ਜਗਤਾਰ ਸਿੰਘ ਸੰਘੇੜਾ ਦੀ ਰੋਜ਼ਾਨਾ ਸਪੋਕਸਮੈਨ ਨਾਲ ਖ਼ਾਸ ਗੱਲਬਾਤ
ਮੁਹਾਲੀ : ਪੰਜਾਬ ਮੰਡੀ ਬੋਰਡ ਵਿਚ ਲੰਬਾ ਸਮਾਂ ਕੰਮ ਕਰਨ ਵਾਲੇ ਜਗਤਾਰ ਸਿੰਘ ਸੰਘੇੜਾ ਨੇ ਸਪੋਕਸਮੈਨ ਦੇ ਮੈਨੇਜਿੰਗ ਐਡੀਟਰ ਨਿਮਰਤ ਕੌਰ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਕੇਂਦਰ ਸਰਕਾਰ ਤਾਂ ਕਿਸਾਨਾਂ ਦੀ ਸਾਹ ਨਾੜੀ ਕੱਟਣ ’ਤੇ ਲੱਗੀ ਹੋਈ ਹੈ, ਉਨ੍ਹਾਂ ਕਿਹਾ ਕਿ ਕੇਂਦਰ ਸਰਕਾਰ ਦੁਆਰਾ ਲਿਆਂਦੇ ਖੇਤੀ ਬਿੱਲ ਪੰਜਾਬ ਦੇ ਕਿਸਾਨਾਂ ਅਤੇ ਪੰਜਾਬ ਮੰਡੀਬੋਰਡ ਨੂੰ ਪੂਰੀ ਤਰ੍ਹਾ ਤਬਾਹ ਕਰ ਦੇਣਗੇ । ਪੰਜਾਬ ਦਾ ਮੰਡੀਬੋਰਡ ਕਿਸਾਨੀ ਦੇ ਨਾਲ-ਨਾਲ ਪਿੰਡਾਂ ਦੀ ਰੀੜ੍ਹ ਦੀ ਹੱਡੀ ਹੈ। ਉਸ ਦੇ ਟੁੱਟਣ ਨਾਲ ਕਿਸਾਨ ਆਪਣੇ ਆਪ ਖਤਮ ਹੋ ਜਾਵੇਗਾ ।
Farmer
ਉਨ੍ਹਾਂ ਕਿਹਾ ਕਿ ਮੰਡੀਬੋਰਡ ਵੱਲੋਂ ਮੰਡੀ ਵਿਚ ਕੰਮ ਕਰਨ ਵਾਲੇ ਕਿਸਾਨਾਂ ਤੇ ਮਜ਼ਦੂਰਾਂ ਦਾ ਬੀਮਾ ਕੀਤਾ ਹੋਇਆ ਹੁੰਦਾ ਹੈ । ਜੇਕਰ ਮੰਡੀ ਵਿਚ ਕੰਮ ਕਰਦੇ ਕਿਸਾਨ ਜਾ ਮਜ਼ਦੂਰ ਦੀ ਮੌਤ ਹੋ ਜਾਂਦੀ ਹੈ ਤਾਂ ਮੰਡੀ ਬੋਰਡ ਉਨ੍ਹਾਂ ਦੇ ਪਰਿਵਾਰ ਨੂੰ 5 ਲੱਖ ਦਾ ਮੁਆਵਜ਼ਾ ਦਿੰਦਾ ਹੈ ਪਰ ਕੇਂਦਰ ਸਰਕਾਰ ਇਹ ਸਭ ਕੁੱਝ ਖਤਮ ਕਰਨਾ ਚਾਹੁੰਦੀ ਹੈ । ਉਨ੍ਹਾਂ ਕਿਹਾ ਕਿ ਜੇਕਰ ਕਿਸਾਨ ਆਪਣੇ ਬੱਚਿਆਂ ਦਾ ਵਿਆਹ ਚੰਗੇ ਢੰਗ ਨਾਲ ਕਰ ਰਿਹਾ ਹੈ ਤਾਂ ਕੇਂਦਰ ਨੂੰ ਇਹ ਵੀ ਚੁੱਭ ਰਿਹਾ ਹੈ ।
ਅਸਲ ਵਿਚ ਸਰਕਾਰਾਂ ਤਾਂ ਕਿਸਾਨਾਂ ਨੂੰ ਗਰੀਬ ਹੀ ਰੱਖਣਾ ਚਾਹੁੰਦੀਆਂ ਹਨ । ਸਰਦਾਰ ਸੰਘੇੜਾ ਨੇ ਕਿਹਾ ਕਿ ਜਦੋਂ ਕੋਈ ਵਪਾਰੀ ਆਪਣੀ ਚੀਜ ਬਣਾ ਕੇ ਬਾਜਾਰ ਵਿਚ ਵੇਚਦਾ ਹੈ ਤਾਂ ਆਪਣੀ ਚੀਜ਼ ਦੀ ਕੀਮਤ ਦਾ ਟੈਗ ਜ਼ਰੂਰ ਲਾਉਂਦਾ ਹੈ ਪਰ ਬਦਕਿਸਮਤੀ ਇਹ ਹੈ ਕਿ ਜਦੋਂ ਕਿਸਾਨ ਆਪਣੀ ਫ਼ਸਲ ਦੀ ਮੰਡੀ ਵਿਚ ਢੇਰੀ ਲਾਉਂਦਾ ਹੈ ਤਾਂ ਕਿਸਾਨ ਅਜਿਹਾ ਨਹੀਂ ਕਰ ਪਾਉਂਦਾ । ਉਨ੍ਹਾਂ ਕਿਹਾ ਕਿ ਬੈਂਕਾਂ ਨੇ ਕਿਸਾਨਾਂ ਨੂੰ ਕਰਜੇ ਦੇ ਕੇ ਸਭ ਤੋਂ ਜ਼ਿਆਦਾ ਕਮਜ਼ੋਰ ਕੀਤਾ ਹੈ ਕਿਉਂਕਿ ਬੈਕਾਂ ਦਾ ਕੰਮ ਮੁਨਾਫਾ ਕਮਾਉਣਾ ਹੈ, ਕਿਸਾਨ ਬੈਕਾਂ ਦੇ ਕਰਜ਼ੇ ਦੇ ਜਾਲ ਵਿਚ ਫਸ ਕੇ ਆਪਣੀ ਆਰਥਿਕ ਲੁੱਟ ਕਰਵਾਉਂਦਾ ਹੈ ।
ਬੈਂਕ ਵੱਲੋ ਦਿੱਤੇ ਕਰਜੇ ਨਾਲ ਕਿਸਾਨ ਹੋਰ ਕਰਜ਼ਈ ਹੋਇਆ ਹੈ ਕਿਉਂਕਿ ਬੈਂਕਾਂ ਨੇ ਆਪਣੇ ਕਰਜੇ ਦੇ ਟਾਰਗੇਟ ਪੂਰੇ ਕਰਨੇ ਹੁੰਦੇ ਹਨ । ਬੈਂਕ ਕਿਸਾਨਾਂ ਲਈ ਸਹਾਈ ਹੋਣ ਦੀ ਥਾਂ ਨੁਕਸਾਨ ਦੇਹ ਸਾਬਿਤ ਹੋਏ ਹਨ । ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਕੋਲੋਂ ਆਪਣੇ ਮੁਲਾਜ਼ਮਾਂ ਨੂੰ ਤਨਖਾਹਾਂ ਨਹੀਂ ਦਿੱਤੀਆਂ ਜਾ ਰਹੀਆਂ, ਪੰਜਾਬ ਸਰਕਾਰ ਮੰਡੀਬੋਰਡ ਦਾ ਪੈਸਾ ਯਾਦਗਾਰਾਂ ਬਣਾਉਣ ਲਈ ਵਰਤ ਰਹੀ ਹੈ ਜਦਕਿ ਇਹ ਮੰਡੀ ਬੋਰਡ ਦੇ ਕਾਨੂੰਨ ਮੁਤਾਬਿਕ ਗਲਤ ਹੈ ।
ਉਨ੍ਹਾਂ ਕਿਹਾ ਕਿ ਪੇਂਡੂ ਇਲਾਕਿਆਂ ਵਿਚ ਬਣਨ ਵਾਲੀਆਂ ਸਾਰੀਆਂ ਸੜਕਾਂ ਅਤੇ ਖੇਤਾਂ ਵਿਚ ਕੰਮ ਕਰਨ ਵਾਲੇ ਕਿਸਾਨਾਂ ਸੱਟ ਲੱਗਣ ਜਾ ਮੌਤ ਹੋ ਜਾਣ ’ਤੇ ਮੁਆਵਜ਼ਾ ਮੰਡੀਬੋਰਡ ਹੀ ਅਦਾ ਕਰਦਾ ਹੈ । ਇਸ ਕਰਕੇ ਕਿਸਾਨ ਅਤੇ ਮੰਡੀਬੋਰਡ ਨੂੰ ਅਲੱਗ ਕਰਕੇ ਨਹੀਂ ਦੇਖਿਆ ਜਾ ਸਕਦਾ।