ਅਮਰੀਕੀ ਸਫ਼ੀਰ ਸ੍ਰੀ ਕੈਨੇਥ ਆਈ ਜਸਟਰ ਅੱਜ ਸ਼ਾਮੀ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਅਤੇ ਸਾਬਕਾ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੂੰ ਪਾਰਟੀ...........
ਚੰਡੀਗੜ੍ਹ : ਅਮਰੀਕੀ ਸਫ਼ੀਰ ਸ੍ਰੀ ਕੈਨੇਥ ਆਈ ਜਸਟਰ ਅੱਜ ਸ਼ਾਮੀ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਅਤੇ ਸਾਬਕਾ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੂੰ ਪਾਰਟੀ ਦੇ ਮੁੱਖ ਦਫ਼ਤਰ ਵਿਚ ਮਿਲੇ। ਦੋਹਾਂ ਵਿਚਕਾਰ ਇਹ ਮੀਟਿੰਗ ਤਕਰੀਬਨ 45 ਮਿੰਟ ਚੱਲੀ। ਸਾਬਕਾ ਕੈਬਨਿਟ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਵੀ ਇਸ ਮੀਟਿੰਗ ਵਿਚ ਹਾਜ਼ਰ ਸਨ। ਇਸ ਮੌਕੇ ਸ. ਬਾਦਲ ਨੇ ਅਮਰੀਕਾ ਵਿਚ ਸਿੱਖ ਭਾਈਚਾਰੇ ਨੂੰ ਪੇਸ਼ ਮੁਸ਼ਕਲਾਂ ਦਾ ਮੁੱਦਾ ਉਠਾਇਆ। ਉਨ੍ਹਾਂ ਨੇ ਹਾਲ ਹੀ ਵਿਚ ਅਮਰੀਕਾ ਅੰਦਰ ਸਿੱਖਾਂ ਉਤੇ ਹੋਏ ਨਸਲੀ ਹਮਲਿਆਂ ਬਾਰੇ ਦਸਿਆ।
ਸ. ਬਾਦਲ ਨੇ ਸ੍ਰੀ ਕੈਨੇਥ ਆਈ ਜਸਟਰ ਨੂੰ ਅਪੀਲ ਕੀਤੀ ਕਿ ਦਿੱਲੀ ਸਿੱਖ ਗੁਰਦੁਆਰਾ ਮੈਨੇਜਮੈਂਟ ਕਮੇਟੀ ਦੇ ਪ੍ਰਧਾਨ ਸਰਦਾਰ ਮਨਜੀਤ ਸਿੰਘ ਜੀਕੇ ਉੱਪਰ ਉਹਨਾਂ ਦੇ ਅਮਰੀਕੀ ਦੌਰੇ ਦੌਰਾਨ ਹਮਲਾ ਕਰਨ ਵਾਲੇ ਦੋਸ਼ੀਆਂ ਖ਼ਿਲਾਫ ਜਲਦੀ ਕਾਰਵਾਈ ਨੂੰ ਯਕੀਨੀ ਬਣਾਉਣ। ਸ੍ਰੀ ਜਸਟਰ ਨੇ ਸਰਦਾਰ ਬਾਦਲ ਨੂੰ ਭਰੋਸਾ ਦਿਵਾਇਆ ਕਿ ਇਸ ਮਾਮਲੇ ਵਿਚ ਜਲਦੀ ਇਨਸਾਫ ਦਿਵਾਉਣ ਲਈ ਉਹ ਆਪਣੀ ਪੂਰੀ ਵਾਹ ਲਾਉਣਗੇ। ਸ੍ਰੀ ਜਸਟਰ ਨੇ ਇਹ ਵੀ ਭਰੋਸਾ ਦਿਵਾਇਆ ਕਿ ਉਹਨਾਂ ਦੇ ਮੁਲਕ ਦੀ ਪੰਜਾਬ ਨਾਲ ਆਰਥਿਕ ਸਹਿਯੋਗ ਵਧਾਉਣ ਵਿਚ ਦਿਲਚਸਪੀ ਵਧ ਰਹੀ ਹੈ।
ਇਸ ਮੌਕੇ ਸਰਦਾਰ ਬਾਦਲ ਨਾਲ ਮੀਟਿੰਗ ਵਿਚ ਡਾਕਟਰ ਦਲਜੀਤ ਸਿੰਘ ਚੀਮਾ, ਸ੍ਰੀ ਹਰਚਰਨ ਬੈਂਸ ਅਤੇ ਸ੍ਰੀ ਬੰਟੀ ਰੋਮਾਣਾ ਨੇ ਵੀ ਭਾਗ ਲਿਆ। ਦੂਜੇ ਪਾਸੇ ਅਮਰੀਕੀ ਸਫ਼ੀਰ ਨਾਲ ਏਰੀਅਲ ਐਚ ਪੋਲੌਕ ਫਸਟ ਅਫ਼ਸਰ (ਨਾਰਥ ਇੰਡੀਆ), ਸ੍ਰੀ ਨਥਾਨੇਲ ਫ਼ਾਰਾਰ, ਨਾਰਥ ਇੰਡੀਆ ਦਫ਼ਤਰ ਪੋਲੀਟੀਕਲ ਅਫ਼ਸਰ ਅਤੇ ਸ੍ਰੀ ਰੌਬਿਨ ਬਾਂਸਲ, ਨਾਰਥ ਇੰਡੀਆ ਦਫ਼ਤਰ ਕਲਚਰ ਅਫੇਅਰਜ਼ ਸਪੈਸ਼ਲਿਸਟ ਹਾਜ਼ਰ ਸਨ।
