ਦਮਦਾਰ ਆਵਾਜ਼ ਸਦਕਾ ਗੋਰਿਆਂ ਨੂੰ ਵੀ ਝੂਮਣ ਲਈ ਕੀਤਾ ਮਜਬੂਰ
ਆਸਟਰੇਲੀਆ- ਪੰਜਾਬੀ ਇੰਡਸਟਰੀ ਵਿਚ ਸਤਿੰਦਰ ਸਰਤਾਜ ਦਾ ਨਾਮ ਕਿਸੇ ਜਾਣ ਪਛਾਣ ਦਾ ਮੁਹਤਾਜ਼ ਨਹੀਂ ਜਿਨ੍ਹਾਂ ਨੂੰ ਜ਼ਿਆਦਾਤਰ ਸੂਫ਼ੀ ਗਾਇਕ ਦੇ ਤੌਰ 'ਤੇ ਜਾਣਿਆ ਜਾਂਦਾ ਹੈ। ਸਤਿੰਦਰ ਸਰਤਾਜ ਨੇ ਆਪਣੀ ਦਮਦਾਰ ਆਵਾਜ਼ ਦੇ ਨਾਲ ਦੇਸ਼ ਵਿਚ ਹੀ ਨਹੀਂ ਬਲਕਿ ਵਿਦੇਸ਼ਾਂ ਵਿਚ ਬੈਠੇ ਪੰਜਾਬੀਆਂ ਦੇ ਦਿਲਾਂ ਵਿਚ ਵੀ ਖ਼ਾਸ ਜਗ੍ਹਾ ਬਣੀ ਹੈ, ਇਹੀ ਵਜ੍ਹਾ ਹੈ ਕਿ ਉਨ੍ਹਾਂ ਨੂੰ ਆਸਟਰੇਲੀਆ ਦੀ ਪਾਰਲੀਮੈਂਟ ਵਲੋਂ ਐਕਸੀਲੈਂਸ ਇਨ ਮਿਊਜ਼ਕ ਐਵਾਰਡ ਨਾਲ ਨਿਵਾਜ਼ਿਆ ਗਿਆ ਹੈ ਜੋ ਪੰਜਾਬ ਲਈ ਵੱਡੇ ਮਾਣ ਵਾਲੀ ਗੱਲ ਹੈ।
ਸਤਿੰਦਰ ਸਰਤਾਜ ਪਹਿਲੇ ਅਜਿਹੇ ਸਰਦਾਰ ਹਨ ਜਿਨ੍ਹਾਂ ਨੇ ਓਪੇਰਾ ਹਾਊਸ ਵਿਚ ਮਿਊਜ਼ਕ ਪਰਫਾਰਮੈਂਸ ਦਿੱਤੀ ਹੈ। ਆਸਟਰੇਲੀਅਨ ਪਾਰਲੀਮੈਂਟ ਵਲੋਂ ਸਰਤਾਜ ਦੀ ਇਸੇ ਸ਼ਾਨਦਾਰ ਪਰਫਾਰਮੈਂਸ ਬਦਲੇ ਲਈ ਉਸ ਨੂੰ ਸਨਮਾਨਿਤ ਕੀਤਾ ਗਿਆ ਹੈ। ਇਸ ਤਰ੍ਹਾਂ ਉਹ ਪਹਿਲੇ ਪੰਜਾਬੀ ਗਾਇਕ ਬਣ ਗਏ ਹਨ, ਜਿਨ੍ਹਾਂ ਨੂੰ ਆਸਟਰੇਲੀਆ ਦੀ ਪਾਰਲੀਮੈਂਟ ਨੇ ਸਨਮਾਨਿਤ ਕੀਤਾ ਹੈ। ਸਨਮਾਨ ਹਾਸਲ ਕਰਨ ਮੌਕੇ ਵੀ ਉਨ੍ਹਾਂ ਨੇ ਅਪਣੇ ਮਸ਼ਹੂਰ ਸੂਫ਼ੀ ਕਲਾਮ 'ਸਾਈਂ' ਦੀਆਂ ਕੁੱਝ ਸਤਰਾਂ ਸੁਣਾਈਆਂ।
ਸਤਿੰਦਰ ਸਰਤਾਜ ਨੇ ਅਪਣੀ ਮਿੱਠੀ ਆਵਾਜ਼ ਰਾਹੀਂ ਪੰਜਾਬੀਆਂ ਨੂੰ ਹੀ ਨਹੀਂ ਬਲਕਿ ਗੋਰਿਆਂ ਨੂੰ ਵੀ ਮੰਤਰ ਮੁਗਧ ਕਰ ਦਿਤਾ, ਸਤਿੰਦਰ ਸਰਤਾਜ ਨੇ ਪੰਜਾਬੀ ਇੰਡਸਟਰੀ ਨੂੰ ਇਕ ਤੋਂ ਇਕ ਸ਼ਾਨਦਾਰ ਗੀਤ ਦਿਤੇ ਜਿਨ੍ਹਾਂ ਵਿਚ 'ਸਾਈਂ', 'ਪਾਣੀ ਪੰਜਾਂ ਦਰਿਆਵਾਂ', ਜਿੱਤ ਦੇ ਨਿਸ਼ਾਨ, ਨਿੱਕੀ ਜੇਹੀ ਕੁੜੀ, ਰਸੀਦ, ਸੱਜਣ ਰਾਜ਼ੀ, ਮਾਸੂਮੀਅਤ ਆਦਿ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਉਨ੍ਹਾਂ ਦੀ ਫਿਲਮ 'ਬਲੈਕ ਪ੍ਰਿੰਸ' ਵੀ ਦੇਸ਼ਾਂ ਵਿਦੇਸ਼ਾਂ ਵਿਚ ਕਾਫ਼ੀ ਮਕਬੂਲ ਹੋਈ ਸੀ। ਮੀਡੀਆ ਰਿਪੋਰਟਾਂ ਮੁਤਾਬਕ ਹੁਣ ਉਹ ਬਹੁਤ ਜਲਦ ਵੱਡੇ ਪਰਦੇ 'ਤੇ ਅਦਿਤੀ ਸ਼ਰਮਾ ਦੇ ਨਾਲ ਅਪਣੀ ਨਵੀਂ ਫ਼ਿਲਮ 'ਅਣਪਰਖ ਅੱਖੀਆਂ' 'ਚ ਨਜ਼ਰ ਆਉਣ ਵਾਲੇ ਹਨ।