ਪਿਓ ਨੂੰ ਦੱਸਿਆ ਗਿਆ ਸੀ ਕਿ ਪੈਸਾ ਲੋੜਵੰਦਾਂ ਦੀ ਪੜ੍ਹਾਈ ਲਈ ਖ਼ਰਚ ਹੋਵੇਗਾ ਪਰ ਉਸ ਨਾਲ ਧੋਖਾਧੜੀ ਹੋਈ
ਬੀਜਿੰਗ : ਸਿਆਣੇ ਕਹਿੰਦੇ ਹਨ ਕਿ ਮਾਪੇ ਕਦੇ ਕੁਮਾਪੇ ਨਹੀਂ ਹੁੰਦੇ ਤੇ ਮਾਪੇ ਅਪਣਾ ਆਪਾ ਵੇਚ ਕੇ ਵੀ ਬੱਚਿਆਂ ਨੂੰ ਕੁੱਝ ਨਾ ਕੁੱਝ ਬਣਿਆ ਦੇਖਣਾ ਚਾਹੁੰਦੇ ਹਨ। ਅਜਿਹਾ ਹੀ ਚੀਨ ਵਿਚ ਵਾਪਰਿਆ ਜਿਥੇ ਇਕ ਬਾਪ ਨੇ ਅਪਣੀ ਧੀ ਦੇ ਦਾਖ਼ਲੇ ਲਈ 45 ਕਰੋੜ ਰੁਪਏ ਭਰ ਦਿਤੇ। ਭਾਵੇਂ ਬਾਅਦ 'ਚ ਉਸ ਦੇ ਨਾਲ ਧੋਖਾ ਹੋ ਗਿਆ ਪਰ ਉਸ ਨੇ ਇਕ ਵਾਰ ਦਰਸਾ ਦਿਤਾ ਕਿ ਬਾਪ ਦਾ ਦਿਲ ਬਾਪ ਦਾ ਹੀ ਹੁੰਦਾ ਹੈ।
Father : Tao Zhao, co-founder of multibillion-dollar pharmaceutical company Shandong Buchang
ਚੀਨੀ ਮੀਡੀਆ ਮੁਤਾਬਕ ਇਥੋਂ ਦੇ ਅਰਬਪਤੀ ਪਰਵਾਰ ਨੇ ਅਪਣੀ ਧੀ ਨੂੰ ਸਟੈਨਫ਼ੋਰਡ ਯੂਨੀਵਰਸਿਟੀ 'ਚ ਦਾਖ਼ਲਾ ਦਿਵਾਉਣ ਲਈ ਸਲਾਹਕਾਰ ਨੂੰ 65 ਲੱਖ ਡਾਲਰ (45 ਕਰੋੜ ਰੁਪਏ) ਦੇ ਦਿਤੇ। ਮੀਡੀਆ ਰਿਪੋਰਟਾਂ ਮੁਤਾਬਕ ਚੀਨ ਦੇ ਅਰਬਪਤੀ ਝਾ ਤਾਉ ਨੇ ਅਪਣੀ ਧੀ ਯੂਸੀ ਝਾ ਲਈ ਇਹ ਕੀਮਤ ਚੁਕਾਈ ਕਿਉਂਕਿ ਉਸ ਨੂੰ ਦਸਿਆ ਗਿਆ ਸੀ ਕਿ ਇਹ ਪੈਸਾ ਲੋੜਵੰਦਾਂ ਦੀ ਪੜ੍ਹਾਈ ਲਈ ਖ਼ਰਚ ਹੋਵੇਗਾ ਤੇ ਇਹ ਸੰਸਥਾ ਦੀ ਡੋਨੇਸ਼ਨ ਗ਼ਰੀਬ ਬੱਚਿਆਂ ਲਈ ਹੈ ਪਰ ਬਾਅਦ 'ਚ ਪਤਾ ਲੱਗਾ ਕਿ ਵਿਚੋਲੇ ਨੇ ਹੀ ਉਸ ਦੇ ਨਾਲ ਧੋਖਾਧੜੀ ਕੀਤੀ ਹੈ।
Daughter : Yusi 'Molly' Zhao
ਇਸ ਸਬੰਧੀ ਯੂਸੀ ਝਾਉ ਦੀ ਮਾਂ ਨੇ ਅਪਣੇ ਵਕੀਲ ਰਾਹੀਂ ਦਸਿਆ ਕਿ ਉਹ ਕਾਲਜ ਕੰਸਲਟੈਂਟ ਵਿਲੀਅਮਸ ਰਿਕ ਸਿੰਗਰ ਦੀ ਧੋਖਾਧੜੀ ਦਾ ਸ਼ਿਕਾਰ ਹੋਏ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਲੱਗਾ ਸੀ ਕਿ ਕਿਤੇ ਇਹ ਯੂਨੀਵਰਸਿਟੀ ਨੂੰ ਦਿਤੀ ਜਾਣ ਵਾਲੀ ਡੋਨੇਸ਼ਨ ਦੇ ਰੂਪ 'ਚ ਅਦਾ ਹੋਣ ਵਾਲੀ ਰਕਮ ਹੈ, ਜੋ ਕਿ ਜ਼ਰੂਰਤਮੰਦ ਬੱਚਿਆਂ ਨੂੰ ਸਕਾਲਰਸ਼ਿਪ ਲਈ ਕੰਮ ਆਵੇਗੀ। ਕਾਲਜ ਕੰਸਲਟੈਂਟ ਸਿੰਗਰ ਅਮਰੀਕਾ ਦੇ ਸੱਭ ਤੋਂ ਵੱਡੇ ਦਾਖ਼ਲਾ ਘਪਲੇ ਦਾ ਮੁੱਖ ਦੋਸ਼ੀ ਹੈ। ਇਸੇ ਸਾਲ ਮਾਰਚ 'ਚ ਇਸ ਪਘਲੇ ਦਾ ਸੱਚ ਸਾਹਮਣੇ ਆਇਆ ਸੀ ਜਿਸ ਵਿਚ ਕਈ ਭਾਰਤੀ ਵਿਦਿਆਰਥੀ ਵੀ ਸ਼ਾਮਲ ਸਨ।
Stanford University
ਅਮਰੀਕੀ ਵਕੀਲ ਮੁਤਾਬਕ ਚੀਨੀ ਪਰਿਵਾਰ ਨੇ 65 ਲੱਖ ਡਾਲਰ ਦੀ ਰਕਮ ਦਿਤੀ ਸੀ। ਇਹ ਰਕਮ ਇਸ ਦਾਖ਼ਲਾ ਘਪਲੇ ਦੀ ਸੱਭ ਤੋਂ ਵੱਡੀ ਰਕਮ ਹੈ। ਐਫ਼ਬੀਆਈ ਨੇ ਇਕ ਫ਼ਰਜ਼ੀ ਕਾਲਜ ਬਣਾ ਕੇ ਇਨ੍ਹਾਂ ਲੋਕਾਂ ਨੂੰ ਜਾਲ 'ਚ ਫਸਾਇਆ ਸੀ ਤੇ ਇਸ ਸਬੰਧੀ ਕਈ ਭਾਰਤੀ ਏਜੰਟ ਤੇ ਵਿਦਿਆਰਥੀ ਵੀ ਹਿਰਾਸਤ 'ਚ ਲਏ ਗਏ ਸਨ। ਹੁਣ ਐਫ਼ਬੀਆਈ ਨੇ ਚੀਨੀ ਵਿਅਕਤੀ ਨਾਲ ਹੋਈ ਧੋਖਾਧੜੀ ਮਾਮਲੇ 'ਚ 50 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਬੇਸ਼ੱਕ ਉਸ ਬਾਪ ਨਾਲ ਧੋਖਾਧੜੀ ਹੋ ਗਈ ਪਰ ਉਸ ਨੇ ਅਪਣੀ ਬੇਟੀ ਦੇ ਸੁਪਨੇ ਨੂੰ ਸਾਕਾਰ ਕਰਨ ਲਈ ਕੋਈ ਕਸਰ ਨਹੀਂ ਛੱਡੀ।
