ਹਾਈਕੋਰਟ ਨੇ ਅਜਿਹਾ ਕੁੱਝ ਲਿਖਵਾਉਣ 'ਤੇ ਲਗਾਈ ਪਾਬੰਦੀ
ਚੰਡੀਗੜ੍ਹ: ਅਪਣੀਆਂ ਕਾਰਾਂ, ਮੋਟਰਸਾਈਕਲਾਂ ਅਤੇ ਹੋਰ ਵਾਹਨਾਂ 'ਤੇ ਅਪਣਾ ਗੋਤ, ਪੇਸ਼ੇ ਦਾ ਨਾਮ ਅਤੇ ਹੋਰ ਸੈਲੀਬ੍ਰਿਟੀ ਸਟੇਟਸ ਲਿਖਵਾਉਣਾ ਹੁਣ ਤੁਹਾਨੂੰ ਕਾਫ਼ੀ ਮਹਿੰਗਾ ਪੈ ਸਕਦਾ ਹੈ ਕਿਉਂਕਿ ਅਜਿਹਾ ਕਰਨ ਵਾਲਿਆਂ ਨੂੰ ਹੁਣ ਚੰਡੀਗੜ੍ਹ ਵਿਚ ਭਾਰੀ ਜੁਰਮਾਨੇ ਦਾ ਸਾਹਮਣਾ ਕਰਨਾ ਪੈ ਸਕਦੈ। ਜੀ ਹਾਂ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਨੇ ਸਾਰੇ ਸਰਕਾਰੀ ਅਤੇ ਗ਼ੈਰ ਸਰਕਾਰੀ ਵਾਹਨਾਂ 'ਤੇ ਗੋਤ, ਪੇਸ਼ੇ ਦੇ ਨਾਮ, ਸੰਗਠਨ ਅਤੇ ਸੈਲੀਬ੍ਰਿਟੀ ਸਟੇਟਸ ਦੇ ਹੋਰ ਪ੍ਰਤੀਕਾਂ ਨੂੰ ਲਿਖਵਾਉਣ 'ਤੇ ਪਾਬੰਦੀ ਲਗਾ ਦਿੱਤੀ ਹੈ।
Photo
ਇੱਥੋਂ ਤਕ ਕਿ ਨਿਆਂਇਕ ਅਧਿਕਾਰੀਆਂ ਦੇ ਵਾਹਨਾਂ ਨੂੰ ਵੀ ਕੋਈ ਛੂਟ ਨਹੀਂ ਦਿੱਤੀ ਗਈ। ਹਾਈਕੋਰਟ ਨੇ ਚੰਡੀਗੜ੍ਹ ਪੁਲਿਸ ਨੂੰ ਆਦੇਸ਼ ਜਾਰੀ ਕੀਤੇ ਨੇ ਕਿ ਉਹ ਅਜਿਹਾ ਲਿਖਣ ਵਾਲਿਆਂ ਵਿਰੁੱਧ ਕਾਰਵਾਈ ਕਰੇ। ਹਾਈਕੋਰਟ ਵੱਲੋਂ ਦਿੱਤੇ ਗਏ ਆਦੇਸ਼ ਮੁਤਾਬਕ ਵਾਹਨਾਂ 'ਤੇ ਸਟਿੱਕਰ ਅਤੇ ਆਰਮੀ, ਨੌਸੈਨਾ, ਪ੍ਰੈੱਸ, ਪ੍ਰਧਾਨ, ਉਪ ਪ੍ਰਧਾਨ, ਪੁਲਿਸ, ਕੋਰਟ, ਡਾਕਟਰ, ਡੀਸੀ, ਮੇਅਰ, ਵਿਧਾਇਕ ਆਦਿ ਸ਼ਬਦ ਲਿਖਵਾਉਣ 'ਤੇ ਰੋਕ ਲਗਾ ਦਿੱਤੀ ਗਈ ਹੈ।
Photo
ਸਿਰਫ਼ ਐਂਬੂਲੈਂਸ ਅਤੇ ਫਾਇਰ ਬ੍ਰਿਗੇਡ ਦੇ ਵਾਹਨਾਂ ਨੂੰ ਛੂਟ ਦਿੱਤੀ ਗਈ ਐ। ਇਸ ਤੋਂ ਇਲਾਵਾ ਪਾਰਕਿੰਗ ਨੂੰ ਲੈ ਕੇ ਲੱਗੇ ਸਟਿੱਕਰਾਂ 'ਤੇ ਕੋਈ ਪਾਬੰਦੀ ਨਹੀਂ। ਹਾਈਕੋਰਟ ਦੇ ਆਦੇਸ਼ ਮੁਤਾਬਕ ਵਾਹਨਾਂ ਇਸ ਤਰ੍ਹਾਂ ਦੇ ਪ੍ਰਤੀਕ ਹਟਾਉਣ ਲਈ 72 ਘੰਟੇ ਦਾ ਸਮਾਂ ਦਿੱਤਾ ਗਿਐ, ਜੇਕਰ ਤੋਂ ਇਸ ਬਾਅਦ ਕੋਈ ਵਾਹਨ ਆਦੇਸ਼ਾਂ ਦੀ ਉਲੰਘਣਾ ਕਰਦਾ ਫੜਿਆ ਗਿਆ ਤਾਂ ਉਸ ਵਿਰੁੱਧ ਬਣਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
Photo
ਖ਼ਾਸ ਗੱਲ ਇਹ ਹੈ ਕਿ ਜਸਟਿਸ ਰਾਜੀਵ ਸ਼ਰਮਾ ਨੇ ਇਹ ਆਦੇਸ਼ ਜਾਰੀ ਕਰਨ ਤੋਂ ਬਾਅਦ ਸਭ ਤੋਂ ਪਹਿਲਾਂ ਅਪਣੇ ਹੀ ਵਾਹਨ ਤੋਂ ਅਪਣੇ ਸਟਾਫ਼ ਨੂੰ ਇਸ ਤਰ੍ਹਾਂ ਦੇ ਪ੍ਰਤੀਕ ਹਟਾਉਣ ਦੇ ਆਦੇਸ਼ ਦਿੱਤੇ। ਇਸ ਤੋਂ ਪਹਿਲਾਂ ਉਹ ਹਿਮਾਚਲ ਪ੍ਰਦੇਸ਼ ਅਤੇ ਉਤਰਾਖੰਡ ਵਿਚ ਵੀ ਇਸ ਤਰ੍ਹਾਂ ਦੇ ਆਦੇਸ਼ ਜਾਰੀ ਕਰਕੇ ਵਾਹਨਾਂ ਤੋਂ ਨਾਮ ਅਤੇ ਅਹੁਦਾ ਲਿਖਣ 'ਤੇ ਪਾਬੰਦੀ ਲਗਾ ਚੁੱਕੇ ਨੇ। ਇਹ ਆਦੇਸ਼ ਜਾਰੀ ਕਰਦਿਆਂ ਜਸਟਿਸ ਰਾਜੀਵ ਸ਼ਰਮਾ ਨੇ ਵਾਹਨਾਂ 'ਤੇ ਲਿਖੇ ਕੁੱਝ ਪ੍ਰਤੀਕਾਂ ਦੇ ਕਿੱਸੇ ਵੀ ਸਾਂਝੇ ਕੀਤੇ।
Photo
ਜਸਟਿਸ ਸ਼ਰਮਾ ਨੇ ਕਿਹਾ ਕਿ ਅਪਣੇ ਵਾਹਨ 'ਤੇ ਵਿਧਾਇਕ, ਚੇਅਰਮੈਨ, ਪੁਲਿਸ, ਆਰਮੀ ਅਤੇ ਪ੍ਰੈੱਸ ਆਦਿ ਲਿਖਵਾਉਣਾ ਤਾਂ ਸਮਝ ਵਿਚ ਆਉਂਦਾ ਐ ਪਰ ਕੁੱਝ ਲੋਕ ਤਾਂ ਇਸ ਮਾਮਲੇ ਵਿਚ ਹੱਣ ਹੀ ਕਰ ਦਿੰਦੇ ਨੇ। ਉਨ੍ਹਾਂ ਦੇਖਿਆ ਕਿ ਇਕ ਵਾਹਨ 'ਤੇ ਲਿਖਿਆ ਹੋਇਆ ਸੀ 'ਵਿਧਾਇਕ ਦਾ ਗੁਆਂਢੀ'। ਇਸੇ ਤਰ੍ਹਾਂ ਇਕ ਵਾਹਨ 'ਤੇ ਸਾਬਕਾ ਵਿਧਾਇਕ ਦੀ ਤਖ਼ਤੀ ਲੱਗੀ ਵੀ ਉਨ੍ਹਾਂ ਨੇ ਦੇਖੀ।
ਜਸਟਿਸ ਸ਼ਰਮਾ ਨੇ ਕਿਹਾ ਕਿ ਇਹ ਸਭ ਕੁੱਝ ਅਪਣੀ ਧੌਂਸ ਜਮਾਉਣ ਲਈ ਕੀਤਾ ਜਾਂਦਾ ਹੈ ਪਰ ਸੜਕ 'ਤੇ ਹਰ ਵਿਅਕਤੀ ਬਰਾਬਰ ਹੈ। ਹੁਣ ਜੇ ਤੁਸੀਂ ਵੀ ਅਪਣੇ ਵਾਹਨ 'ਤੇ ਅਪਣਾ ਅਹੁਦਾ, ਪੇਸ਼ਾ ਜਾਂ ਕੁੱਝ ਹੋਰ ਲਿਖਵਾਇਆ ਹੋਇਐ, ਜਿਸ ਨਾਲ ਅਦਾਲਤ ਦੇ ਹੁਕਮਾਂ ਦੀ ਉਲੰਘਣਾ ਹੁੰਦੀ ਹੋਵੇ ਤਾਂ ਤੁਰੰਤ ਉਸ ਨੂੰ ਹਟਾ ਦਿਓ ਕਿਉਂਕਿ ਨਹੀਂ ਤਾਂ ਤੁਹਾਨੂੰ ਭਾਰੀ ਜੁਰਮਾਨੇ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
