ਪੁਲਿਸ ਨੇ ਇਹਨਾਂ ਤਿੰਨਾਂ ਖ਼ਿਲਾਫ਼ ਧਾਰਾ 420, 465, 468, 471, 120ਬੀ ਤਹਿਤ ਕੇਸ ਦਰਜ ਕਰ ਲਿਆ ਹੈ।
ਫਾਜ਼ਿਲਕਾ: ਨੌਕਰੀ ਦਿਵਾਉਣ ਦੇ ਨਾਂ ’ਤੇ 5.50 ਲੱਖ ਰੁਪਏ ਦੀ ਠੱਗੀ ਮਾਰਨ ਦੇ ਮਾਮਲੇ ਵਿਚ ਪੁਲਿਸ ਨੇ ਮਲਕੀਤ ਸਿੰਘ ਹੀਰਾ (ਮੌਜੂਦਾ ਅਕਾਲੀ ਆਗੂ) ਅਤੇ ਉਹਨਾਂ ਦੇ ਪੁੱਤਰ ਸਮੇਤ ਤਿੰਨ ਵਿਅਕਤੀਆਂ ਖ਼ਿਲਾਫ਼ ਥਾਣਾ ਸਦਰ ਪੁਲਿਸ ਨੇ ਕੇਸ ਦਰਜ ਕੀਤਾ ਹੈ। ਜਾਂਚ ਅਧਿਕਾਰੀ ਭੁਪਿੰਦਰ ਸਿੰਘ ਨੇ ਦੱਸਿਆ ਕਿ ਉਹਨਾਂ ਕੋਲ ਕਮਲਜੀਤ ਸਿੰਘ ਵਾਸੀ ਈਸ਼ਰਰਾਮ ਵੱਲੋਂ ਦਰਜ ਕਰਵਾਈ ਗਈ ਸੀ।
ਉਹਨਾਂ ਦੱਸਿਆ ਕਿ ਉਸ ਨੇ ਹੈਲਥ ਸੈਨੇਟਰੀ ਇੰਸਪੈਕਟਰ ਦਾ ਕੋਰਸ ਕੀਤਾ ਸੀ। ਸਾਲ 2020 ਵਿਚ ਉਸ ਦੀ ਮੁਲਾਕਾਤ ਮਲਕੀਤ ਸਿੰਘ ਹੀਰਾ ਵਾਸੀ ਚੱਕ ਮੋਚਨ ਵਾਲਾ ਨਾਲ ਹੋਈ। ਉਸ ਨੇ ਉਸ ਨੂੰ ਭਰੋਸਾ ਦਿਵਾਇਆ ਕਿ ਉਸ ਦੀ ਵੱਡੇ ਆਗੂਆਂ ਨਾਲ ਪਛਾਣ ਹੈ ਅਤੇ ਉਹ ਉਸ ਨੂੰ ਸਿਹਤ ਵਿਭਾਗ ਵਿਚ ਕਲਰਕ ਵਜੋਂ ਨੌਕਰੀ ਦਿਵਾ ਸਕਦਾ ਹੈ। ਨੌਕਰੀ ਦਿਵਾਉਣ ਲਈ ਸਾਢੇ ਪੰਜ ਲੱਖ ਰੁਪਏ ਵਿਚ ਸੌਦਾ ਹੋਇਆ ਸੀ।
ਕਮਲਜੀਤ ਨੇ 25 ਫਰਵਰੀ 2020 ਨੂੰ ਮਲਕੀਤ ਨੂੰ 2 ਲੱਖ ਰੁਪਏ ਨਕਦ ਅਤੇ ਉਸ ਦੇ ਸਾਰੇ ਵਿਦਿਅਕ ਸਰਟੀਫਿਕੇਟਾਂ ਦੀਆਂ ਫੋਟੋ ਕਾਪੀਆਂ ਦਿੱਤੀਆਂ। ਮਲਕੀਤ ਸਿੰਘ ਨੇ ਉਸ ਨੂੰ ਭਰੋਸਾ ਦਿੱਤਾ ਸੀ ਕਿ ਉਹ ਉਸ ਦੀ ਨੌਕਰੀ ਪੱਕੀ ਹੈ। ਇਸ ਤੋਂ ਬਾਅਦ 13 ਮਈ 2020 ਨੂੰ ਮਲਕੀਤ ਉਸ ਦੇ ਘਰ ਆਇਆ ਅਤੇ ਡੇਢ ਲੱਖ ਰੁਪਏ ਨਕਦ ਲੈ ਗਿਆ। ਫਿਰ 23 ਨਵੰਬਰ 2020 ਨੂੰ ਬਕਾਇਆ 2 ਲੱਖ ਰੁਪਏ ਦਿੱਤੇ ਗਏ।
ਰਕਮ ਲੈਣ ਤੋਂ ਬਾਅਦ ਮਲਕੀਤ ਨੇ ਕਮਲਜੀਤ ਨੂੰ ਜਾਅਲੀ ਜੁਆਇਨਿੰਗ ਲੈਟਰ ਦੇ ਦਿੱਤਾ। ਜਦੋਂ ਕਮਲਜੀਤ ਅਤੇ ਉਸ ਦੇ ਪਿਤਾ ਪੂਰਨ ਚੰਦ ਨੂੰ ਸ਼ੱਕ ਹੋਇਆ ਤਾਂ ਉਹਨਾਂ ਨੇ ਮਲਕੀਤ ਨੂੰ ਜੁਆਈਨਿੰਗ ਵਾਲੀ ਜਗ੍ਹਾ ਬਾਰੇ ਪੁੱਛਿਆ। ਵਾਰ-ਵਾਰ ਪੁੱਛਣ 'ਤੇ ਮਲਕੀਤ ਨੇ ਉਸ ਨੂੰ ਕਿਹਾ ਕਿ ਉਹ ਜਾਂ ਤਾਂ ਜੁਆਇਨਿੰਗ ਲੈਟਰ ਠੀਕ ਕਰਵਾ ਦੇਵੇਗਾ ਜਾਂ ਫਿਰ ਰਕਮ ਵਾਪਸ ਕਰ ਦੇਵੇਗਾ।
ਰਕਮ ਵਾਪਸ ਨਾ ਕਰਨ ’ਤੇ ਕਮਲਜੀਤ ਨੇ ਮਲਕੀਤ ਤੋਂ ਪੈਸੇ ਵਾਪਸ ਮੰਗੇ ਤਾਂ ਮਲਕੀਤ ਨੇ ਕਿਹਾ ਕਿ ਉਸ ਨੇ ਸਾਰੀ ਰਕਮ ਚਰਨਜੀਤ ਸਿੰਘ ਵਾਸੀ ਪਿੰਡ ਭੁੱਲਰ ਬਨਭੌਰਾ ਜ਼ਿਲ੍ਹਾ ਮਾਲੇਰਕੋਟਲਾ ਨੂੰ ਦੇ ਦਿੱਤੀ ਹੈ। ਜਦੋਂ ਉਹ ਪੈਸੇ ਲੈਣ ਲਈ ਚਰਨਜੀਤ ਕੋਲ ਗਏ ਤਾਂ ਉਸ ਨੇ ਕਮਲਜੀਤ ਨੂੰ 5 ਲੱਖ ਰੁਪਏ ਦਾ ਚੈੱਕ ਦੇ ਦਿੱਤਾ ਪਰ ਚੈੱਕ ਜਿਸ ਖਾਤੇ ਦਾ ਸੀ, ਉਸ ਦੇ ਖਾਤੇ ਵਿਚ ਪੈਸੇ ਨਹੀਂ ਸਨ। ਇਸ ਤਰ੍ਹਾਂ ਮਲਕੀਤ ਸਿੰਘ ਹੀਰਾ, ਮਨਜਿੰਦਰ ਸਿੰਘ ਅਤੇ ਚਰਨਜੀਤ ਸਿੰਘ ਨੇ ਮਿਲ ਕੇ ਉਸ ਨਾਲ ਧੋਖਾਧੜੀ ਕੀਤੀ। ਇਸ ਆਧਾਰ ’ਤੇ ਪੁਲਿਸ ਨੇ ਇਹਨਾਂ ਤਿੰਨਾਂ ਖ਼ਿਲਾਫ਼ ਧਾਰਾ 420, 465, 468, 471, 120ਬੀ ਤਹਿਤ ਕੇਸ ਦਰਜ ਕਰ ਲਿਆ ਹੈ।
