ਈਰਾਨ ਦੀ ਸੈਨਾ ਨੇ ਬਿਆਨ ਜਾਰੀ ਕਰਕੇ ਕਿਹਾ ਹੈ ਕਿ ਮਨੁੱਖੀ ਗਲਤੀ ਨਾਲ ਯੂਕ੍ਰੇਨ ਦਾ ਜਹਾਜ਼ ਮਾਰ ਗਿਰਾਇਆ ਸੀ
ਨਵੀਂ ਦਿੱਲੀ : ਈਰਾਨ ਵਿਚ ਹੋਏ ਜਹਾਜ਼ ਹਾਦਸੇ 'ਚ ਮੋਹਸੇਨ ਅਮਦੀਪੋਰ ਨਾਮ ਦੇ ਵਿਅਕਤੀ ਦੀ ਟਿਕਟ ਰੱਦ ਹੋਣ ਕਰਕੇ ਜਾਨ ਬੱਚ ਗਈ ਹਾਲਾਕਿ ਮੋਹਸੇਨ ਦੀ ਪਤਨੀ ਰੋਜ਼ਾ ਇਸ ਜਹਾਜ਼ ਵਿਚ ਸਵਾਰ ਸੀ ਇਹ ਉਡਾਨ ਰੋਜ਼ਾ ਦੇ ਲਈ ਆਖਰੀ ਉਡਾਨ ਸਾਬਤ ਹੋਈ।
ਮੀਡੀਆ ਰਿਪੋਰਟਾ ਅਨੁਸਾਰ ਮੋਹਸੇਨ ਕਨੇਡਾ ਦੇ ਓਟਾਵਾ ਵਿਚ ਰਹਿੰਦਾ ਹੈ। ਮੋਹਸੇਨ ਆਪਣੀ ਘਰਵਾਲੀ ਦੇ ਨਾਲ ਪਰਿਵਾਰਕ ਸਮਾਗਮ ਵਿਚ ਸ਼ਾਮਲ ਹੋਣ ਦੇ ਲਈ ਈਰਾਨ ਪਹੁੰਚੇ ਸਨ। ਜਿਸ ਦਿਨ ਜਹਾਜ਼ ਹਾਦਸਾ ਹੋਇਆ ਉਸੇ ਦਿਨ ਉਸਨੂੰ ਆਪਣੀ ਪਤਨੀ ਦੇ ਨਾਲ ਕਨੇਡਾ ਘਰ ਵਾਪਸ ਆਉਣਾ ਸੀ। ਇਸੇ ਵਿਚਾਲੇ ਪਤੀ ਦੀ ਟਿਕਟ ਰੱਦ ਹੋ ਗਈ।
ਪਤਨੀ ਨੂੰ ਲੱਗਿਆ ਕਿ ਉਹ ਕੀਵ ਜਾਣ ਵਾਲੀ ਦੂਜੀ ਫਲਾਇਟ ਤੋਂ ਆ ਜਾਵੇਗਾ। ਮੋਹਸੀਨ ਏਅਰਪੋਰਟ ਟਰਮੀਨਲ ਦੇ ਅੰਦਰ ਹੀ ਸੀ ਤਾਂ ਉਸ ਨੂੰ ਪਤਾ ਚੱਲਿਆ ਕਿ ਕੀਵ ਜਾਣ ਵਾਲੀ ਫਲਾਇਟ ਉਡਾਨ ਭਰਦੇ ਹੀ ਕ੍ਰੈਸ਼ ਹੋ ਗਈ ਹੈ। ਇਸ ਹਾਦਸੇ ਵਿਚ ਕਰੂ ਮੈਂਬਰਾ ਸਮੇਤ ਸਾਰੇ 176 ਲੋਕ ਮਾਰੇ ਗਏ ਸਨ।
ਈਰਾਨ ਦੀ ਸੈਨਾ ਨੇ ਬਿਆਨ ਜਾਰੀ ਕਰਕੇ ਕਿਹਾ ਹੈ ਕਿ ਮਨੁੱਖੀ ਗਲਤੀ ਨਾਲ ਯੂਕ੍ਰੇਨ ਦਾ ਜਹਾਜ਼ ਮਾਰ ਗਿਰਾਇਆ ਸੀ। ਦੱਸ ਦਈਏ ਕਿ 8 ਜਨਵਰੀ ਨੂੰ ਈਰਾਨ ਵਿਚ ਯੂਕ੍ਰੇਨ ਦਾ ਜਹਾਜ਼ ਕ੍ਰੈਸ਼ ਹੋ ਗਿਆ ਸੀ। ਬੋਇੰਗ 737-800 ਨੇ ਈਰਾਨ ਵਿਚ ਤਹਿਰਾਨ ਦੇ ਈਮਾਮ ਖੁਮੈਨੀ ਇੰਟਰਨੈਸ਼ਨਲ ਏਅਰਪੋਰਟ ਤੋਂ ਸਵੇਰੇ 6 ਵੱਜ ਕੇ 12 ਮਿੰਟ 'ਤੇ ਉਡਾਨ ਭਰੀ ਸੀ ਪਰ 2 ਮਿੰਟ ਬਾਅਦ ਹੀ ਜਹਾਜ਼ ਨੇ ਸਿਗਨਲ ਖੋ ਦਿੱਤਾ ਸੀ।