ਉਤਰ ਕੋਰੀਆ ਦੇ ਪ੍ਰਮਾਣੂ ਅਤੇ ਮਿਜ਼ਾਈਲ ਪ੍ਰੀਖਣ ਰੋਕਣ ਦਾ ਸੰਕਲਪ ਲੈਣ ਬਾਰੇ ਜਿਥੇ ਜਾਪਾਨ ਨੇ ਕਿਹਾ ਹੈ ਕਿ ਉਹ ਸੰਤੁਸ਼ਟ ਨਹੀਂ ਹੈ
ਵਾਸ਼ਿੰਗਟਨ : ਉਤਰ ਕੋਰੀਆ ਦੇ ਪ੍ਰਮਾਣੂ ਅਤੇ ਮਿਜ਼ਾਈਲ ਪ੍ਰੀਖਣ ਰੋਕਣ ਦਾ ਸੰਕਲਪ ਲੈਣ ਬਾਰੇ ਜਿਥੇ ਜਾਪਾਨ ਨੇ ਕਿਹਾ ਹੈ ਕਿ ਉਹ ਸੰਤੁਸ਼ਟ ਨਹੀਂ ਹੈ ਅਤੇ ਉਤਰ ਕੋਰੀਆ 'ਤੇ ਉਸ ਦੀ ਦਬਾਅ ਨੀਤੀ ਜਾਰੀ ਰਹੇਗੀ। ਉਥੇ ਹੀ ਦਖਣੀ ਕੋਰੀਆ ਦਾ ਕਹਿਣਾ ਹੈ ਕਿ ਉਤਰ ਕੋਰੀਆ ਦਾ ਇਹ ਕਦਮ ‘ਪ੍ਰਮਾਣੂ ਰੋਕ’ ਦੀ ਦਿਸ਼ਾ ਵਿਚ ਇਕ ‘ਸਾਰਥਕ ਤਰੱਕੀ’ ਹੈ। ਜਾਪਾਨ ਦੇ ਰੱਖਿਆ ਮੰਤਰੀ ਇਤਸੁਨੋਰੀ ਓਨੋਡੇਰਾ ਨੇ ਵਾਸ਼ਿੰਗਟਨ ਵਿਚ ਪੱਤਰਕਾਰਾਂ ਨੂੰ ਕਿਹਾ, ‘ਅਸੀਂ ਸੰਤੁਸ਼ਟ ਨਹੀਂ ਹਾਂ।’
Kim jong un and donald trumpਉਨ੍ਹਾਂ ਕਿਹਾ ਕਿ ਉਤਰ ਕੋਰੀਆ ਨੇ 'ਛੋਟੀਆਂ ਅਤੇ ਮੱਧ ਦੂਰੀ ਵਾਲੀਆਂ ਬੈਲਿਸਟਿਕ ਮਿਜ਼ਾਈਲਾਂ ਨੂੰ ਛੱਡਣ’ ਦਾ ਜਿਕਰ ਨਹੀਂ ਕੀਤਾ। ਓਨੋਡੇਰਾ ਨੇ ਕਿਹਾ, ‘ਸਾਮੂਹਕ ਵਿਨਾਸ਼ ਕਰਨ ਵਾਲੇ ਪ੍ਰਮਾਣੂ ਹਥਿਆਰਾਂ ਅਤੇ ਮਿਜ਼ਾਈਲਾਂ ਦੇ ਹਥਿਆਰਾਂ ਦੇ ਖ਼ਾਤਮੇ ਤਕ' ਉਹ ਪਯੋਂਗਯਾਂਗ 'ਤੇ ਦਬਾਅ ਬਣਾਉਣ ਦੀ ਨੀਤੀ ਜਾਰੀ ਰਖਣਗੇ।
Kim jong unਉਥੇ ਹੀ ਦਖਣੀ ਕੋਰੀਆ ਨੇ ਇਸ ਨੂੰ ‘ਪ੍ਰਮਾਣੂ ਰੋਕ’ ਦੀ ਦਿਸ਼ਾ ਵਿਚ ਇਕ ‘ਸਾਰਥਕ ਤਰੱਕੀ’ ਦਸਦੇ ਹੋਏ ਉਤਰ ਕੋਰੀਆ ਦੀ ਤਾਰੀਫ਼ ਕੀਤੀ। ਦਖਣੀ ਕੋਰੀਆ ਦੇ ਰਾਸ਼ਟਰਪਤੀ ਦਫ਼ਤਰ ਤੋਂ ਜਾਰੀ ਬਿਆਨ ਵਿਚ ਕਿਹਾ, ‘ਉਤਰ ਕੋਰੀਆ ਦਾ ਫ਼ੈਸਲਾ ਪ੍ਰਮਾਣੂ ਰੋਕ ਦੀ ਦਿਸ਼ਾ ਵਿਚ ਇਕ ਸਾਰਥਕ ਤਰੱਕੀ ਹੈ, ਜਿਵੇਂ ਦਾ ਵਿਸ਼ਵ ਚਾਹੁੰਦਾ ਹੈ।’
Donald trumpਉਤਰ ਕੋਰੀਆ ਦੇ ਇਸ ਐਲਾਨ ਤੋਂ ਬਾਅਦ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਟਵੀਟ ਕਰਦੇ ਹੋਏ ਕਿਹਾ, ‘ਇਹ ਉਤਰ ਕੋਰੀਆ ਅਤੇ ਪੂਰੇ ਵਿਸ਼ਵ ਲਈ ਇਕ ਚੰਗੀ ਖ਼ਬਰ ਹੈ ਅਤੇ ਇਕ ਵੱਡੀ ਤਰੱਕੀ ਹੈ।’ ਨਾਲ ਹੀ ਉਨ੍ਹਾਂ ਕਿਹਾ ਕਿ ਉਹ ਕਿਮ ਨਾਲ ਹੋਣ ਵਾਲੇ ਸਿਖ਼ਰ ਸੰਮੇਲਨ ਨੂੰ ਲੈ ਕੇ ਉਤਸ਼ਾਹਿਤ ਹੈ।
