗੀ ਜਿਸ ਵਿਚ ਅਗਲੀ ਸਰਕਾਰ ਬਣਾਉਣ ਬਾਰੇ ਵਿਚਾਰ ਚਰਚਾ ਹੋਵੇਗੀ।
Congress Party
ਪਿਛਲੇ 30 ਕੁ ਸਾਲਾਂ ਤੋਂ ਬਤੌਰ ਰਾਜ ਸਭਾ ਮੈਂਬਰ ਅਤੇ ਕਾਂਗਰਸ ਹਾਈ ਕਮਾਂਡ ਨਾਲ ਜੁੜੇ ਇਸ ਹਿਮਾਚਲੀ ਲੀਡਰ ਨੇ ਪ੍ਰੈੱਸ ਕਾਨਫ਼ਰੰਸ ਵਿਚ ਲਗਭਗ ਇਕ ਘੰਟੇ ਤੋਂ ਵਧ ਸਮਾਂ ਸਿਰਫ਼ ਪ੍ਰਧਾਨ ਮੰਤਰੀ ਮੋਦੀ ਕੀ ਕਾਰਜਸ਼ੈਲੀ ਦੀ ਆਲੋਚਨਾ ਕੀਤੀ। ਕਾਂਗਰਸ ਵਲੋਂ ਜਾਰੀ ਚੋਣ ਮੈਨੀਫ਼ੈਸਟੋ ਬਾਰੇ ਉਨ੍ਹਾਂ ਕਿਹਾ ਕਿ ਭਵਿਖ ਵਿਚ ਕੇਂਦਰ ਦੀ ਕਾਂਗਰਸ ਅਗਵਾਈ ਵਾਲੀ ਸਰਕਾਰ ਨੌਜੁਆਨਾਂ ਵਾਸਤੇ 5 ਕਰੋੜ ਨਵੀਆਂ ਨੌਕਰੀਆਂ ਦਾ ਪ੍ਰਬੰਧ ਕਰੇਗੀ।
