ਸਿੱਧੂ ਮੂਸੇਵਾਲਾ ਇਕ ਵਾਰੀ ਫਿਰ ਤੋਂ ਮੁਸੀਬਤਾਂ ਵਿਚ ਜਾ ਘਿਰਿਆ ਹੈ।
ਸਿੱਧੂ ਮੂਸੇਵਾਲਾ ਇਕ ਵਾਰੀ ਫਿਰ ਤੋਂ ਮੁਸੀਬਤਾਂ ਵਿਚ ਜਾ ਘਿਰਿਆ ਹੈ। ਇਸ ਗਾਇਕ ਨੂੰ ਕਈ ਲੋਕ ਬੜਾ ਵਧੀਆ ਕਲਾਕਾਰ ਮੰਨਦੇ ਹਨ ਅਤੇ ਉਸ ਦੇ ਗੀਤਾਂ ਦੇ ਦੀਵਾਨੇ ਹਨ ਪਰ ਮੇਰੇ ਵਾਂਗ ਅਜਿਹੇ ਵੀ ਕਈ ਹੋਣਗੇ ਜੋ ਇਹ ਗੀਤ ਸੁਣ ਕੇ ਅਪਣੇ ਕੰਨ ਬੰਦ ਕਰ ਲੈਂਦੇ ਹੋਣਗੇ। ਖ਼ੈਰ, ਅੱਜ ਫਿਰ ਇਹ ਕਲਾਕਾਰ ਅਪਣੀ ਗਾਇਕੀ ਵਾਸਤੇ ਨਹੀਂ ਬਲਕਿ ਅਪਣੀ ਭੜਕਾਊ ਗਾਇਕੀ ਵਾਸਤੇ ਵਿਵਾਦਾਂ 'ਚ ਫਸਿਆ ਹੋਇਆ ਹੈ।
Photo
ਇਸ ਦੇ ਨਾਲ ਦੇ ਕੁੱਝ ਹੋਰ ਗਾਇਕ ਸੁਖਦੀਪ ਸਿੰਘ ਸਿੱਧੂ, ਮਨਕੀਰਤ ਔਲਖ, ਅਫ਼ਸਾਨਾ ਖ਼ਾਨ ਵਿਰੁਧ ਵੀ ਪਰਚੇ ਦਰਜ ਹੋਏ ਹਨ। ਸਿੱਧੂ ਮੂਸੇਵਾਲੇ ਦਾ ਗੀਤ 'ਪੱਖੀਆਂ ਪੱਖੀਆਂ ਪੱਖੀਆਂ, ਗੰਨ ਵਿਚ ਪੰਜ ਗੋਲੀਆਂ ਤੇਰੇ ਪੰਜ ਵੀਰਾਂ ਵਾਸਤੇ ਰਖੀਆਂ' ਹੁਣ ਪੰਜਾਬ ਪੁਲਿਸ ਅਤੇ ਸਭਿਆਚਾਰ ਦੇ ਰਖਵਾਲਿਆਂ ਨੂੰ ਚੁੱਭ ਰਿਹਾ ਹੈ।
Photo
ਵੈਸੇ ਤਾਂ ਮਿਰਜ਼ੇ ਨੇ ਵੀ ਸਾਹਿਬਾਂ ਦੇ ਭਰਾਵਾਂ ਵਾਸਤੇ ਤੀਰ ਰੱਖੇ ਸਨ ਪਰ ਸਿੱਧੂ ਦੀ ਸੋਚ ਵਿਚ ਪਿਆਰ ਤਾਂ ਬਿਲਕੁਲ ਵੀ ਨਹੀਂ। ਪਰ ਸਿਰਫ਼ ਗੀਤਕਾਰਾਂ ਨੂੰ ਹੀ ਫਾਹੇ ਕਿਉਂ ਲਾਇਆ ਜਾਂਦਾ ਹੈ? ਕਦੇ ਗੀਤਕਾਰ ਗੁਰਦਾਸ ਮਾਨ ਵਾਂਗ 'ਘਰ ਦੀ ਸ਼ਰਾਬ' ਦੇ ਗੀਤ ਗਾਉਂਦੇ ਹਨ ਅਤੇ ਕਦੇ ਬੰਦੂਕਾਂ ਦੇ ਪਰ ਸ਼ਰਾਬ ਜਾਂ ਬੰਦੂਕਾਂ ਬਣਾਉਂਦੇ ਜਾਂ ਵੇਚਦੇ ਤਾਂ ਨਹੀਂ।
Photo
ਵੇਚਦੀ ਤਾਂ ਸਰਕਾਰ ਹੈ। ਸ਼ਰਾਬ, ਤਮਾਕੂ, ਬੰਦੂਕਾਂ ਅਤੇ ਸਿਗਰਟਾਂ ਤੋਂ ਮੁਨਾਫ਼ਾ ਕਮਾਉਣ ਵਾਲੀ ਪੰਜਾਬ ਸਰਕਾਰ ਹੈ। ਜਿਸ ਨੇ ਵੀ ਬੰਦੂਕ ਖ਼ਰੀਦਣੀ ਹੈ, ਉਸ ਨੇ ਸਰਕਾਰ ਤੋਂ ਲਾਈਸੈਂਸ ਲੈਣਾ ਹੈ। ਤਾਂ ਫਿਰ ਸਰਕਾਰ ਉਤੇ ਪਰਚਾ ਕਿਉਂ ਨਹੀਂ? ਜੇ ਯੋਗੀ ਆਦਿਤਿਆਨਾਥ, ਅਨੁਰਾਗ ਠਾਕੁਰ ਮੰਚ ਉਤੇ ਖੜੇ ਹੋ ਕੇ ਬੰਦੂਕ ਚਲਾਉਣ ਦੀ ਗੱਲ ਕਰ ਸਕਦੇ ਹਨ ਤਾਂ ਫਿਰ ਮੂਸੇਵਾਲਾ ਕਿਸ ਚੀਜ਼ ਦਾ ਨਾਂ ਹੈ?
Photo
ਕਾਨੂੰਨ ਦੇ ਹੱਥ ਸੱਭ ਲਈ ਇਕੋ ਜਿੰਨੇ ਲੰਮੇ ਹੋਣੇ ਚਾਹੀਦੇ ਹਨ ਤੇ ਹਰ ਕਿਸੇ ਉਤੇ ਬਰਾਬਰੀ ਦੀ ਨਜ਼ਰ ਪੈਣੀ ਚਾਹੀਦੀ ਹੈ। ਜੇ ਜਾਂਚ ਕੀਤੀ ਜਾਵੇ ਤਾਂ ਸਾਫ਼ ਹੋ ਜਾਵੇਗਾ ਕਿ ਮੂਸੇਵਾਲੇ ਦੇ ਗਾਣਿਆਂ ਨਾਲ ਪੰਜਾਬ ਸਰਕਾਰ ਦੀ ਆਮਦਨ ਵਧੀ ਹੀ ਹੋਵੇਗੀ ਪਰ ਅਨੁਰਾਗ ਠਾਕੁਰ ਦੇ ਕਹਿਣ ਨਾਲ ਤਾਂ ਦੋ ਵਾਰ ਬੰਦੂਕਾਂ ਚਲੀਆਂ ਹਨ। ਫਿਰ ਜ਼ਿਆਦਾ ਖ਼ਤਰਾ ਕਿਸ ਕੋਲੋਂ ਹੈ? -ਨਿਮਰਤ ਕੌਰ
