ਪੂਰਬੀ ਏਸ਼ੀਆਈ ਦੇਸ਼ਾਂ ਨਾਲ ਸਮੁੰਦਰ ਅਤੇ ਸਿੱਕਮ 'ਚ ਭਾਰਤ ਨਾਲ ਜਾਰੀ ਸਰਹੱਦ ਵਿਵਾਦ ਵਿਚਕਾਰ ਅਮਰੀਕਾ ਨੇ ਕਿਹਾ ਹੈ ਕਿ ਚੀਨ ਦੇ ਦੋ ਲੜਾਕੂ ਜਹਾਜ਼ਾਂ ਨੇ ਹਾਲ ਹੀ 'ਚ...
ਬੀਜਿੰਗ, 25 ਜੁਲਾਈ : ਪੂਰਬੀ ਏਸ਼ੀਆਈ ਦੇਸ਼ਾਂ ਨਾਲ ਸਮੁੰਦਰ ਅਤੇ ਸਿੱਕਮ 'ਚ ਭਾਰਤ ਨਾਲ ਜਾਰੀ ਸਰਹੱਦ ਵਿਵਾਦ ਵਿਚਕਾਰ ਅਮਰੀਕਾ ਨੇ ਕਿਹਾ ਹੈ ਕਿ ਚੀਨ ਦੇ ਦੋ ਲੜਾਕੂ ਜਹਾਜ਼ਾਂ ਨੇ ਹਾਲ ਹੀ 'ਚ ਪੂਰਬੀ ਚੀਨ ਸਾਗਰ 'ਚ ਇਕ ਅਮਰੀਕੀ ਜਾਸੂਜੀ ਜਹਾਜ਼ ਨੂੰ ਘੇਰਨ ਦੀ ਕੋਸ਼ਿਸ਼ ਕੀਤੀ।
ਅਮਰੀਕੀ ਅਧਿਕਾਰੀਆਂ ਨੇ ਸਮਾਚਾਰ ਏਜੰਸੀ ਰਾਇਟਰਸ ਨੂੰ ਦਸਿਆ ਕਿ ਦੋ ਚੀਨੀ ਚੇਂਗਟੂ-10 ਲੜਾਕੂ ਜੈਟਾਂ ਨੇ ਅਮਰੀਕੀ ਈ.ਪੀ.-3 ਜਾਸੂਸੀ ਜਹਾਜ਼ ਨੂੰ ਕੁਝ ਇਸ ਤਰ੍ਹਾਂ ਘੇਰਿਆ ਕਿ ਇਕ ਚੀਨੀ ਜੈੱਟ ਅਤੇ ਅਮਰੀਕੀ ਜਹਾਜ਼ ਵਿਚਕਾਰ ਸਿਰਫ਼ 91 ਮੀਟਰ ਦੀ ਦੂਰੀ ਰਹਿ ਗਈ ਸੀ। ਇਸ ਸਥਿਤੀ ਵਿਚ ਅਮਰੀਕੀ ਜਾਸੂਸੀ ਜਹਾਜ਼ ਨੂੰ ਨਾ ਸਿਰਫ਼ ਅਪਣੀ ਦਿਸ਼ਾ ਬਦਲਣੀ ਪਈ, ਸਗੋਂ ਚੀਨੀ ਸਾਗਰ ਦੇ ਉਸ ਖੇਤਰ ਨੂੰ ਛੱਡ ਕੇ ਵਾਪਸ ਆਉਣਾ ਪਿਆ।
ਜਾਣਕਾਰੀ ਅਨੁਸਾਰ ਅਮਰੀਕਾ ਈ.ਪੀ.-3 ਜਾਸੂਸੀ ਜਹਾਜ਼ ਪੂਰਬੀ ਚੀਨੀ ਸਾਗਰ ਦੇ ਉੱਪਰ ਜਾਸੂਸੀ ਕਰ ਰਿਹਾ ਸੀ। ਉਸੇ ਵੇਲੇ ਚੀਨੀਆਂ ਨੇ ਉਸ ਨੂੰ ਫੜ ਲਿਆ ਅਤੇ ਘੇਰਾ ਪਾ ਲਿਆ। ਜਿਹੜੇ ਦੋ ਚੇਂਗਟੂ-10 ਜੈਟਾਂ ਨੇ ਅਮਰੀਕੀ ਜਹਾਜ਼ ਨੂੰ ਘੇਰਿਆ, ਉਹ ਦੋਵੇ ਹਥਿਆਰਾਂ ਨਾਲ ਲੈਸ ਅਤੇ ਅਮਰੀਕੀ ਜਹਾਜ਼ ਨੂੰ ਨਸ਼ਟ ਕਰਨ ਵਿਚ ਸਮਰੱਥ ਸਨ। ਪਰ ਅਮਰੀਕੀ ਜਹਾਜ਼ ਦੇ ਅਪਣਾ ਰਸਤਾ ਬਦਲਣ 'ਤੇ ਉਨ੍ਹਾਂ ਨੇ ਹਮਲਾਵਰ ਰਵੱਈਆ ਨਹੀਂ ਅਪਣਾਇਆ।
ਅਮਰੀਕੀ ਅਧਿਕਾਰੀਆਂ ਨੇ ਦਸਿਆ ਕਿ ਇਹ ਘਟਨਾ ਚੀਨ ਦੇ ਤਟੀ ਸ਼ਹਿਰ ਕਿੰਗਦਾਅੋ ਤੋਂ 80 ਸਮੁੰਦਰੀ ਮੀਲ (148 ਕਿਲੋਮੀਟਰ) ਦੂਰ ਦੀ ਹੈ।
ਇਸ ਤੋਂ ਪਹਿਲਾਂ ਦੋ ਚੀਨੀ ਸਖੋਈ-30 ਜਹਾਜ਼ਾਂ ਨੇ ਮਈ ਮਹੀਨੇ ਵਿਚ ਇਕ ਅਮਰੀਕੀ ਜਹਾਜ਼ ਨੂੰ ਫੜਿਆ ਸੀ, ਜੋ ਪੂਰਬੀ ਚੀਨੀ ਸਾਗਰ ਦੇ ਉੱਪਰ ਇੰਟਰਨੈਸ਼ਨਲ ਵਿਚ ਰੇਡੀਏਸ਼ਨ ਦਾ ਪਤਾ ਲਗਾਉਣ ਲਈ ਨਿਕਲਿਆ ਸੀ।
ਜ਼ਿਕਰਯੋਗ ਹੈ ਕਿ ਪੂਰਬੀ ਚੀਨੀ ਸਾਗਰ ਕਈ ਦੇਸ਼ਾਂ ਵਿਚ ਝਗੜਿਆਂ ਦਾ ਕਾਰਨ ਹੈ। ਇਸ ਸਾਗਰ ਵਿਚ ਕਈ ਥਾਵਾਂ 'ਤੇ ਚੀਨ ਨੇ ਬਣਾਉਟੀ ਟਾਪੂਆਂ ਦਾ ਨਿਰਮਾਣ ਕਰ ਕੇ ਫ਼ੌਜੀਆਂ ਅੱਡਿਆਂ ਨਾਲ ਮਿਜ਼ਾਈਲਾਂ ਦੀ ਤੈਨਾਤੀ ਕਰ ਦਿਤੀ ਹੈ। ਉਥੇ ਅਮਰੀਕਾ ਇਸ ਜੋਨ ਵਿਚ ਕਿਸੇ ਵੀ ਸੈਨਿਕ ਤੈਨਾਤੀ ਦਾ ਵਿਰੋਧ ਕਰਦਾ ਰਿਹਾ ਹੈ। (ਪੀਟੀਆਈ)
