ਵਿਕਾਸ ਦਰ 5% ਤੇ ਆ ਗਈ ਜੋ ਹੋਰ ਬੀਮਾਰੀਆਂ ਨੂੰ ਵੀ ਜਨਮ ਦੇਵੇਗੀ
ਨਵੀਂ ਦਿੱਲੀ- ਭਾਰਤੀ ਅਰਥਚਾਰੇ ਦਾ ਸੰਕਟ ਮਹਿਸੂਸ ਤਾਂ ਹੋ ਹੀ ਰਿਹਾ ਸੀ ਪਰ ਹੁਣ ਅਰਥਚਾਰੇ ਦੀ ਵਿਕਾਸ ਦਰ ਦਾ ਆਉਣ ਵਾਲੇ ਸਾਲ ਦਾ ਅੰਦਾਜ਼ਾ 5% 'ਤੇ ਆ ਗਿਆ ਹੈ ਜਿਸ ਨਾਲ ਕਲ ਦਾ ਡਰ, ਅੱਜ ਦੀ ਹਕੀਕਤ ਬਣ ਕੇ ਸਾਹਮਣੇ ਆ ਗਿਆ ਹੈ। ਇਹੀ ਉਹ ਅੰਕੜਾ ਹੈ ਜਿਸ ਬਾਰੇ ਆਰ.ਬੀ.ਆਈ. ਅਤੇ ਇੰਟਰਨੈਸ਼ਨਲ ਮਾਨੇਟਰੀ ਫ਼ੰਡ ਵਲੋਂ ਚੇਤਾਵਨੀ ਦਿਤੀ ਜਾ ਚੁੱਕੀ ਸੀ।
ਪਰ ਵਿੱਤ ਮੰਤਰੀ ਸੀਤਾਰਮਨ ਨੂੰ ਨਾ ਸਿਰਫ਼ ਅਪਣੀ ਕਾਰਗੁਜ਼ਾਰੀ ਉਤੇ ਯਕੀਨ ਸੀ ਬਲਕਿ ਉਨ੍ਹਾਂ ਨੂੰ ਇਸ ਦੇ ਕਾਰਨ ਉਤੇ ਵੀ ਯਕੀਨ ਹੈ। ਨਿਰਮਲਾ ਸੀਤਾਰਮਨ ਮੁਤਾਬਕ ਭਾਰਤੀ ਅਰਥਚਾਰੇ ਦਾ ਸੱਭ ਤੋਂ ਕਾਲਾ ਦੌਰ ਡਾ. ਮਨਮੋਹਨ ਸਿੰਘ ਅਤੇ ਸਾਬਕਾ ਗਵਰਨਰ ਰਘੂਰਾਮ ਰਾਜਨ ਦੇ ਕਾਰਜਕਾਲ ਵਾਲੇ ਦਿਨ ਸਨ। ਪਰ ਹੁਣ ਉਹ ਕੀ ਆਖਣਗੇ ਕਿਉਂਕਿ ਉਨ੍ਹਾਂ ਅਖੌਤੀ 'ਕਾਲੇ ਦਿਨਾਂ' ਵਿਚ ਵੀ ਜੀ.ਡੀ.ਪੀ. ਕਦੇ 5% ਤਕ ਨਹੀਂ ਡਿੱਗੀ ਸੀ।
ਅੱਜ ਜੋ ਔਕੜਾਂ ਦੇਸ਼ ਦੇ ਅਰਥਚਾਰੇ ਨੂੰ ਖਾ ਰਹੀਆਂ ਹਨ, ਵਿੱਤ ਮੰਤਰੀ ਮੁਤਾਬਕ ਇਸ ਦਾ ਕਾਰਨ ਕਾਂਗਰਸ ਰਾਜ ਦੀਆਂ ਨਾਕਾਮੀਆਂ ਹੈ। ਪਰ ਜੇ ਕਾਂਗਰਸ ਦੇ ਪਿਛਲੇ 60 ਵਰ੍ਹਿਆਂ ਦੇ ਕਾਰਜਕਾਲ ਵਿਚ ਏਨੀਆਂ ਕਮਜ਼ੋਰੀਆਂ ਸਨ ਤਾਂ ਫਿਰ ਡਾ. ਮਨਮੋਹਨ ਸਿੰਘ, ਨਰਸਿਮ੍ਹਾ ਰਾਓ, ਪੀ. ਚਿਦੰਬਰਮ ਭਾਰਤ ਦੇ ਅਰਥਚਾਰੇ ਨੂੰ 8.5 ਦੀ ਜੀ.ਡੀ.ਪੀ. ਤਕ ਕਿਸ ਤਰ੍ਹਾਂ ਲੈ ਗਏ? ਕਮਜ਼ੋਰੀਆਂ ਜ਼ਰੂਰ ਸਨ, ਪਰ ਕਾਂਗਰਸੀ ਆਗੂਆਂ ਕੋਲ ਇਕ ਸੁਪਨੇ ਦੇ ਨਾਲ-ਨਾਲ ਇਕ ਯੋਜਨਾ ਵੀ ਸੀ
ਜੋ ਭਾਰਤ ਨੂੰ ਇਕ ਅੰਤਰਰਾਸ਼ਟਰੀ ਪੱਧਰ ਦੀ ਤਾਕਤ ਬਣਾ ਗਈ ਸੀ। ਹਾਂ, ਭਾਰਤੀ ਸਿਸਟਮ ਵਿਚ ਭ੍ਰਿਸ਼ਟਾਚਾਰ ਇਸ ਤਰ੍ਹਾਂ ਰਚਿਆ ਹੋਇਆ ਹੈ ਕਿ ਨੋਟਬੰਦੀ ਤੋਂ ਬਾਅਦ ਭ੍ਰਿਸ਼ਟ ਲੋਕ ਜੋ 1000 ਰੁਪਏ ਦੇ ਨੋਟ ਨਾਲ ਖ਼ੁਸ਼ ਹੋ ਜਾਂਦੇ ਸਨ, ਉਹ ਅੱਜ 2000 ਰੁਪਏ ਦਾ ਨੋਟ ਭਾਲਦੇ ਹਨ। ਅੱਜ ਭਾਜਪਾ ਸਰਕਾਰ ਦਾ ਛੇਵਾਂ ਸਾਲ ਚਲ ਰਿਹਾ ਹੈ ਅਤੇ ਉਹ ਜੇ ਅਜੇ ਵੀ ਕਾਂਗਰਸ ਕਾਰਜਕਾਲ ਉਤੇ ਜ਼ਿੰਮੇਵਾਰੀ ਸੁੱਟਣਗੇ ਤਾਂ ਫਿਰ ਉਨ੍ਹਾਂ ਨੂੰ ਇਹ ਮੰਨਣਾ ਪਵੇਗਾ ਕਿ ਉਨ੍ਹਾਂ ਦੇ 6 ਸਾਲਾਂ ਦਾ ਕਾਰਜਕਾਲ ਬਿਲਕੁਲ ਨਾਕਾਮ ਰਿਹਾ।
ਪਰ ਜੇ ਉਹ ਅੱਜ ਵੀ ਅਪਣੇ ਕੰਮਾਂ ਉਤੇ ਵਿਸ਼ਵਾਸ ਰਖਦੇ ਹਨ ਤਾਂ ਉਨ੍ਹਾਂ ਨੂੰ ਅਪਣੇ ਹੀ ਕਾਰਜਕਾਲ ਵਿਚ ਕਮਜ਼ੋਰੀਆਂ ਲਭਣੀਆਂ ਪੈਣਗੀਆਂ। ਡਾ. ਮਨਮੋਹਨ ਸਿੰਘ ਅਤੇ ਰਘੂਰਾਮ ਰਾਜਨ ਕਬੂਲਦੇ ਸਨ ਕਿ ਭਾਰਤੀ ਬੈਂਕਾਂ ਦੇ ਭਾਰਤੀ ਉਦਯੋਗ ਵਲੋਂ ਨਾ ਚੁਕਾਏ ਜਾਣ ਵਾਲੇ ਕਰਜ਼ੇ ਬੈਂਕਾਂ ਨੂੰ ਕਮਜ਼ੋਰ ਕਰ ਰਹੇ ਸਨ ਅਤੇ ਉਹ ਆਰਥਕਤਾ ਲਈ ਖ਼ਤਰਾ ਬਣੇ ਹੋਏ ਸਨ।
ਪਰ ਅੱਜ ਛੇ ਸਾਲ ਸੱਤਾ ਵਿਚ ਰਹਿਣ ਤੋਂ ਬਾਅਦ ਵਿੱਤ ਮੰਤਰੀ ਨੂੰ ਇਹ ਸਮਝਾਉਣ ਦੀ ਲੋੜ ਪੈ ਰਹੀ ਹੈ ਕਿ ਉਹ ਕਰਜ਼ੇ ਅੱਜ ਘਟਣ ਦੀ ਬਜਾਏ ਵੱਧ ਕਿਉਂ ਗਏ ਹਨ। ਹੋਰ ਨਵੇਂ ਕਰਜ਼ੇ ਵੀ ਇਸ ਸੂਚੀ ਵਿਚ ਸ਼ਾਮਲ ਹੋ ਚੁੱਕੇ ਹਨ ਜਿਨ੍ਹਾਂ ਦੀ ਅਦਾਇਗੀ ਨਹੀਂ ਕੀਤੀ ਗਈ। ਜੋ ਨੁਕਸਾਨ ਨੋਟਬੰਦੀ ਨੇ ਭਾਰਤੀ ਅਰਥਚਾਰੇ ਦਾ ਕੀਤਾ ਹੈ, ਅਸਲ ਵਿਚ ਉਹੀ ਅੱਜ ਦੇ ਸੰਕਟ ਵਾਸਤੇ ਜ਼ਿੰਮੇਵਾਰ ਹੈ।
ਗ਼ਰੀਬ, ਆਮ, ਮੱਧ ਵਰਗ ਦੀ ਜਮ੍ਹਾਂ ਪੂੰਜੀ ਖ਼ਤਮ ਕਰ ਕੇ, ਸੈਂਕੜੇ ਲੋਕਾਂ ਨੂੰ ਮੌਤ ਦੇ ਘਾਟ ਉਤਾਰਨ ਤੋਂ ਬਾਅਦ ਅੱਜ ਹਰ ਕੋਈ ਕਾਲੇ ਧਨ ਦੀ ਗੱਲ ਕਰਨ ਤੋਂ ਵੀ ਡਰਦਾ ਹੈ। ਨੋਟਬੰਦੀ ਕਾਰਨ ਭਾਰਤ ਦਾ ਕਾਲਾ ਧਨ ਪਹਿਲਾਂ ਵਰਗੀ ਹਾਲਤ ਵਿਚ ਹੀ ਵਾਪਸ ਆ ਚੁੱਕਾ ਹੈ ਪਰ ਉਹ ਨਹਾ ਧੋ ਕੇ ਤੇ ਚਿੱਟਾ ਬਣ ਕੇ ਆਇਆ ਹੈ ਤੇ ਨੋਟਬੰਦੀ ਇਸ ਤਬਦੀਲੀ (ਕਾਲੇ ਧਨ ਨੂੰ ਚਿੱਟਾ ਕਰਨ ਦੀ) ਦਾ ਜੋ ਖ਼ਰਚਾ ਦੇਸ਼ ਉਤੇ ਪਾ ਗਈ, ਉਸ ਨੇ ਭਾਰਤ ਵਿਚ ਇਕ ਡਰ ਦਾ ਮਾਹੌਲ ਪੈਦਾ ਕਰਨ ਦਾ ਕੰਮ ਕੀਤਾ ਹੈ।
ਇਸੇ ਲਈ ਅੱਜ ਭਾਰਤ ਵਿਚ ਨਿਵੇਸ਼ ਆਉਣ ਤੋਂ ਕਤਰਾਉਂਦਾ ਹੈ ਅਤੇ ਆਮ ਭਾਰਤੀ ਖ਼ਰਚਾ ਕਰਨ ਤੋਂ ਡਰਦਾ ਹੈ। ਗੱਡੀਆਂ ਦੀ ਵਿਕਰੀ ਹੋਵੇ ਜਾਂ ਘਰ ਵਾਸਤੇ ਕਰਜ਼ਾ, ਸੱਭ ਸੰਕਟ ਵਿਚ ਹਨ। ਪਹਿਲਾਂ ਜਿਹੜਾ ਐਨ.ਪੀ.ਏ. ਦਾ ਸੰਕਟ ਬੈਂਕਾਂ ਨੂੰ ਖਾ ਰਿਹਾ ਸੀ, ਹੁਣ ਕਰੈਡਿਟ ਕਾਰਡ ਦਾ ਸੰਕਟ ਅੱਗੇ ਆਉਣ ਵਾਲਾ ਹੈ ਕਿਉਂਕਿ ਲੋਕ ਅਪਣੇ ਕਰਜ਼ੇ ਦੀਆਂ ਕਿਸਤਾਂ ਨਹੀਂ ਦੇ ਸਕ ਰਹੇ।
ਨਿਰਮਲਾ ਸੀਤਾਰਮਨ ਨੇ ਵੱਡੇ ਉਦਯੋਗਾਂ ਦੀ ਗੱਲ ਸੁਣ ਕੇ ਉਨ੍ਹਾਂ ਦਾ ਕਰਜ਼ਾ ਤਾਂ ਬੈਂਕਾਂ ਰਾਹੀਂ ਮਾਫ਼ ਕਰ ਦਿਤਾ ਪਰ ਬਾਕੀ ਆਮ ਭਾਰਤੀਆਂ ਦੀ ਪੁਕਾਰ ਕਿਸ ਤਰ੍ਹਾਂ ਉਨ੍ਹਾਂ ਕੋਲ ਪਹੁੰਚੇ? ਇੰਟਰਨੈਸ਼ਨਲ ਮਾਨੇਟਰੀ ਫ਼ੰਡ ਨੇ ਆਖਿਆ ਹੈ ਕਿ ਅਗਲਾ ਸਾਲ ਸੁਧਰ ਸਕਦਾ ਹੈ ਜੇ ਸਹੀ ਕਦਮ ਚੁੱਕੇ ਜਾਣ। ਸਹੀ ਕਦਮਾਂ ਵਾਸਤੇ ਅਸਲ ਕਾਰਨ ਦੀ ਪਛਾਣ ਅਤੇ ਸਹੀ ਦਵਾ ਚਾਹੀਦੀ ਹੈ। ਕੀ ਨਿਰਮਲਾ ਸੀਤਾਰਮਨ ਇਹ ਕੁਝ ਕਰਨ ਦੀ ਕਾਬਲੀਅਤ ਰਖਦੇ ਹਨ? -ਨਿਮਰਤ ਕੌਰ