ਚਾਰਲਸ III ਦੇ ਨਵੇਂ ਸਿਰਲੇਖ ਦਾ ਜਨਤਕ ਤੌਰ 'ਤੇ ਐਲਾਨ ਕਰਨ ਦੀ ਪ੍ਰਕਿਰਿਆ ਨੂੰ ਕਈ ਪੜਾਵਾਂ ਵਿਚ ਪੂਰਾ ਕੀਤਾ ਜਾਵੇਗਾ।
ਲੰਡਨ: ਪ੍ਰਿੰਸ ਚਾਰਲਸ-।।। ਨੂੰ ਅੱਜ ਸੇਂਟ ਜੇਮਸ ਪੈਲੇਸ ਵਿਚ ਇਕ ਇਤਿਹਾਸਕ ਸਮਾਰੋਹ ਦੌਰਾਨ ਅਧਿਕਾਰਤ ਤੌਰ ’ਤੇ ਬਰਤਾਨੀਆ ਦਾ ਰਾਜਾ ਐਲਾਨਿਆ ਜਾਵੇਗਾ। ਇਹ ਨਵੇਂ ਬਾਦਸ਼ਾਹ ਦੀ ਤਾਜਪੋਸ਼ੀ ਦਾ ਜਨਤਕ ਐਲਾਨ ਹੈ। ਤਾਜਪੋਸ਼ੀ ਕੌਂਸਲ ਦੀ ਮੀਟਿੰਗ ਰਵਾਇਤੀ ਤੌਰ 'ਤੇ ਮਹਾਰਾਣੀ ਦੀ ਮੌਤ ਦੇ 24 ਘੰਟਿਆਂ ਦੇ ਅੰਦਰ ਬੁਲਾਈ ਜਾਂਦੀ ਹੈ ਪਰ ਮਹਾਰਾਣੀ ਦੀ ਮੌਤ ਦੀ ਘੋਸ਼ਣਾ ਵਿਚ ਦੇਰੀ ਕਾਰਨ ਸ਼ੁੱਕਰਵਾਰ ਨੂੰ ਸਮਾਗਮ ਕਰਵਾਉਣ ਲਈ ਸਮਾਂ ਨਹੀਂ ਬਚਿਆ ਸੀ।
ਚਾਰਲਸ III ਦੇ ਨਵੇਂ ਸਿਰਲੇਖ ਦਾ ਜਨਤਕ ਤੌਰ 'ਤੇ ਐਲਾਨ ਕਰਨ ਦੀ ਪ੍ਰਕਿਰਿਆ ਨੂੰ ਕਈ ਪੜਾਵਾਂ ਵਿਚ ਪੂਰਾ ਕੀਤਾ ਜਾਵੇਗਾ। ਮਰਹੂਮ ਮਹਾਰਾਣੀ ਦੀ ਮੌਤ ਦੇ ਸੋਗ ਵਿਚ ਝੁਕੇ ਹੋਏ ਝੰਡੇ ਨਵੇਂ ਬਾਦਸ਼ਾਹ ਦੀ ਤਾਜਪੋਸ਼ੀ ਦੀ ਘੋਸ਼ਣਾ ਤੋਂ ਬਾਅਦ ਪੂਰੀ ਤਰ੍ਹਾਂ ਨਾਲ ਲਹਿਰਾਏ ਜਾਣਗੇ। ਇਹ ਪ੍ਰੋਗਰਾਮ ਪਹਿਲੀ ਵਾਰ ਟੈਲੀਕਾਸਟ ਕੀਤਾ ਜਾਵੇਗਾ।
ਤਾਜਪੋਸ਼ੀ ਕੌਂਸਲ ਵਿਚ ਸੀਨੀਅਰ ਕੈਬਨਿਟ ਮੰਤਰੀ, ਜੱਜ ਅਤੇ ਚਰਚ ਆਫ਼ ਇੰਗਲੈਂਡ ਦੇ ਲੋਕ ਸ਼ਾਮਲ ਹੁੰਦੇ ਹਨ। ਕੌਂਸਲ ਵਿਚ ਸਮਰਾਟ ਚਾਰਲਸ ਨਿੱਜੀ ਤੌਰ 'ਤੇ ਮਹਾਰਾਣੀ ਦੀ ਮੌਤ ਦੀ ਘੋਸ਼ਣਾ ਕਰਨਗੇ ਅਤੇ ਸਕਾਟਲੈਂਡ ਦੇ ਚਰਚ ਦੀ ਰੱਖਿਆ ਲਈ ਸਹੁੰ ਚੁੱਕਣਗੇ। ਸਮਾਰੋਹ ਵਿਚ ਚਾਰਲਸ ਦੀ ਪਤਨੀ ਕੈਮਿਲਾ ਸ਼ਾਮਲ ਹੋਵੇਗੀ, ਜੋ ਹੁਣ ਕੁਈਨ ਕੰਸੋਰਟ ਬਣ ਗਈ ਹੈ।
