ਨੇਮਾਰ ਦੇ ਪਿਤਾ ਨੇਮਾਰ ਸਾਂਤੋਸ ਨੇ ਦੋਸ਼ਾਂ ਨੂੰ ਝੂਠਾ ਕਰਾਰ ਦਿੱਤਾ
ਪੈਰਿਸ : ਬ੍ਰਾਜ਼ੀਲ ਦੇ ਸਟਾਰ ਫੁਟਬਾਲਰ ਨੇਮਾਰ ਜੂਨੀਅਰ 'ਤੇ ਪੈਰਿਸ ਦੇ ਇਕ ਹੋਟਲ 'ਚ ਔਰਤ ਨਾਲ ਬਲਾਤਕਾਰ ਦਾ ਦੋਸ਼ ਲੱਗਾ ਹੈ। ਇਸ ਮਾਮਲੇ ਦਾ ਪ੍ਰਗਟਾਵਾ ਬ੍ਰਾਜ਼ੀਲ ਦੀ ਮੀਡੀਆ ਨੇ ਕੀਤਾ ਹੈ। ਹਾਲਾਂਕਿ ਨੇਮਾਰ ਦੇ ਪਿਤਾ ਅਤੇ ਮੈਨੇਜਰ ਨੇ ਇਸ ਦੋਸ਼ ਨੂੰ ਝੂਠਾ ਕਰਾਰ ਦਿੱਤਾ ਹੈ ਅਤੇ ਇਸ ਨੂੰ ਬਲੈਕਮੇਲਿੰਗ ਕਰਨ ਦੀ ਸਾਜਸ਼ ਦੱਸਿਆ ਹੈ। ਜ਼ਿਕਰਯੋਗ ਹੈ ਕਿ ਨੇਮਾਰ ਇਸ ਸਮੇਂ ਬ੍ਰਾਜ਼ੀਲ 'ਚ ਹਨ ਅਤੇ ਕੋਪਾ ਅਮਰੀਕਾ ਦੀ ਤਿਆਰੀ ਕਰ ਰਹੇ ਹਨ।
Neymar Jr
ਸਾਓ ਪਾਓਲੋ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਮੁਤਾਬਕ ਨੇਮਾਰ ਵਿਰੁੱਧ ਪੀੜਤ ਔਰਤ ਨੇ ਹਿੰਸਕ ਜਿਨਸੀ ਸਬੰਧ ਬਣਾਉਣ ਦਾ ਦੋਸ਼ ਲਗਾਇਆ ਹੈ। ਹਾਲਾਂਕਿ ਸਾਓ ਪਾਓਲੋ ਪੁਲਿਸ ਨੇ ਇਸ ਸ਼ਿਕਾਇਤ ਦੀ ਕਾਪੀ ਨੂੰ ਗੁਪਤ ਦੱਸਦਿਆਂ ਜਨਤਕ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਜਾਣਕਾਰੀ ਮੁਤਾਬਕ ਪੀੜਤ ਔਰਤ ਬ੍ਰਾਜੀਲ ਦੀ ਰਹਿਣ ਵਾਲੀ ਹੈ। ਨੇਮਾਰ ਨਾਲ ਉਸ ਦੀ ਜਾਣ-ਪਛਾਣ ਇੰਸਟਾਗ੍ਰਾਮ 'ਤੇ ਹੋਈ ਸੀ। ਚੈਟਿੰਗ ਦੌਰਾਨ ਨੇਮਾਰ ਨੇ ਮਈ 'ਚ ਉਸ ਨੂੰ ਪੈਰਿਸ ਆ ਕੇ ਮਿਲਣ ਲਈ ਕਿਹਾ।
Neymar Jr
ਸ਼ਿਕਾਇਤ ਮੁਤਾਬਕ ਨੇਮਾਰ ਨਸ਼ੇ ਦੀ ਹਾਲਤ 'ਚ ਹੋਟਲ ਪੁੱਜਾ ਅਤੇ ਦੋਹਾਂ ਵਿਚਕਾਰ ਗੱਲਬਾਤ ਹੋਈ। ਇਸ ਮਗਰੋਂ ਨੇਮਾਰ ਨੇ ਬਗੈਰ ਉਸ ਦੀ ਸਹਿਮਤੀ ਜ਼ਬਰੀ ਜਿਨਸੀ ਸਬੰਧ ਬਣਾਉਣ ਦਾ ਦੋਸ਼ ਲਗਾਇਆ। ਉਧਰ ਨੇਮਾਰ ਦੇ ਪਿਤਾ ਨੇਮਾਰ ਸਾਂਤੋਸ ਨੇ ਇਨ੍ਹਾਂ ਦੋਸ਼ਾਂ ਨੂੰ ਝੂਠਾ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਅਜਿਹਾ ਸਿਰਫ਼ ਬਲੈਕਮੇਲਿੰਗ ਲਈ ਕੀਤਾ ਗਿਆ ਹੈ।
