America News : ਅਮਰੀਕਾ ਨੇ ਕੀਤੀ ਬੇਇੱਜ਼ਤੀ, ਕਿਹਾ- ਕੀ ਬੀਜਿੰਗ ਕਿਸੇ ਨਾਲ ਲੜ ਸਕੇਗਾ?
America News : ਅਮਰੀਕਾ ਨੇ ਚੀਨ ਦੀ ਹਮਲਾਵਰ ਪਰਮਾਣੂ ਪਣਡੁੱਬੀ ਸਮੁੰਦਰ ਵਿੱਚ ਡੁੱਬਣ ’ਤੇ ਬੀਜਿੰਗ ਦਾ ਅਪਮਾਨ ਕੀਤਾ ਹੈ। ਇੱਕ ਸੀਨੀਅਰ ਅਮਰੀਕੀ ਰੱਖਿਆ ਅਧਿਕਾਰੀ ਨੇ ਕਿਹਾ ਕਿ ਚੀਨ ਦੀ ਨਵੀਨਤਮ ਪਰਮਾਣੂ ਸ਼ਕਤੀ ਨਾਲ ਚੱਲਣ ਵਾਲੀ ਪਣਡੁੱਬੀ ਇਸ ਸਾਲ ਦੇ ਸ਼ੁਰੂ ਵਿਚ ਸਮੁੰਦਰ ਵਿੱਚ ਡੁੱਬ ਗਈ ਸੀ। ਇਹ ਉਸ ਲਈ ਨਮੋਸ਼ੀ ਵਾਲੀ ਗੱਲ ਹੈ, ਕਿਉਂਕਿ ਉਹ ਆਪਣੀ ਫੌਜੀ ਸਮਰੱਥਾ ਨੂੰ ਵਧਾਉਣਾ ਚਾਹੁੰਦਾ ਹੈ। ਉਹ ਆਪਣੀ ਫੌਜ ਨੂੰ ਸਭ ਤੋਂ ਸ਼ਕਤੀਸ਼ਾਲੀ ਬਣਾਉਣਾ ਚਾਹੁੰਦਾ ਹੈ। ਪਰ ਜਿਹੜਾ ਆਪਣੀ ਇੱਕ ਪਣਡੁੱਬੀ ਨੂੰ ਨਹੀਂ ਬਚਾ ਸਕਿਆ, ਕੀ ਉਹ ਕਿਸੇ ਨਾਲ ਲੜ ਸਕੇਗਾ?
ਅਮਰੀਕੀ ਅਧਿਕਾਰੀ ਦੇ ਇਸ ਬਿਆਨ ਨੇ ਚੀਨੀ ਫੌਜੀ ਸਮਰੱਥਾ ਦੇ ਖੋਖਲੇਪਣ ਦਾ ਪਰਦਾਫਾਸ਼ ਕਰ ਦਿੱਤਾ ਹੈ। ਮਤਲਬ ਸਾਫ਼ ਹੈ ਕਿ ਹਾਥੀ ਦੇ ਦੰਦ ਖਾਣੇ ਦੇ ਕੁਝ ਹੋਰ ਅਤੇ ਦਿਖਾਉਣ ਦੇ ਕੁਝ ਹੋਰ ਹੁੰਦੇ ਹਨ। ਚੀਨ ਸ਼ਾਇਦ ਸਭ ਤੋਂ ਸ਼ਕਤੀਸ਼ਾਲੀ ਫੌਜ ਅਤੇ ਦੂਜੇ ਦੇਸ਼ਾਂ 'ਤੇ ਹਾਵੀ ਹੋਣ ਲਈ ਸਭ ਤੋਂ ਆਧੁਨਿਕ ਹਥਿਆਰਾਂ ਦਾ ਦਾਅਵਾ ਕਰਦਾ ਹੈ। ਪਰ ਇਸ ਇੱਕ ਘਟਨਾ ਨੇ ਇਸਦਾ ਸੱਚ ਉਜਾਗਰ ਕਰ ਦਿੱਤਾ ਹੈ।
ਤੁਹਾਨੂੰ ਦੱਸ ਦੇਈਏ ਕਿ ਚੀਨ ਦੇ ਕੋਲ ਪਹਿਲਾਂ ਹੀ 370 ਤੋਂ ਜ਼ਿਆਦਾ ਜਹਾਜ਼ਾਂ ਦੇ ਨਾਲ ਦੁਨੀਆਂ ਦੀ ਸਭ ਤੋਂ ਵੱਡੀ ਨੇਵੀ ਹੈ। ਇਸ ਨਾਲ ਇਸ ਨੇ ਪਰਮਾਣੂ ਹਥਿਆਰਬੰਦ ਪਣਡੁੱਬੀਆਂ ਦੀ ਨਵੀਂ ਪੀੜ੍ਹੀ ਦਾ ਉਤਪਾਦਨ ਸ਼ੁਰੂ ਕਰ ਦਿੱਤਾ ਹੈ।
ਕਿਵੇਂ ਡੁੱਬੀ ਚੀਨ ਦੀ ਪਰਮਾਣੂ ਪਣਡੁੱਬੀ ?
ਇਹ ਸਿਰਫ਼ ਚੀਨ ਦੀ ਪਰਮਾਣੂ ਪਣਡੁੱਬੀ ਹੀ ਨਹੀਂ ਡੁੱਬੀ, ਬਲਕਿ ਉਨ੍ਹਾਂ ਦੇ ਸਾਰੇ ਦਾਅਵੇ ਵੀ ਪਾਣੀ 'ਚ ਡੁੱਬ ਗਏ ਹਨ। ਅਮਰੀਕਾ ਦੇ ਇਕ ਸੀਨੀਅਰ ਰੱਖਿਆ ਅਧਿਕਾਰੀ ਨੇ ਆਪਣਾ ਨਾਂ ਗੁਪਤ ਰੱਖਣ ਦੀ ਸ਼ਰਤ 'ਤੇ ਦੱਸਿਆ ਕਿ ਚੀਨ ਦੀ ਨਵੀਂ ਪਹਿਲੀ ਸ਼੍ਰੇਣੀ ਦੀ ਪਰਮਾਣੂ ਸ਼ਕਤੀ ਨਾਲ ਚੱਲਣ ਵਾਲੀ ਪਣਡੁੱਬੀ ਮਈ ਅਤੇ ਜੂਨ ਦੇ ਵਿਚਕਾਰ ਕਿਸੇ ਘਾਟ ਨੇੜੇ ਡੁੱਬ ਗਈ। ਵਾਸ਼ਿੰਗਟਨ ਵਿੱਚ ਚੀਨੀ ਦੂਤਾਵਾਸ ਦੇ ਬੁਲਾਰੇ ਨੇ ਕਿਹਾ ਕਿ ਉਨ੍ਹਾਂ ਕੋਲ ਇਸ ਮਾਮਲੇ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ।
ਚੀਨੀ ਅਧਿਕਾਰੀ ਨੇ ਕਿਹਾ, "ਤੁਸੀਂ ਜੋ ਸਥਿਤੀ ਬਿਆਨ ਕੀਤੀ ਹੈ, ਉਸ ਤੋਂ ਅਸੀਂ ਜਾਣੂ ਨਹੀਂ ਹਾਂ ਅਤੇ ਫਿਲਹਾਲ ਸਾਡੇ ਕੋਲ ਇਸ ਨਾਲ ਜੁੜੀ ਕੋਈ ਜਾਣਕਾਰੀ ਨਹੀਂ ਹੈ।" ਅਧਿਕਾਰੀ ਨੇ ਕਿਹਾ ਕਿ ਇਹ ਸਪੱਸ਼ਟ ਨਹੀਂ ਹੈ ਕਿ ਇਹ ਕਿਸ ਕਾਰਨ ਡੁੱਬੀ ਜਾਂ ਕੀ ਉਸ ਸਮੇਂ ਇਸ ਵਿਚ ਪ੍ਰਮਾਣੂ ਬਾਲਣ ਸੀ ਜਾਂ ਨਹੀਂ।
ਚੀਨ ਦੇ ਅੰਦਰੂਨੀ ਰੱਖਿਆ ਉਦਯੋਗ 'ਤੇ ਉੱਠੇ ਸਵਾਲ
ਚੀਨ ਵਿੱਚ ਹਮਲਾਵਰ ਪਰਮਾਣੂ ਪਣਡੁੱਬੀ ਦੇ ਡੁੱਬਣ ਕਾਰਨ ਚੀਨ ਦੇ ਅੰਦਰੂਨੀ ਰੱਖਿਆ ਉਦਯੋਗਾਂ ਦੀ ਭਰੋਸੇਯੋਗਤਾ ਵੀ ਸਵਾਲਾਂ ਦੇ ਘੇਰੇ ਵਿੱਚ ਹੈ। ਅਧਿਕਾਰੀ ਨੇ ਕਿਹਾ, "ਸਿਖਲਾਈ ਦੇ ਮਿਆਰਾਂ ਅਤੇ ਸਾਜ਼ੋ-ਸਾਮਾਨ ਦੀ ਗੁਣਵੱਤਾ ਬਾਰੇ ਸਪੱਸ਼ਟ ਸਵਾਲਾਂ ਨੂੰ ਛੱਡ ਕੇ, ਇਹ ਘਟਨਾ ਪੀ.ਐਲ.ਏ. ਦੀ ਅੰਦਰੂਨੀ ਜਵਾਬਦੇਹੀ ਅਤੇ ਚੀਨ ਦੇ ਰੱਖਿਆ ਉਦਯੋਗ ਦੀ ਨਿਗਰਾਨੀ ਬਾਰੇ ਡੂੰਘੇ ਸਵਾਲ ਖੜ੍ਹੇ ਕਰਦੀ ਹੈ, ਜੋ ਲੰਬੇ ਸਮੇਂ ਤੋਂ ਭ੍ਰਿਸ਼ਟਾਚਾਰ ਨਾਲ ਗ੍ਰਸਤ ਹੈ। ਇਹ ਹੈਰਾਨੀ ਦੀ ਗੱਲ ਨਹੀਂ ਹੈ ਕਿ ਪੀ.ਐਲ.ਏ. ਜਲ ਸੈਨਾ ਡੁੱਬਣ ਦੀ ਘਟਨਾ ਨੂੰ ਛੁਪਾਉਣ ਦੀ ਕੋਸ਼ਿਸ਼ ਕਰੇਗੀ।
ਪਲੈਨੇਟ ਲੈਬਜ਼ ਤੋਂ ਸੈਟੇਲਾਈਟ ਚਿੱਤਰਾਂ ਦੀ ਇੱਕ ਲੜੀ ਵੁਚਾਂਗ ਸ਼ਿਪਯਾਰਡ ਵਿੱਚ ਕ੍ਰੇਨ ਦਿਖਾਉਂਦੀ ਹੈ, ਜਿੱਥੇ ਪਣਡੁੱਬੀ ਡੌਕ ਕੀਤੀ ਗਈ ਹੋਵੇਗੀ। ਚੀਨ ਦੀ ਫੌਜ 'ਤੇ ਪੈਂਟਾਗਨ ਦੀ ਰਿਪੋਰਟ ਦੇ ਅਨੁਸਾਰ, 2022 ਤੱਕ, ਚੀਨ ਕੋਲ ਛੇ ਪ੍ਰਮਾਣੂ ਸ਼ਕਤੀ ਨਾਲ ਚੱਲਣ ਵਾਲੀਆਂ ਬੈਲਿਸਟਿਕ ਮਿਜ਼ਾਈਲ ਪਣਡੁੱਬੀਆਂ, ਛੇ ਪ੍ਰਮਾਣੂ ਸ਼ਕਤੀ ਨਾਲ ਚੱਲਣ ਵਾਲੀਆਂ ਹਮਲਾਵਰ ਪਣਡੁੱਬੀਆਂ ਅਤੇ 48 ਡੀਜ਼ਲ ਨਾਲ ਚੱਲਣ ਵਾਲੀਆਂ ਹਮਲਾਵਰ ਪਣਡੁੱਬੀਆਂ ਸਨ।
ਅਮਰੀਕੀ ਰੱਖਿਆ ਵਿਭਾਗ ਨੇ ਕਿਹਾ ਹੈ ਕਿ 2025 ਤੱਕ ਪਣਡੁੱਬੀ ਫੋਰਸ 65 ਅਤੇ 2035 ਤੱਕ 80 ਤੱਕ ਵਧਣ ਦੀ ਉਮੀਦ ਹੈ। ਚੀਨ ਨੇ ਕਿਹਾ ਕਿ ਉਨ੍ਹਾਂ ਨੇ ਪ੍ਰਸ਼ਾਂਤ ਮਹਾਸਾਗਰ ਵਿੱਚ ਇੱਕ ਅੰਤਰ-ਮਹਾਂਦੀਪੀ ਬੈਲਿਸਟਿਕ ਮਿਜ਼ਾਈਲ ਦੀ ਇੱਕ ਦੁਰਲੱਭ ਲਾਂਚਿੰਗ ਸਫਲਤਾਪੂਰਵਕ ਕੀਤੀ, ਜਿਸ ਨਾਲ ਦੇਸ਼ ਦੇ ਪ੍ਰਮਾਣੂ ਨਿਰਮਾਣ ਬਾਰੇ ਅੰਤਰਰਾਸ਼ਟਰੀ ਚਿੰਤਾਵਾਂ ਪੈਦਾ ਹੋਣ ਦੀ ਸੰਭਾਵਨਾ ਹੈ।
(For more news apart from China "offensive nuclear submarine" sank in the sea News in Punjabi, stay tuned to Rozana Spokesman)
