ਯੂ-ਟਿਊਬ ਨੇ ਸਾਫ ਕਹਿ ਦਿਤਾ ਹੈ ਕਿ ਮਨੁੱਖੀ ਜਾਨ ਨੂੰ ਖ਼ਤਰੇ ਵਿਚ ਪਾਉਣ ਵਾਲੇ ਇਹਨਾਂ ਵੀਡੀਓਜ਼ ਲਈ ਹੁਣ ਕੋਈ ਥਾਂ ਨਹੀਂ ਹੋਵੇਗੀ।
ਨਵੀਂ ਦਿੱਲੀ : ਯੂ-ਟਿਊਬ 'ਤੇ ਖ਼ਤਰਨਾਕ ਚੁਣੌਤੀਪੂਰਨ ਵੀਡੀਓਜ਼ ਹੁਣ ਨਹੀਂ ਪਾਏ ਜਾ ਸਕਣਗੇ। ਇਹਨਾਂ ਵੀਡੀਓਜ਼ ਕਾਰਨ ਕਈ ਲੋਕਾਂ ਦੀ ਮੌਤ ਅਤੇ ਜਖ਼ਮੀ ਹੋਣ ਦੀਆਂ ਖ਼ਬਰਾਂ ਨੂੰ ਦੇਖਦੇ ਹੋਏ ਇਹ ਫ਼ੈਸਲਾ ਲਿਆ ਗਿਆ ਹੈ। ਯੂ-ਟਿਊਬ ਨੇ ਸਾਫ ਕਹਿ ਦਿਤਾ ਹੈ ਕਿ ਮਨੁੱਖੀ ਜਾਨ ਨੂੰ ਖ਼ਤਰੇ ਵਿਚ ਪਾਉਣ ਵਾਲੇ ਇਹਨਾਂ ਵੀਡੀਓਜ਼ ਲਈ ਹੁਣ ਕੋਈ ਥਾਂ ਨਹੀਂ ਹੋਵੇਗੀ। ਯੂ-ਟਿਊਬ 'ਤੇ ਬਲੂ ਵਹੇਲ ਗੇਮ, ਕਿਕੀ ਡਾਂਸ, ਬਰਡਬੌਕਸ ਵਰਗੇ ਕਈ ਖ਼ਤਰਨਾਕ ਚੁਣੌਤੀ ਭਰੇ ਵੀਡੀਓ ਵਾਇਰਲ ਹੋਏ ਹਨ, ਜਿਹਨਾਂ ਨੂੰ ਆਮ ਲੋਕਾਂ ਨੇ ਪਸੰਦ ਕੀਤਾ।
ਲੋਕ ਇਹਨਾਂ ਨੂੰ ਦੇਖ ਕੇ ਇਹਨਾਂ ਦੀ ਨਕਲ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ ਪਰ ਇਹ ਉਹਨਾਂ ਲਈ ਜਾਨਲੇਵਾ ਵੀ ਹੋ ਸਕਦੇ ਹਨ । ਇਹ ਮੰਗ ਵੀ ਉੱਠੀ ਹੈ ਕਿ ਇਸ ਤਰ੍ਹਾਂ ਦੇ ਵੀਡੀਓਜ਼ 'ਤੇ ਪਾਬੰਦੀ ਲਗਣੀ ਚਾਹੀਦੀ ਹੈ। ਪਿਛਲੇ ਸਾਲ ਅਪ੍ਰੈਲ ਵਿਚ ਯੂ-ਟਿਊਬ ਨੇ ਅਜਿਹੇ ਲੋਕਾਂ 'ਤੇ ਰੋਕ ਲਗਾਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਪਰ ਅਜਿਹੀ ਸਮੱਗਰੀ ਹੁਣ ਵੀ ਸੋਸ਼ਲ ਸਾਈਟਸ 'ਤੇ ਮੌਜੂਦ ਹੈ। ਯੂ-ਟਿਊਬ ਨੇ ਕਿਹਾ ਕਿ ਉਹਨਾਂ ਸ਼ਰਾਰਤ ਭਰੇ ਵੀਡੀਓਜ਼ 'ਤੇ ਵੀ ਰੋਕ ਲਗਾਈ ਜਾਵੇਗੀ ਜੋ ਛੇਟੋ ਬੱਚਿਆਂ ਨੂੰ ਭਾਵਨਾਤਮਕ ਪੱਖ ਤੋਂ ਨੁਕਸਾਨ ਪਹੁੰਚਾਉਂਦੇ ਹਨ।
ਯੂ-ਟਿਊਬ ਮੁਤਾਬਕ ਅਜਿਹੇ ਵੀਡੀਓਜ਼ ਦੀ ਪੂਰੀ ਸੂਚੀ ਤਾਂ ਉਪਲਬਧ ਨਹੀਂ ਹੈ ਪਰ ਉਹ ਇਸ ਸਬੰਧੀ ਜਾਣਕਾਰੀ ਇੱਕਠੀ ਕਰਨ ਵਿਚ ਲਗੇ ਹੋਏ ਹਨ ਤਾਂ ਕਿ ਇਹਨਾਂ 'ਤੇ ਰੋਕ ਲਗਾਈ ਜਾ ਸਕੇ। ਮਈ ਮਹੀਨੇ ਸ਼ਿਕਾਗੋ ਵਿਚ 20 ਸਾਲ ਦੀ ਮੋਨਾਲਿਸਾ ਪੇਰੇਜ਼ ਅਤੇ 22 ਸਾਲ ਦੀ ਪੈਡਰੋ ਰੁਈਜ਼ ਯੂ-ਟਿਊਬ ਚੈਨਲ ਲਈ ਇਕ ਸਟੰਟ ਰਿਕਾਰਡ ਕਰ ਰਹੇ ਸਨ। ਇਸ ਖ਼ਤਰਨਾਕ ਸਟੰਟ ਨੇ ਮੋਨਾਲੀਸਾ ਦੇ ਦੋਸਤ ਦੀ ਜਾਨ ਲੈ ਲਈ। ਬੀਤੇ ਸਾਲ ਅਮਰੀਕਾ ਦੀ ਇਕ ਮਸ਼ਹੂਰ ਕੰਪਨੀ ਨੇ ਅਪਣੇ ਸਾਬਣ ਦਾ ਪ੍ਰਚਾਰ ਕਰਨ ਲਈ ਇਹ ਅਨੋਖਾ ਇਸ਼ਤਿਹਾਰ ਬਣਾਇਆ।
ਜਿਸ ਵਿਚ ਬੀਮਾਰੀ ਤੋਂ ਬਚਣ ਲਈ ਸਾਬਣ ਖਾਂਦੇ ਹੋਏ ਦਿਖਾਇਆ ਗਿਆ ਸੀ। ਯੂ-ਟਿਊਬ ਮੁਤਾਬਕ ਜੋ ਵੀ ਚੈਨਲ ਇਸ ਤਰ੍ਹਾਂ ਦੇ ਪ੍ਰੈਂਕ ਅਤੇ ਖ਼ਤਰਨਾਕ ਵੀਡੀਓਜ਼ ਪੋਸਟ ਕੇਰਗਾ, ਪਹਿਲੇ ਸਟ੍ਰਾਈਕ ਅਧੀਨ ਉਸ ਚੈਨਲ ਦੇ ਲਾਈਵ ਸਟ੍ਰੀਮਿੰਗ ਫੀਚਰ 'ਤੇ ਪਾਬੰਦੀ ਲਗਾ ਦਿਤੀ ਜਾਵੇਗੀ ਅਤੇ ਤੀਜੇ ਮਹੀਨੇ ਵਿਚ ਦੂਜਾ ਸਟ੍ਰਾਈਕ ਆਉਣ 'ਤੇ ਪਹਿਲਾਂ ਨਾਲੋਂ ਵੱਧ ਫੀਚਰ 'ਤੇ ਪਾਬੰਦੀ ਲਗਾਈ ਜਾਵੇਗੀ। ਇਸ ਤੋਂ ਬਾਅਦ 90 ਦਿਨਾਂ ਦੇ ਅੰਦਰ ਤੀਜਾ ਸਟ੍ਰਾਈਕ ਆਉਣ 'ਤੇ ਯੂ-ਟਿਊਬ ਉਸ ਚੈਨਲ ਨੂੰ ਹਮੇਸ਼ਾ ਲਈ ਬੰਦ ਕਰ ਦੇਵੇਗਾ।