ਸੋਸ਼ਲ ਮੀਡੀਆ 'ਤੇ ਲੋਕ ਸੁਣਾ ਰਹੇ ਨੇ ਤਰ੍ਹਾਂ ਤਰ੍ਹਾਂ ਦੀਆਂ ਕਹਾਣੀਆਂ
ਟੋਕੀਓ : ਅਸਮਾਨ 'ਚ ਅਜੀਬ ਨਜ਼ਾਰੇ ਵੇਖਣ ਦੀਆਂ ਰਹੱਸ਼ਮਈ ਖ਼ਬਰਾਂ ਅਕਸਰ ਪੜ੍ਹਨ-ਸੁਣਨ ਨੂੰ ਮਿਲ ਜਾਂਦੀਆਂ ਹਨ। ਪਿਛਲੇ ਸਮੇਂ ਦੌਰਾਨ ਅਜਿਹੇ ਰਹੱਸਮਈ ਦ੍ਰਿਸ਼ਾਂ ਨੂੰ ਕਿਸੇ ਦੂਜੇ ਗ੍ਰਹਿ 'ਤੇ ਏਲੀਅਨ ਦੀ ਹੋਂਦ ਨਾਲ ਜੋੜ ਵੀ ਵੇਖਿਆ ਜਾਂਦਾ ਰਿਹਾ ਹੈ। ਅਜਿਹਾ ਹੀ ਇਕ ਰਹੱਸਮਈ ਨਜ਼ਾਰਾ ਜਪਾਨ ਦੇ ਅਸਮਾਨ ਵਿਚ ਵੇਖਣ ਨੂੰ ਮਿਲਿਆ ਹੈ। ਅਸਮਾਨ ਵਿਚ ਉਡ ਰਹੇ ਇਕ ਚਿੱਟੇ ਰੰਗ ਦੇ ਗੁਬਾਰੇ ਨੂੰ ਵੇਖ ਕੇ ਲੋਕ ਹੈਰਾਨ ਰਹਿ ਗਏ।
ਇਸ ਸਬੰਧੀ ਸੋਸ਼ਲ ਮੀਡੀਆ 'ਤੇ ਤਰ੍ਹਾਂ-ਤਰ੍ਹਾਂ ਦੀਆਂ ਚੁੰਝ-ਚਰਚਾਵਾਂ ਚੱਲ ਰਹੀਆਂ ਹਨ। ਕੋਈ ਇਸ ਨੂੰ ਮੌਸਮ ਵਿਭਾਗ ਦਾ ਗੁਬਾਰਾ ਦੱਸ ਰਿਹਾ ਸੀ, ਜਦਕਿ ਕੁੱਝ ਇਸ ਨੂੰ ਯੂਐਫਓ ਕਹਿ ਰਿਹਾ ਸੀ। ਕੁੱਝ ਨੇ ਇਸ ਨੂੰ ਕਿਸੇ ਦੂਸਰੇ ਗ੍ਰਹਿ ਤੋਂ ਏਲੀਅਨ ਦੀ ਉਡਣ ਤਸਕਰੀ ਵੀ ਦੱਸਿਆ ਹੈ।
ਮੀਡੀਆ ਰਿਪੋਰਟਾਂ ਮੁਤਾਬਕ ਇਹ ਗੁਬਾਰਾ ਜਾਪਾਨ ਦੇ ਸ਼ੇਂਦਾਈ ਸ਼ਹਿਰ ਦੇ ਅਓਬਾ ਵਾਰਡ ਦੇ ਅਸਮਾਨ ਉਪਰ ਕਈ ਘੰਟਿਆਂ ਤਕ ਮੰਡਰਾਉਂਦਾ ਰਿਹਾ। ਹੋਲੀ ਗਤੀ ਵਿਚ ਚੱਲ ਰਿਹਾ ਇਹ ਗੁਬਾਰਾ ਅਖੀਰ ਪ੍ਰਸਾਂਤ ਮਹਾਂਸਾਗਰ ਦੇ ਉਪਰ ਜਾ ਕੇ ਅਚਾਨਕ ਗਾਇਬ ਹੋ ਗਿਆ। ਇਸ ਗੁਬਾਰੇ ਦੇ ਹੇਠਾਂ ਦੋ ਕ੍ਰਾਸਡ ਪੋਪੇਡਰ ਲੱਗੇ ਹੋਏ ਸਨ, ਜੋ ਇਸ ਨੂੰ ਉਡਣ ਵਿਚ ਮੱਦਦ ਕਰ ਰਹੇ ਸਨ।
ਸ਼ੁਰੂਆਤ ਵਿਚ ਲੋਕ ਇਸ ਨੂੰ ਮੌਸਮ ਵਿਭਾਗ ਦਾ ਗੁਬਾਰਾ ਸਮਝਦੇ ਰਹੇ। ਇਸ ਗੁਬਾਰੇ ਨੂੰ ਲੈ ਕੇ ਲੋਕਾਂ ਦੀ ਉਤਸੁਕਤਾ ਉਦੋਂ ਹੋਰ ਵੱਧ ਗਈ, ਜਦੋਂ ਮੌਸਮ ਵਿਭਾਗ ਨੇ ਇਸ ਨੂੰ ਅਪਣਾ ਗੁਬਾਰਾ ਮੰਨਣ ਤੋਂ ਇਨਕਾਰ ਕਰ ਦਿਤਾ। ਮੌਸਮ ਵਿਭਾਗ ਦਾ ਕਹਿਣਾ ਸੀ ਕਿ ਉਸ ਨੇ ਅਜਿਹਾ ਕੋਈ ਵੀ ਗੁਬਾਰਾ ਅਸਮਾਨ ਵਿਚ ਨਹੀਂ ਛੱਡਿਆ ਗਿਆ।
ਇਸੇ ਦੌਰਾਨ ਜਾਪਾਨ ਸਰਕਾਰ ਦੇ ਚੀਫ਼ ਕੈਬਨਿਟ ਸੈਕਟਰੀ ਯੋਸ਼ੀਹਿਦੇ ਸੂਗਾ ਨੇ ਕਿਹਾ ਕਿ ਸਰਕਾਰ ਵੀ ਇਸ ਗੁਬਾਰੇ ਦੇ ਭੇਦ ਤੋਂ ਅਨਜਾਣ ਹੈ। ਕੁੱਝ ਲੋਕਾਂ ਨੇ ਸੋਸ਼ਲ ਮੀਡੀਆ 'ਤੇ ਸ਼ੰਕਾ ਜ਼ਾਹਰ ਕਰਦਿਆਂ ਲਿਖਿਆ ਹੈ ਕਿ ਇਹ ਗੁਬਾਰਾ ਉੱਤਰੀ ਕੋਰੀਆ ਨੇ ਜਪਾਨ ਵਿਚ ਕੋਰੋਨਾਵਾਇਰਸ ਫ਼ੈਲਾਉਣ ਲਈ ਭੇਜਿਆ ਹੋ ਸਕਦਾ ਹੈ। ਇਨ੍ਹਾਂ ਸਾਰੀਆਂ ਅਫਵਾਹਾਂ ਪਿਛਲੀ ਸੱਚਾਈ ਬਾਰੇ ਅਜੇ ਤਕ ਕੋਈ ਵੀ ਤੱਥ ਸਾਹਮਣੇ ਨਹੀਂ ਆਇਆ। ਪਰ ਲੋਕਾਂ 'ਚ ਇਸ ਨੂੰ ਲੈ ਕੇ ਤਰ੍ਹਾਂ ਤਰ੍ਹਾਂ ਦੀਆਂ ਚੁੰਝ-ਚਰਚਾਵਾਂ ਦਾ ਬਾਜ਼ਾਰ ਗਰਮ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।