ਇੰਗਲੈਂਡ ਵਿਚ ਇਸ ਸਿੱਖ ਨੇ ਵਧਾਇਆ ਪੰਜਾਬੀਆਂ ਦਾ ਮਾਣ...
ਇੰਗਲੈਂਡ: ਵਿਦੇਸ਼ਾਂ ਵਿਚ ਵੱਸਦੇ ਪੰਜਾਬੀ ਜਦੋਂ ਕਦੇ ਨਾਮਣਾ ਖੱਟਦੇ ਹਨ ਤਾਂ ਸਿਰਫ ਸਿੱਖਾਂ ਲਈ ਮਿਸਾਲ ਨਹੀਂ ਬਣਦੇ ਸਗੋਂ ਪੂਰੀ ਦੁਨੀਆ ਵਿਚ ਵੱਖਰੀ ਪਛਾਣ ਬਣਾਉਂਦੇ ਹਨ। ਇੰਗਲੈਂਡ ਵਿਚ ਕਰਵਾਏ ਜਾਂਦੇ ਬੀਬੀਸੀ 2 ਮਾਸਟਰ ਸ਼ੈੱਫ ਪ੍ਰੋਫੈਸ਼ਨਲ ਵਿਚ ਪਹਿਲੀ ਵਾਰ ਸ਼ਾਮਲ ਹੋਣ ਵਾਲੇ ਅਰਬਿੰਦਰ ਸਿੰਘ ਦੁੱਗਲ, ਵੀ ਉਨਾਂ ਵਿਚ ਸ਼ਾਮਲ ਹਨ ਜੋ ਆਪਣੇ ਹੁਨਰ ਤੇ ਕਲਾ ਦੇ ਜ਼ਰੀਏ ਲੋਕਾਂ ਦੇ ਦਿਲਾਂ ਤੇ ਰਾਜ਼ ਕਰਦੇ ਹਨ। ਮੁਹਾਲੀ ਦੇ ਜੰਮਪਲ ਅਰਬਿੰਦਰ ਸਿੰਘ ਦੁੱਗਲ ਇੰਗਲੈਂਡ ਦੇ ਮਾਸਟਰ ਸ਼ੈਫ 2019 ਦੇ ਸੈਮੀਫਾਈਨਲ ਵਿਚ ਪਹੁੰਚਣ ਵਾਲੇ ਇਕਲੌਤੇ ਪੰਜਾਬੀ ਹਨ।
Arbinder Singh
ਗੱਲ ਜੇਕਰ ਖਾਣਾ ਬਣਾਉਣ ਦੀ ਕਲਾ ਹੋਵੇ ਤਾਂ ਅਰਬਿੰਦਰ ਦੀ ਇਸ ਕਾਬਲੀਅਤ ਨੇ ਉਹਨਾਂ ਨੂੰ ਦੁਨੀਆ ਵਿਚ ਪ੍ਰਸਿੱਧ ਕਰ ਦਿੱਤਾ ਹੈ। ਔਰੰਗਾਬਾਦ ‘ਚ ਬਿਜ਼ਨਸ ਮੈਨੇਜਮੈਂਟ ਦੀ ਪੜ੍ਹਾਈ ਤੇ ਫਿਰ ਹੋਟਲ ਮੈਨੇਜਮੈਂਟ ਦੀ ਡਿਗਰੀ ਲੈਣ ਤੋਂ ਬਾਅਦ ਅਰਬਿੰਦਰ ਨੇ ਮੁੰਬਈ ਵਿਚ ਕੰਮ ਕੀਤਾ, ਤੇ ਫਿਰ ਉਸ ਤੋਂ ਬਾਅਦ ਉਹਨਾਂ ਨੂੰ ਯੂ.ਕੇ. ਆਉਣ ਦਾ ਮੌਕਾ ਮਿਲਿਆ।
Arbinder Singh
ਅਰਬਿੰਦਰ ਦੱਸਦੇ ਹਨ, ਜਦ “ਮੈਂ ਫਰੈਂਚ ਰੈਸਟੋਰੈਂਟ ਵਿਚ ਕੰਮ ਕਰਨਾ ਸ਼ੁਰੂ ਕੀਤਾ, ਤੇ ਫਿਰ ਯੂਰੋਪੀਅਨ ਰਸੋਈ ਵਿਚ ਵੀ ਹੱਥ ਅਜ਼ਮਾਇਆ, ਸ਼ੁਰੂ ਸ਼ੁਰੂ ਵਿਚ ਮੁਸ਼ਕਿਲ ਹੁੰਦਾ ਹੈ, ਪਰ ਜਦੋਂ ਤੁਸੀਂ ਆਪਣਾ ਹੁਨਰ ਦਿਖਾਉਂਦੇ ਹੋ ਤਾਂ ਤੁਹਾਨੂੰ ਅੱਗੇ ਵੱਧਣ ਦਾ ਮੌਕਾ ਜ਼ਰੂਰ ਮਿਲਦਾ ਹੈ ”
ਹਾਲਾਂਕਿ ਇਸ ਤੋਂ ਪਹਿਲਾਂ ਅਰਬਿੰਦਰ ਪ੍ਰਸਿੱਧ ਹੋਟਲ ਮੈਰੀਅਟ ਵਿਚ ਵੀ ਕੰਮ ਕਰ ਚੁੱਕੇ ਸਨ। ਮਾਸਟਰ ਸ਼ੈਫ ਵਿਚ ਜਾਣ ਲਈ ਵੀ ਉਹ ਪਿਛਲੇ 6-7 ਸਾਲ ਤੋਂ ਕੋਸ਼ਿਸ਼ ਕਰ ਰਹੇ ਸਨ ਤੇ ਉਨ੍ਹਾਂ ਦੀ ਇਹ ਇੱਛਾ ਆਖਰਕਾਰ ਬੀਬੀਸੀ ਮਾਸਟਰ ਸ਼ੈਫ ਸੀਜ਼ਨ 12 ਵਿਚ ਜਾ ਕੇ ਪੂਰੀ ਹੋਈ।
Master Chef
ਉਹ ਪੂਰੇ ਇੰਗਲੈਂਡ ਵਿਚੋਂ ਚੁਣੇ ਗਏ 48 ਉਮੀਦਵਾਰਾਂ ਵਿਚੋਂ ਫਾਈਨਲ 'ਚ ਪਹੁੰਚਣ ਵਾਲੇ 8 ਕੈਂਡੀਡੇਟਸ ਵਿਚ ਸ਼ਾਮਲ ਸਨ, ਇੰਨਾ ਹੀ ਨਹੀਂ ਇਕਲੌਤੇ ਸਾਬਤ ਸੂਰਤ ਸਿੱਖ ਵੀ ਜਿਨ੍ਹਾਂ ਨੂੰ ਇੱਥੇ ਤੱਕ ਪਹੁੰਚਣਦਾ ਮਾਣ ਹਾਸਲ ਹੋਇਆ ।
“ਮਾਸਟਰ ਸ਼ੈੱਫ ਇਕ ਬੇਹੱਦ ਪ੍ਰੌਫੈਸ਼ਨਲ ਪ੍ਰੋਗਰਾਮ ਹੈ ਜਿਸ ਵਿਚ ਤੁਹਾਡੀ ਕਲਾ ਨੂੰ ਮਾਪਣ ਦਾ ਪੈਮਾਨਾ ਕਾਫੀ ਵੱਡਾ ਹੁੰਦਾ ਹੈ, ਮੈਂ ਇਹ ਦੇਖਣਾ ਚਾਹੁੰਦਾ ਸੀ ਕਿ ਯੂਰੋਪੀਅਨ ਤੇ ਫ੍ਰੈਂਚ ਖਾਣੇ ਦੀ ਇਸ ਇੰਡਸਟਰੀ ਵਿਚ ਮੈਂ ਕਿੱਥੇ ਸਟੈਂਡ ਕਰਦਾ ਹਾਂ ”
Arbinder Singh
ਅਰਬਿੰਦਰ ਮੰਨਦੇ ਹਨ ਕਿ ਇੱਥੇ ਤੱਕ ਪਹੁੰਚਣਾ ਅਸਾਨ ਨਹੀਂ ਸੀ, ਇਸ ਦੇ ਪਿੱਛੇ ਉਹਨਾਂ ਦੀ 15 ਸਾਲ ਦੀ ਮਿਹਨਤ ਹੈ। ਨਾ ਸਿਰਫ ਇਹੀ ਬਲਕਿ ਰਸੋਈ ਦੀ ਇਸ ਕਲਾ ਦੇ ਨਾਲ ਨਾਲ ਫ੍ਰੈਂਚ ਤੇ ਯੂਰੋਪੀਅਨ ਖਾਣੇ 'ਚ ਭਾਰਤੀ ਖਾਣੇ ਦਾ ਫਿਊਜ਼ਨ ਲਿਆਉਣ ਵਾਲੇ ਅਰਬਿੰਦਰ ਸਿੰਘ ਦੁੱਗਲ ਇਕਲੌਤੇ ਅਜਿਹੇ ਸ਼ਖਸ ਹਨ ਜੋ ਆਪਣੇ ਇਸ ਹੁਨਰ ਨੂੰ ਲੋਕਾਂ ਤੱਕ ਪਹੁੰਚਾਉਣ ਲਈ ਵੀ ਸ਼ੁਰੂਆਤ ਕਰਨ ਜਾ ਰਹੇ ਹਨ।
Arbinder Singh
ਇੰਗਲੈਂਡ ਵਿਚ ਸਿੱਖ ਕੌਮ ਦਾ ਮਾਣ ਵਧਾਉਣ ਵਾਲੇ ਅਰਬਿੰਦਰ ਸਿੰਘ ਦੀ ਇਸ ਪਾਕਿ ਕਲਾ ਦੀ ਚਰਚਾ ਬਕਿੰਘਮ ਪੈਲੇਸ ਤੱਕ ਵੀ ਹੋ ਚੁੱਕੀ ਹੈ। ਫਰਵਰੀ 2019 ਵਿਚ ਹੀ ਬਕਿੰਘਮ ਪੈਲੇਸ ਵਿਚ ਰੱਖੇ ਗਏ ਸ਼ਾਹੀ ਡਿਨਰ ਵਿਚ ਅਰਬਿੰਦਰ ਸਿੰਘ ਦੁੱਗਲ ਦੀ ਮਹਿਮਾਨ ਨਵਾਜ਼ੀ ਦੇ ਸਭ ਕਾਇਲ ਹੋ ਗਏ ਸਨ ਤੇ ਇਹ ਸਿੱਖ ਬ੍ਰਿਟਿਸ਼ ਮੀਡੀਆ ਦੀਆਂ ਸੁਰਖੀਆਂ ਬਣਿਆ ਰਿਹਾ।
“ਇਥੇ ਤੱਕ ਪਹੁੰਚਣਾ, ਤੇ ਫਿਰ ਸਿੱਖ ਕੌਮ ਨੂੰ ਇੰਗਲੈਂਡ ਵਿਚ ਜੋ ਮਾਣ ਮਿਲ ਰਿਹਾ ਹੈ ਉਹ ਕਾਬਿਲ-ਏ-ਤਾਰੀਫ ਹੈ, ਇਥੇ ਆ ਕੇ ਪਤਾ ਲੱਗਦਾ ਹੈ ਕਿ ਸਿੱਖ ਅਤੇ ਸਿੱਖੀ ਦੀ ਕੀ ਅਹਿਮੀਅਤ ਹੈ ”
ਅਰਬਿੰਦਰ ਨੇ ਤਕਰੀਬਨ 7-8 ਸਾਲ ਸੈਂਟ੍ਰਲ਼ ਲੰਦਨ ਵਿਚ ਕੰਮ ਕੀਤਾ ਜਿਸ ਤੋਂ ਬਾਅਦ ਉਹ ਹੁਣ ਅੱਗੇ ਵਧਦੇ ਹੋਏ ਹੁਣ ਕੁਝ ਨਵਾਂ ਕਰਨ ਜਾ ਰਹੇ ਹਨ। ਆਪਣਾ ਖੁਦ ਦਾ ਰੈਸਟੋਰੈਂਟ ਖੋਲਣ ਜਾ ਰਹੇ ਅਰਬਿੰਦਰ ਸਿੰਘ ਕਹਿੰਦੇ ਨੇ, ਜਦ ਉਹਨਾਂ ਬ੍ਰਿਟਿਸ਼ ਰੈਸਟੋਰੈਂਟ ਵਿਚ ਕੰਮ ਕੀਤਾ ਤਾਂ ਉਹਨਾਂ ਨੂੰ ਮਹਿਸੂਸ ਹੋਇਆ ਕਿ ਉਹਨਾਂ ਦੀ ਤਕਨੀਕ ਨੂੰ ਭਾਰਤੀ ਖਾਣੇ ਵਿਚ ਵੀ ਸ਼ਾਮਲ ਕੀਤਾ ਜਾਣਾ ਚਾਹੀਦਾ ਹੈ।
Master Chef, Arbinder Singh
ਇਹ ਕੰਪੀਟੀਸ਼ਨ ਖਤਮ ਹੋਣ ਤੋਂ ਬਾਅਦ ਉਹਨਾਂ ਦਾ ਮਕਸਦ ਇਹੀ ਹੈ ਕਿ ਜਿਵੇਂ ਨਾ ਸਿਰਫ ਪੰਜਾਬੀ ਬਲਕਿ ਭਾਰਤੀ ਖਾਣਾ ਹਰ ਲਿਹਾਜ਼ ਤੋਂ ਵੱਖਰੀ ਅਹਿਮੀਅਤ ਰੱਖਦਾ ਹੈ, ਉਸ ਵਿਚ ਜੇਕਰ ਬ੍ਰਿਟਿਸ਼ ਤੜਕਾ ਲਗਾ ਦਿੱਤਾ ਜਾਵੇ ਤਾਂ ਉਹ ਲਾਜਵਾਬ ਹੋਵੇਗਾ।
