ਧੀਆਂ ਹਮੇਸ਼ਾ ਹੀ ਅਪਣੇ ਮਾਂ ਪਿਓ ਦੇ ਸਿਰ ਦਾ ਤਾਜ ਹੁੰਦੀਆਂ ਹਨ।
ਧੀਆਂ ਹਮੇਸ਼ਾ ਹੀ ਅਪਣੇ ਮਾਂ ਪਿਓ ਦੇ ਸਿਰ ਦਾ ਤਾਜ ਹੁੰਦੀਆਂ ਹਨ। ਸਹਿਣਸ਼ੀਲਤਾ ਤੇ ਪਿਆਰ ਦੀ ਮੂਰਤ ਹੁੰਦੀਆਂ ਹਨ। ਜਗ 'ਤੇ ਲੜਕੀਆਂ ਨੇ ਅਪਣੇ ਵੱਡੇ ਵੱਡੇ ਕਾਰਨਾਮਿਆਂ ਨਾਲ ਇਤਿਹਾਸ ਦੇ ਪੰਨਿਆਂ 'ਤੇ ਸੁਨਹਿਰੀ ਅੱਖਰਾਂ ਨਾਲ ਆਪਣੇ ਨਾਮ ਸਦਾ ਲਈ ਅਮਿਟ ਕਰ ਦਿੱਤੇ ਹਨ ਫਿਰ ਚਾਹੇ ਉਹ ਕਲਪਨਾ ਚਾਵਲਾ, ਵਿੰਨੀ ਮਹਾਜਨ, ਸਰੋਜਿਨੀ ਨਾਇਡੂ ਜਾਂ ਫਿਰ ਕਿਰਨ ਬੇਦੀ ਦੇ ਹੀ ਰੂਪ ਵਿਚ ਕਿਉਂ ਨਾ ਹੋਣ। ਅਜਿਹੀ ਹੀ ਇਕ ਮਿਸਾਲ ਪਾਕਿਸਤਾਨ ਦੀ ਧਰਤੀ ਤੋਂ ਇਕ ਨੌਜਵਾਨ ਲੜਕੀ ਨੇ ਪੇਸ਼ ਕੀਤੀ ਹੈ। ਜਿਸ ਨੇ 10ਵੀਂ ਦੀ ਪ੍ਰੀਖਿਆ ਵਿਚੋਂ 1100 ਵਿਚੋਂ 1056 A+ ਅੰਕ ਲੈਕੇ ਮੁਹਾਰਤ ਹਾਸਿਲ ਕੀਤੇ ਹੈ।
ਇਸ ਲੜਕੀ ਦਾ ਨਾਂਅ ਜੋਗਿੰਦਰ ਕੌਰ ਹੈ ਅਤੇ ਗੁਰੂ ਨਾਨਕ ਪਬਲਿਕ ਮਾਡਲ ਹਾਈ ਸਕੂਲ ਦੀ ਵਿਦਿਆਰਥਣ ਹੈ। ਦੱਸ ਦਈਏ ਕਿ ਜੋਗਿੰਦਰ ਲਈ ਹੋਰ ਕੁੜੀਆਂ ਵਾਂਗੂ ਪੜ੍ਹਾਈ ਕਰਨਾ ਐਨਾ ਸੌਖਾ ਨਹੀਂ ਸੀ ਕਿਉਂਕਿ ਉਨ੍ਹਾਂ ਦੇ ਸਿਰ ਉਤੇ ਪਿਤਾ ਦਾ ਸਾਇਆ ਨਹੀਂ ਹੈ। ਜੋਗਿੰਦਰ ਕੌਰ ਦੇ ਪਿਤਾ ਦਾ ਨਾਂਅ ਸਰਦਾਰ ਕਰਤਾਰ ਸਿੰਘ ਸੀ ਜੋ ਇਸ ਸਮੇਂ ਇਸ ਦੁਨੀਆਂ ਵਿਚ ਨਹੀਂ ਹਨ ਅਤੇ ਉਨ੍ਹਾਂ ਦੀ ਮੌਤ ਹੋਏ ਪੂਰੇ 9 ਸਾਲ ਹੋ ਚੁੱਕੇ ਹਨ। ਪਰ ਫਿਰ ਵੀ ਪਾਕਿਸਤਾਨ ਪੰਜਾਬ ਦੀ ਇਸ ਧੀ ਨੇ ਅਪਣੀ ਮਿਹਨਤ ਸਦਕਾ ਇਹ ਵੱਖਰੀ ਮਿਸਾਲ ਕਾਇਮ ਕੀਤੀ ਹੈ।
ਜੋਗਿੰਦਰ ਕੌਰ ਨੇ 1100 ਵਿਚੋਂ 1056 ਅੰਕ ਲੈਕੇ ਨਵਾਂ ਰਿਕਾਰਡ ਬਣਾਇਆ ਹੈ ਜੋ ਕਿ ਪਿਛਲੇ ਸਾਲ ਮਨਜੀਤ ਕੌਰ ਦੇ ਨਾਂਅ ਦੇ ਹਿੱਸੇ ਆਇਆ ਸੀ।
ਦੱਸ ਦਈਏ ਕਿ ਮਨਬੀਰ ਕੌਰ ਨੇ 1035 ਅੰਕ ਲੈਕੇ 10ਵੀਂ ਦੀ ਪ੍ਰੀਖਿਆ ਵਿਚ ਮੁਹਾਰਤ ਹਾਸਿਲ ਕੀਤੀ ਸੀ। ਪਰ ਇਸ ਵਾਰ ਜੋਗਿੰਦਰ ਨੇ ਮਨਬੀਰ ਦਾ ਰਿਕਾਰਡ ਤੋੜਕੇ ਆਪਣੇ ਨਾਮ ਦਰਜ ਕਰ ਲਿਆ ਹੈ। ਜੋਗਿੰਦਰ ਕੌਰ ਨੇ ਆਪਣੇ ਭਰਾ ਦੀ ਆਪਣੇ ਪਰਿਵਾਰ ਲਈ ਪੜ੍ਹਾਈ ਛੱਡਕੇ ਕੀਤੀ ਕੁਰਬਾਨੀ ਦਾ ਪੂਰਾ ਮੁੱਲ ਪਾਕੇ ਦਿਖਾਇਆ ਹੈ। ਪਰਿਵਾਰ ਨੇ ਅਪੀਲ ਕੀਤੀ ਹੈ ਕਿ ਇਸ ਹੋਣਹਾਰ ਲੜਕੀ ਨੂੰ ਸਕੌਲਰਸ਼ਿਪ ਦਿੱਤੀ ਜਾਵੇ ਤਾਂ ਜੋ ਇਸਦੀ ਪੜ੍ਹਾਈ ਵਿਚ ਰੁਕਾਵਟ ਨਾ ਆ ਸਕੇ।
ਪਰਿਵਾਰ ਦੀ ਆਰਥਿਕ ਮਦਦ ਹੋ ਜਾਣ ਨਾਲ ਹੋ ਸਕਦਾ ਇਹ ਲੜਕੀ ਕੋਈ ਨਵੀਂ ਬੁਲੰਦੀ ਹਾਸਿਲ ਕਰ ਸਕੇ। ਪਰਿਵਾਰ ਦੇ ਸਹਾਇਕ ਵੀ ਇਸ ਘੜੀ ਵਿਚ ਉਨ੍ਹਾਂ ਦੇ ਨਾਲ ਖੜ੍ਹੇ ਹਨ ਅਤੇ ਉਨ੍ਹਾਂ ਸਭ ਦਾ ਇਹ ਮੰਨਣਾ ਹੈ ਕਿ ਜੇਕਰ ਜੋਗਿੰਦਰ ਕੌਰ ਨੂੰ ਲੋੜੀਂਦੀ ਸਹਾਇਤਾ ਸਰਕਾਰ ਵੱਲੋਂ ਮੁਹਈਆ ਹੁੰਦੀ ਹੈ ਤਾਂ ਜੋਗਿੰਦਰ ਅਪਣਾ ਤੇ ਅਪਣੇ ਪਰਿਵਾਰ ਦਾ ਨਾਮ ਜ਼ਰੂਰ ਰੌਸ਼ਨ ਕਰਕੇ ਦਿਖਾਏਗੀ।