ਬੰਬ ਧਮਾਕਿਆਂ 'ਚ 350 ਤੋਂ ਜ਼ਿਆਦਾ ਲੋਕਾਂ ਦੀ ਮੌਤ ਅਤੇ 500 ਜ਼ਖ਼ਮੀ ਹੋਏ ਸਨ
ਕੋਲੰਬੋ : ਹਾਲ 'ਚ ਅੱਤਵਾਦੀ ਹਮਲੇ ਨਾਲ ਕੰਬੇ ਸ਼੍ਰੀਲੰਕਾ ਦੇ ਕੁਝ ਕੈਥੋਲਿਕ ਗਿਰਜਾਘਰਾਂ 'ਚ ਪੰਜ ਮਈ ਤੋਂ ਪ੍ਰਾਰਥਨਾਵਾਂ ਦੁਬਾਰਾ ਸ਼ੁਰੂ ਹੋਣਗੀਆਂ ਪਰ ਸੁਰੱਖਿਆ ਕਾਰਨਾਂ ਕਰਕੇ ਗਿਰਜਾਘਰਾਂ 'ਚ ਕੋਈ ਵੀ ਬੈਗ ਲਿਜਾਉਣ ਦੀ ਆਗਿਆ ਨਹੀਂ ਹੋਵੇਗੀ। ਜ਼ਿਕਰਯੋਗ ਹੈ ਕਿ ਈਸਟਰ ਮੌਕੇ 'ਤੇ ਐਤਵਾਰ ਨੂੰ ਸ਼੍ਰੀਲੰਕਾ ਦੇ ਤਿੰਨ ਗਿਰਜਾਘਰਾਂ ਤੇ ਲਗਜ਼ਰੀ ਹੋਟਲਾਂ 'ਚ ਬੰਬ ਧਮਾਕੇ ਹੋਏ ਸਨ, ਜਿਨ੍ਹਾਂ 'ਚ 350 ਤੋਂ ਜ਼ਿਆਦਾ ਲੋਕਾਂ ਦੀ ਮੌਤ ਹੋ ਗਈ ਸੀ ਤੇ 500 ਹੋਰ ਜ਼ਖਮੀ ਹੋ ਗਏ ਸਨ।
Sri lanka attacks
ਸ਼੍ਰੀਲੰਕਾ ਪੁਲਿਸ ਨੇ ਮੰਗਲਵਾਰ ਨੂੰ ਕਿਹਾ ਕਿ ਈਸਟਰ ਮੌਕੇ ਹੋਏ ਬੰਬ ਧਮਾਕਿਆਂ ਨਾਲ ਜੁੜੀ ਇਕ ਵੈਨ ਬਰਾਮਦ ਕੀਤੀ ਗਈ ਹੈ। ਇਸ ਦੇ ਨਾਲ ਹੀ ਦੇਸ਼ ਦੇ ਉੱਤਰੀ ਮੱਧ ਸੂਬੇ ਵਿਚੋਂ 3 ਸ਼ੱਕੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਸ ਬੁਲਾਰੇ ਰੂਵਨ ਗੁਣਸ਼ੇਖਰਾ ਨੇ ਕਿਹਾ ਕਿ ਸ਼ੱਕੀ ਵੈਨ ਦੀ ਵਰਤੋਂ ਅੱਤਵਾਦੀ ਹਮਲੇ ਵਿਚ ਕੀਤੀ ਗਈ ਸੀ। ਇਸ ਨੂੰ ਪੋਲੋਨਰੂਵਾ ਸ਼ਹਿਰ ਦੇ ਸੁੰਗਵਿਲਾ ਵਿਚ ਜ਼ਬਤ ਕੀਤਾ ਗਿਆ।
Sri Lanka attacks
ਉਨ੍ਹਾਂ ਨੇ ਦੱਸਿਆ ਕਿ 'ਈ.ਪੀ.ਪੀ.ਐੱਕਸ. 2399' ਦੀ ਲਾਈਸੈਂਸ ਪਲੇਟ ਲੱਗੀ ਵੈਨ ਨੂੰ ਜ਼ਬਤ ਕਰਨ ਦੇ ਨਾਲ ਤਿੰਨ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ। ਇਹ ਵੈਨ ਇਲਾਕੇ ਵਿਚ ਸਥਿਤ ਇਕ ਘਰ ਦੇ ਬਗੀਚੇ ਵਿਚ ਖੜ੍ਹੀ ਸੀ। ਇਸ ਮਾਮਲੇ ਵਿਚ ਅੱਗੇ ਦੀ ਜਾਂਚ ਚੱਲ ਰਹੀ ਹੈ। ਪਿਛਲੇ ਹਫਤੇ ਸ਼੍ਰੀਲੰਕਾ ਨੇ ਕੋਲੰਬੋ ਵਿਚ ਸਾਰੇ ਪੁਲਸ ਥਾਣਿਆਂ ਨੂੰ ਹਾਈ ਐਲਰਟ 'ਤੇ ਰੱਖਿਆ ਸੀ ਕਿਉਂਕਿ ਪੁਲਸ ਨੂੰ ਵਿਸਫੋਟਕ ਪਦਾਰਥਾਂ ਦੀ ਆਵਾਜਾਈ ਲਈ ਵਰਤੇ ਗਏ ਟਰੱਕ ਅਤੇ ਵੈਨ ਦੀ ਤਲਾਸ਼ ਸੀ। ਈਸਟਰ ਹਮਲੇ ਦੇ ਸਿਲਸਿਲੇ ਵਿਚ ਹੁਣ ਤੱਕ ਕੁੱਲ 106 ਸ਼ੱਕੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
