ਜਾਹਰਾਨ ਹਾਸ਼ਿਮ ਦੀ ਸ਼ੰਗਰੀ-ਲਾ ਹੋਟਲ ਵਿਚ ਹੋਏ ਧਮਾਕੇ 'ਚ ਹੋਈ ਮੌਤ
ਕੋਲੰਬੋ : ਸ਼ੀ੍ਲੰਕਾ 'ਚ ਹੋਏ ਬੰਬ ਧਮਾਕਿਆਂ 'ਚ ਮੁੱਖ ਭੂਮਿਕਾ ਨਿਭਾਉਣ ਵਾਲੇ ਇਸਲਾਮਿਕ ਸਟੇਟ ਦੇ ਅਤਿਵਾਦੀ ਦੀ ਕੋਲੰਬੋ ਦੇ ਹੋਟਲ ਵਿਚ ਹੋਏ ਧਮਾਕੇ 'ਚ ਮੌਤ ਹੋ ਗਈ ਹੈ। ਇਸ ਗੱਲ ਦੀ ਪੁਸ਼ਟੀ ਦੇਸ਼ ਦੇ ਰਾਸ਼ਟਰਪਤੀ ਮੈਤਰੀਪਾਲਾ ਸਿਰੀਸੇਨਾ ਨੇ ਕੀਤੀ। ਪੱਤਰਕਾਰਾਂ ਨੂੰ ਸੰਬੋਧਤ ਕਰਦਿਆਂ ਉਨ੍ਹਾਂ ਕਿਹਾ ਕਿ ਖੁਫ਼ੀਆ ਏਜੰਸੀਆਂ ਨੇ ਮੈਨੂੰ ਜਿਹੜੀ ਜਾਣਕਾਰੀ ਦਿੱਤੀ ਹੈ, ਉਸ ਮੁਤਾਬਕ ਜਾਹਰਾਨ ਹਾਸ਼ਿਮ ਦੀ ਸ਼ੰਗਰੀ-ਲਾ ਹੋਟਲ ਵਿਚ ਹੋਏ ਧਮਾਕੇ 'ਚ ਮੌਤ ਹੋ ਗਈ ਹੈ।
Maithripala Sirisena
ਇਸਲਾਮਿਕ ਸਟੇਟ ਸੰਗਠਨ ਨੇ ਹਮਲਿਆਂ ਦੀ ਜ਼ਿੰਮੇਵਾਰੀ ਲੈਂਦਿਆਂ ਇਕ ਵੀਡੀਓ ਜਾਰੀ ਕੀਤੀ ਹੈ। ਜਿਸ 'ਚ ਧਮਾਕਿਆਂ ਨੂੰ ਅੰਜਾਮ ਦੇਣ ਵਾਲੇ ਆਤਮਘਾਤੀ ਹਮਲਾਵਰ ਅਤਿਵਾਦੀ ਸੰਗਠਨ ਦੀ ਸਾਦੀ ਵਰਦੀ 'ਚ ਨਜ਼ਰ ਆ ਰਹੇ ਸਨ। ਇਸੇ ਵੀਡੀਓ 'ਚ ਹਾਸ਼ਿਮ ਵੀ ਨਜ਼ਰ ਆਇਆ ਸੀ, ਪਰ ਹਮਲਿਆਂ ਤੋਂ ਬਾਅਦ ਉਸ ਦਾ ਕੋਈ ਅਤਾ-ਪਤਾ ਨਹੀਂ ਹੈ। ਸਿਰੀਸੇਨਾ ਨੇ ਇਹ ਸਪਸ਼ਟ ਨਹੀਂ ਕੀਤਾ ਹੈ ਕਿ ਹਾਸ਼ਿਮ ਨੇ ਬੰਬ ਧਮਾਕਿਆਂ 'ਚ ਕੀ ਭੂਮਿਕਾ ਨਿਭਾਈ ਸੀ।
Sri Lanka attacks: Zahran Hashim died in hotel attack
ਸਰਕਾਰ ਨੇ ਜਦੋਂ ਹਾਸ਼ਿਮ ਦੇ ਸੰਗਠਨ ਨੈਸ਼ਨਲ ਤੌਹੀਦ ਜਮਾਤ ਦਾ ਧਮਾਕਿਆਂ ਪਿੱਛੇ ਹੱਥ ਹੋਣ ਦਾ ਸ਼ੱਕ ਪ੍ਰਗਟਾਇਆ ਸੀ, ਉਦੋਂ ਤੋਂ 40 ਸੁਰੱਖਿਆ ਏਜੰਸੀਆਂ ਉਸ ਨੂੰ ਫੜਨ ਦੀ ਕੋਸ਼ਿਸ਼ ਕਰ ਰਹੀਆਂ ਸਨ। ਆਈ.ਐਸ. ਨੇ ਜਿਹੜੀ ਵੀਡੀਓ ਜਾਰੀ ਕੀਤੀ ਸੀ ਉਸ 'ਚ ਹਾਸ਼ਿਮ ਸਮੇਤ 7 ਅਤਿਵਾਦੀਆਂ ਨੂੰ ਵਿਖਾਇਆ ਗਿਆ ਹੈ।
Sri Lanka Easter attack
ਸਾਰੇ ਅਤਿਵਾਦੀ ਸਹੁੰ ਚੁੱਕਣ ਸਮੇਂ ਨਿਊਜ਼ੀਲੈਂਡ ਦੀ ਕ੍ਰਾਈਸਟਚਰਚ ਦੀਆਂ ਦੋ ਮਸਜਿਦਾਂ 'ਤੇ ਹੋਏ ਹਮਲਿਆਂ ਦਾ ਬਦਲਾ ਲੈਣ ਦੀ ਗੱਲ ਕਰ ਰਹੇ ਸਨ। ਸਿਰੀਸੇਨਾ ਨੇ ਦੱਸਿਆ ਕਿ ਹਾਸ਼ਿਮ ਨੇ ਇਕ ਹੋਟਲ 'ਤੇ ਹਮਲਾ ਕਰਨ ਦੀ ਅਗਵਾਈ ਕੀਤੀ ਅਤੇ ਉਸ ਦੇ ਨਾਲ ਇਲਹਾਮ ਨਾਂ ਦਾ ਦੂਜਾ ਹਮਲਾਵਰ ਵੀ ਸੀ। ਜ਼ਿਕਰਯੋਗ ਹੈ ਕਿ ਸ੍ਰੀਲੰਕਾ 'ਚ ਇਸਟਰ ਵਾਲੇ ਦਿਨ ਤਿੰਨ ਚਰਚਾਂ ਅਤੇ ਹੋਟਲਾਂ 'ਤੇ ਹਮਲੇ ਵਿਚ 250 ਤੋਂ ਵੱਧ ਲੋਕ ਮਾਰੇ ਗਏ ਸਨ।
