ਪਤਨੀ ਨੇ ਜੁੜਵਾਂ ਮੁੰਡਿਆਂ ਨੂੰ ਦਿਤਾ ਜਨਮ
Chirping Echoes at Indian Cricketer Nitish Rana's House Latest News in Punjabi : ਭਾਰਤੀ ਕ੍ਰਿਕਟਰ ਨਿਤੀਸ਼ ਰਾਣਾ ਪਿਤਾ ਬਣ ਗਏ ਹਨ। ਨਿਤੀਸ਼ ਦੀ ਪਤਨੀ ਸਾਚੀ ਮਾਰਵਾਹ ਨੇ ਜੁੜਵਾਂ ਬੱਚਿਆਂ ਨੂੰ ਜਨਮ ਦਿਤਾ ਹੈ। ਨਿਤੀਸ਼ ਰਾਣਾ ਅਤੇ ਸਾਚੀ ਮਾਰਵਾਹ ਨੇ ਅੱਜ ਸੋਸ਼ਲ ਮੀਡੀਆ 'ਤੇ ਪ੍ਰਸ਼ੰਸਕਾਂ ਨਾਲ ਇਹ ਜਾਣਕਾਰੀ ਸਾਂਝੀ ਕੀਤੀ। ਉਨ੍ਹਾਂ ਨੂੰ ਇਸ ਖ਼ਾਸ ਦਿਨ 'ਤੇ ਪ੍ਰਸ਼ੰਸਕਾਂ ਤੋਂ ਲੈ ਕੇ ਸਾਥੀ ਖਿਡਾਰੀਆਂ ਅਤੇ ਪਰਵਾਰਕ ਮੈਂਬਰਾਂ ਤਕ ਵਧਾਈਆਂ ਮਿਲ ਰਹੀਆਂ ਹਨ।
ਜੋੜੇ ਨੇ ਇੰਸਟਾਗ੍ਰਾਮ 'ਤੇ ਇਕ ਫ਼ੋਟੋ ਸਾਂਝੀ ਕੀਤੀ ਜਿਸ ਵਿਚ ਨਵਜੰਮੇ ਬੱਚਿਆਂ ਦੇ ਛੋਟੇ ਹੱਥ ਦਿਖਾਈ ਦੇ ਰਹੇ ਹਨ। ਅਪਣੀ ਪੋਸਟ ਵਿਚ, ਸਾਚੀ ਨੇ ਲਿਖਿਆ ਕਿ ਸਾਡੇ ਹਮੇਸ਼ਾ ਲਈ ਟੈਟੂ ਤੋਂ ਲੈ ਕੇ ਜੁੜਵਾਂ ਮੁੰਡਿਆਂ ਤਕ, ਇਕ ਅਜਿਹਾ ਪਲਾਟ ਟਵਿਸਟ ਜਿਸ ਦੀ ਸਾਨੂੰ ਉਮੀਦ ਨਹੀਂ ਸੀ। ਉਹੀ ਤਾਰੀਖ (14.06.25), ਉਹੀ ਅਸੀਂ, ਸਿਰਫ਼ ਦੋ ਛੋਟੇ ਇਨਸਾਨ ਸ਼ਾਮਲ ਹੋ ਗਏ ਹਨ। ਇਸ ਦੇ ਨਾਲ, ਉਨ੍ਹਾਂ ਨੇ ਬੁਰੀ ਨਜ਼ਰ ਨਾ ਲੱਗਣ ਵਾਲਾ ਇਮੋਜੀ ਵੀ ਸਾਂਝਾ ਕੀਤਾ।
ਨਿਤੀਸ਼ ਰਾਣਾ ਅਤੇ ਸਾਚੀ ਮਾਰਵਾਹ 18 ਫ਼ਰਵਰੀ 2019 ਵਿਚ ਵਿਆਹ ਦੇ ਬੰਧਨ ਵਿਚ ਬੱਝੇ ਸਨ। ਸਾਚੀ ਇਕ ਇੰਟੀਰੀਅਰ ਡਿਜ਼ਾਈਨਰ ਅਤੇ ਕਾਮੇਡੀਅਨ ਕ੍ਰਿਸ਼ਨਾ ਅਭਿਸ਼ੇਕ ਦੀ ਚਚੇਰੀ ਭੈਣ ਹੈ। ਉਹ ਅਕਸਰ ਨਿਤੀਸ਼ ਰਾਣਾ ਦੇ ਕ੍ਰਿਕਟ ਸਫ਼ਰ ਵਿਚ ਉਨ੍ਹਾਂ ਦਾ ਸਮਰਥਨ ਕਰਦੀ ਦਿਖਾਈ ਦਿੰਦੀ ਹੈ।
ਨਿਤੀਸ਼ ਰਾਣਾ ਦਾ ਕ੍ਰਿਕਟ ਸਫ਼ਰ
ਨਿਤੀਸ਼ ਰਾਣਾ ਨੂੰ ਭਾਵੇਂ ਅੰਤਰਰਾਸ਼ਟਰੀ ਪੱਧਰ 'ਤੇ ਟੀਮ ਇੰਡੀਆ ਨਾਲ ਬਹੁਤੇ ਮੌਕੇ ਨਾ ਮਿਲੇ ਹੋਣ, ਪਰ ਘਰੇਲੂ ਅਤੇ ਆਈਪੀਐਲ ਵਿਚ ਉਨ੍ਹਾਂ ਦੇ ਯੋਗਦਾਨ ਨੇ ਉਨ੍ਹਾਂ ਨੂੰ ਭਾਰਤੀ ਕ੍ਰਿਕਟ ਵਿਚ ਇਕ ਜਾਣਿਆ-ਪਛਾਣਿਆ ਨਾਮ ਬਣਾਇਆ ਹੈ। ਰਾਣਾ ਨੇ 2021 ਵਿਚ ਭਾਰਤ ਦੇ ਸ਼੍ਰੀਲੰਕਾ ਦੌਰੇ ਦੌਰਾਨ ਅਪਣਾ ਅੰਤਰਰਾਸ਼ਟਰੀ ਡੈਬਿਊ ਕੀਤਾ ਸੀ। ਉਨ੍ਹਾਂ ਨੇ ਭਾਰਤ ਲਈ ਇਕ ਵਨਡੇ ਅਤੇ ਦੋ ਟੀ-20 ਮੈਚ ਖੇਡੇ ਹਾਲਾਂਕਿ ਉਨ੍ਹਾਂ ਨੂੰ ਇਸ ਤੋਂ ਬਾਅਦ ਮੌਕਾ ਨਹੀਂ ਮਿਲਿਆ ਪਰੰਤੂ ਪਹਿਲੀ ਸ਼੍ਰੇਣੀ ਕ੍ਰਿਕਟ ਵਿਚ, ਉਨ੍ਹਾਂ ਨੇ 54 ਮੈਚਾਂ ਵਿਚ 2,954 ਦੌੜਾਂ ਅਤੇ ਲਿਸਟ ਏ ਕ੍ਰਿਕਟ ਵਿਚ 78 ਮੈਚਾਂ ਵਿਚ 2,281 ਦੌੜਾਂ ਬਣਾਈਆਂ ਹਨ। ਘਰੇਲੂ ਪੱਧਰ 'ਤੇ ਉਨ੍ਹਾਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨੇ ਉਨ੍ਹਾਂ ਨੂੰ ਆਪਣੀ ਰਾਜ ਟੀਮ ਵਿਚ ਇਕ ਮਹੱਤਵਪੂਰਨ ਖਿਡਾਰੀ ਅਤੇ ਆਈਪੀਐਲ ਵਿਚ ਇਕ ਕੀਮਤੀ ਖਿਡਾਰੀ ਬਣਾ ਦਿਤਾ।
ਆਈਪੀਐਲ ਕਰੀਅਰ ਵਿਚ, ਨਿਤੀਸ਼ ਰਾਣਾ ਨੇ 118 ਮੈਚਾਂ ਵਿਚ 2,853 ਦੌੜਾਂ ਬਣਾਈਆਂ ਹਨ, ਜਿਸ ਵਿਚ 20 ਅਰਧ ਸੈਂਕੜੇ ਅਤੇ 87 ਦੌੜਾਂ ਦਾ ਸਭ ਤੋਂ ਵੱਧ ਸਕੋਰ ਸ਼ਾਮਲ ਹੈ। ਉਨ੍ਹਾਂ ਦੀ ਔਸਤ 27.97 ਅਤੇ ਸਟ੍ਰਾਈਕ ਰੇਟ 136.76 ਰਹੀ ਹੈ। ਨਿਤੀਸ਼ ਰਾਣਾ ਨੂੰ ਰਾਜਸਥਾਨ ਰਾਇਲਜ਼ ਦੀ ਟੀਮ ਨੇ ਮੈਗਾ ਨਿਲਾਮੀ ਵਿਚ ਖ਼ਰੀਦਿਆ ਸੀ। ਜੇਦਾਹ ਇੰਡੀਅਨ ਪ੍ਰੀਮੀਅਰ ਲੀਗ 2025 ਲਈ ਮੈਗਾ ਨਿਲਾਮੀ ਵਿਚ, ਰਾਜਸਥਾਨ ਰਾਇਲਜ਼ ਦੀ ਟੀਮ ਨੇ ਨਿਤੀਸ਼ ਰਾਣਾ ਨੂੰ 4.2 ਕਰੋੜ ਵਿਚ ਖ਼ਰੀਦਿਆ ਅਤੇ ਉਨ੍ਹਾਂ ਦੇ 2025 ਆਈਪੀਐਲ ਸੀਜ਼ਨ ’ਚ ਬਿਹਤਰ ਪ੍ਰਦਰਸ਼ਨ ਸਦਕਾ ਉਮੀਦ ਕੀਤੀ ਜਾ ਰਹੀ ਹੈ ਕਿ ਉਹ ਅਗਲੇ ਸੀਜ਼ਨ ਲਈ ਵੀ ਟੀਮ ਵਿਚ ਬਣੇ ਰਹਿਣਗੇ।
