ਬੀਜੇਪੀ ਆਈ ਟੀ ਸੈੱਲ ਦੀ ਜਿਸ ਚੁਸਤੀ ਨੇ ਪੂਰੇ ਦੇਸ਼ ਦੀ ਸਿਆਸਤ ਨੂੰ ਮਾਤ ਦੇ ਦਿਤੀ ਸੀ, ਉਹ ਅੱਜ ਕਿਸਾਨਾਂ ਸਾਹਮਣੇ ਭਿੱਜੀ ਬਿੱਲੀ ਬਣਿਆ ਹੋਇਆ ਹੈ।
ਈ.ਡੀ. ਦੇ ਛਾਪੇ, ਆਈ.ਟੀ. ਸੈੱਲ ਵਲੋਂ ਪ੍ਰਚਾਰ ਦਾ ਹੜ੍ਹ, ਪ੍ਰਧਾਨ ਮੰਤਰੀ ਵਲੋਂ ਮੰਚ ਤੇ ਖੜੇ ਹੋ ਕੇ ਦੇਸ਼ ਨੂੰ ਕਿਸਾਨਾਂ ਦੇ ਹੱਕ ਵਿਚ ਲਿਆਂਦੇ ਕਾਨੂੰਨਾਂ ਦਾ ਵੇਰਵਾ ਦੇਣ, ਗੁਰੂਘਰ ਵਿਚ ਮੱਥਾ ਟੇਕਣ ਤੇ ਬਾਬਾ ਨਾਨਕ ਦੀ ਬਾਣੀ ਦਾ ਇਸਤੇਮਾਲ ਕਰਨ ਤਕ ਹਰ ਰਵਾਇਤੀ ਪੈਂਤੜਾ ਅਪਣਾਇਆ ਜਾ ਰਿਹਾ ਹੈ। ਪਰ ਜਿੰਨਾ ਸਰਕਾਰ ‘‘ਆਈ ਬਲਾ ਨੂੰ ਟਾਲਣ’’ ਯਾਨੀ ਕਿਸਾਨਾਂ ਦੇ ਹੱਕ ਉਨ੍ਹਾਂ ਨੂੰ ਦੇਣ ਤੋਂ ਸੌ ਵੱਲ ਪਾ ਕੇ ਬਚਣ ਦੀ ਕੋਸ਼ਿਸ਼ ਕਰਦੀ ਹੈ
Enforcement Directorate
ਉਨਾ ਹੀ ਕਿਸਾਨ ਮੋਰਚਾ ਹੋਰ ਤਾਕਤਵਰ ਹੋ ਜਾਂਦਾ ਹੈ। ਕਿਸਾਨਾਂ ਨੂੰ ਅਨਪੜ੍ਹ ਆਖਣ ਵਾਲਿਆਂ ਦੇ ਮੂੰਹ ’ਤੇ ਚਪੇੜ ਦਾ ਕੰਮ ਉਸ ਕਿਸਾਨ ਨੇ ਕੀਤਾ ਜਿਸ ਨੇ ਪ੍ਰਧਾਨ ਮੰਤਰੀ ਦੀ ਇਕ ਇਕ ਗੱਲ ਦਾ ਜਵਾਬ ਦਿਤਾ ਤੇ ਤੱਥਾਂ ਨਾਲ ਲੈਸ ਹੋ ਕੇ ਦਿਤਾ। ਭਾਜਪਾ ਦਾ ਆਈ.ਟੀ. ਸੈੱਲ ਮਾਹਰਾਂ ਦਾ ਗੜ੍ਹ ਮੰਨਿਆ ਜਾਂਦਾ ਹੈ ਪਰ ਉਨ੍ਹਾਂ ਨੂੰ ਵੀ ਕਿਸਾਨਾਂ ਨਾਲ ਖੜੇ ਨੌਜਵਾਨਾਂ ਨੇ ਮਾਤ ਦੇ ਦਿਤੀ। ਕਿਸਾਨਾਂ ਦਾ ਆਈ.ਟੀ. ਸੈੱਲ ਪੂਰੀ ਦੁਨੀਆਂ ਤੋਂ ਚਲਾਇਆ ਜਾ ਰਿਹਾ ਹੈ ਜਿਥੇ ਹਰ ਕਿਸਾਨ ਦੀ ਗੱਲ ਨਾਲ ਸਹਿਮਤ ਹੋਣ ਵਾਲਾ ਇਨਸਾਨ ਅਪਣੇ ਆਪ ਹੀ ਉਸ ਨਾਲ ਜੁੜਦਾ ਜਾ ਰਿਹਾ ਹੈ।
BJP
ਬੀਜੇਪੀ ਆਈ ਟੀ ਸੈੱਲ ਦੀ ਜਿਸ ਚੁਸਤੀ ਨੇ ਪੂਰੇ ਦੇਸ਼ ਦੀ ਸਿਆਸਤ ਨੂੰ ਮਾਤ ਦੇ ਦਿਤੀ ਸੀ, ਉਹ ਅੱਜ ਕਿਸਾਨਾਂ ਸਾਹਮਣੇ ਭਿੱਜੀ ਬਿੱਲੀ ਬਣਿਆ ਹੋਇਆ ਹੈ। ਅਸਲ ਵਿਚ ਇਸ ਅੰਦੋਲਨ ਦੇ ਦੋਵੇਂ ਪੱਖ ਆਮ ਸਮਝ ਤੋਂ ਬਾਹਰ ਹਨ। ਇਕ ਪਾਸੇ ਭੋਲੇ ਭਾਲੇ ਕਿਸਾਨ ਤੇ ਦੂਜੇ ਪਾਸੇ ਸਰਬ ਸ਼ਕਤੀਮਾਨ, ਭਾਜਪਾ ਸਰਕਾਰ। ਭਾਜਪਾ ਸਾਹਮਣੇ 2014 ਤੋਂ ਬਾਅਦ ਕੋਈ ਟਿਕ ਹੀ ਨਹੀਂ ਸਕਿਆ। ਤਾਜ਼ਾ ਕਮਾਲ ਅਸੀ ਵੈਸਟ ਬੰਗਾਲ ਵਿਚ ਵੇਖ ਰਹੇ ਹਾਂ। ਜਿਸ ਨੂੰ ਬੰਗਾਲ ਦੀ ਸ਼ੇਰਨੀ ਆਖਿਆ ਜਾਂਦਾ ਸੀ, ਅੱਜ ਉਸ ਦੇ ਸਾਥੀ ਉਸ ਨੂੰ ਛੱਡ ਕੇ ਭਾਜਪਾ ਵਿਚ ਸ਼ਾਮਲ ਹੋ ਰਹੇ ਹਨ।
Delhi jantar mantar
ਕਾਂਗਰਸ ਦੇ ਕੁੱਝ ਐਮ.ਪੀਜ਼. ਅਤੇ ਐਮ.ਐਲ.ਏਜ਼. ਵਲੋਂ ਜੰਤਰ ਮੰਤਰ ਤੇ ਧਰਨਾ ਲਾਇਆ ਗਿਆ ਹੈ ਤੇ ਉਨ੍ਹਾਂ ਨਾਲ ਕਾਂਗਰਸ ਦੇ ਅਪਣੇ ਐਮ.ਪੀ. ਜਾਂ ਐਮ.ਐਲ.ਏ. ਵੀ ਆ ਕੇ ਨਾਲ ਨਹੀਂ ਬੈਠੇ ਪਰ ਕਿਸਾਨ ਕਿਸੇ ਨੂੰ ਬੁਲਾਂਦੇ ਵੀ ਨਹੀਂ, ਲੋਕ ਆਪ ਹੀ ਨਾਲ ਆ ਬੈਠਦੇ ਹਨ। ਪੰਜਾਬ ਭਾਜਪਾ ਦੇ ਕਾਰਜਕਰਤਾ ਤੇ ਐਨ.ਡੀ.ਏ. ਦੇ ਸਾਥੀਆਂ ਨੇ ਵੀ ਕਿਸਾਨਾਂ ਖ਼ਾਤਰ ਭਾਜਪਾ ਛਡਣੀ ਸ਼ੁਰੂ ਕਰ ਦਿਤੀ ਹੈ।
Rahul Gandhi
ਸਰਕਾਰ ਕੋਲ ਇਕ ਸ਼ਸਤਰ ਹੈ ਜਿਸ ਨੂੰ ਉਹ ਸੋਸ਼ਲ ਮੀਡੀਆ ਤੇ ਇਸਤੇਮਾਲ ਕਰਦੀ ਹੈ। ਦੇਖਣ ਨੂੰ ਸੋਹਣਾ ਪਰ ਅੰਦਰੋਂ ਕਾਲਾ ਸਿਆਹ! ਇਸ ਸ਼ੇ੍ਰਣੀ ਵਿਚ ਕੰਗਨਾ ਰਣੌਤ, ਪਾਇਲ ਰੋਹਤਾਗੀ ਵਰਗੇ ਲੋਕ ਆਉਂਦੇ ਹਨ ਜਿਨ੍ਹਾਂ ਨੇ ਰਾਹੁਲ ਗਾਂਧੀ ਨੂੰ ਪੱਪੂ, ਸੁਸ਼ਾਂਤ ਰਾਜਪੂਤ ਨੂੰ ਆਤਮ ਹਤਿਆ ਲਈ ਮਜਬੂਰ, ਰੀਆ ਚੱਕਰਵਰਤੀ ਨੂੰ ਖਲਨਾਇਕ ਆਦਿ ਬਣਾਉਣ ਵਿਚ ਮੁਹਾਰਤ ਹਾਸਲ ਕੀਤੀ। ਪਰ ਉਹ ਵੀ ਕਿਸਾਨਾਂ ਸਾਹਮਣੇ ਹਾਰ ਗਏ ਹਨ। ਜਿਸ ਤਰ੍ਹਾਂ ਕੰਗਨਾ ਰਣੌਤ ਨੂੰ ਹਸਦੇ ਹਸਦੇ ਦਲਜੀਤ ਦੁਸਾਂਝ ਨੇ ਜਵਾਬ ਦਿਤਾ, ਉਸ ਲਈ ਦਲਜੀਤ ਦੁਸਾਂਝ ਨੂੰ ਪਦਮਸ੍ਰੀ ਮਿਲਣਾ ਚਾਹੀਦੈ।
PM MODI
ਪ੍ਰਧਾਨ ਮੰਤਰੀ ਐਤਵਾਰ ਨੂੰ ਮੱਥਾ ਟੇਕਣ ਗੁਰਦਵਾਰੇ ਚਲੇ ਗਏ। ਉਨ੍ਹਾਂ ਦੀ ਇਹ ਇਕ ਵੱਡੀ ਚਾਲ ਸੀ, ਭਾਵੁਕ ਕਰਨ ਵਾਲੀ। ਪਰ ਉਸ ਦਾ ਜਵਾਬ ਤਾਂ ਗੁਰੂ ਗ੍ਰੰਥ ਸਾਹਿਬ ਵਿਚੋਂ ਆਪ ਹੀ ਮਿਲ ਗਿਆ। ਗ੍ਰੰਥੀ ਵਲੋਂ ਕੀਤੀ ਜਾ ਰਹੀ ਵਿਆਖਿਆ ਹੀ ਜਵਾਬ ਸੀ ਜੋ ਸ਼ਾਇਦ ਸਰਕਾਰ ਅਜੇ ਵੀ ਸਮਝ ਨਹੀਂ ਸਕੀ। ਉਹ ਇਸ ਅੰਦੋਲਨ ਨੂੰ ਇਕ ਆਮ ਸਿਆਸੀ ਅੰਦੋਲਨ ਸਮਝਣ ਦੀ ਗ਼ਲਤੀ ਕਰ ਰਹੀ ਹੈ। ਜਿਹੜੇ ਕਹਿੰਦੇ ਹਨ ਕਿ ਇਹ ਕਾਂਗਰਸ ਦੀ ਚਲਾਈ ਹੋਈ ਮੁਹਿੰਮ ਹੈ, ਉਹ ਅਪਣੇ ਆਪ ਨੂੰ ਵੀ ਤੇ ਕਾਂਗਰਸ ਨੂੰ ਵੀ ਭੁਲੇਖੇ ਦਾ ਸ਼ਿਕਾਰ ਬਣਾ ਰਹੇ ਹਨ। ਬੀਬੀ ਜਗੀਰ ਕੌਰ ਵਰਗੇ ਆਪ ਹੀ ਅਪਣੇ ਆਪ ਨੂੰ ਵੀ ਗੁਮਰਾਹ ਕਰ ਰਹੇ ਹਨ।
Farmer
ਕਿਸਾਨ ਅੰਦੋਲਨ ਹਰ ਤਰ੍ਹਾਂ ਦੀ ਸਿਆਸਤ ਤੋਂ ਪਰੇ ਹੈ, ਇਸੇ ਕਰ ਕੇ ਉਹ ਵਾਧੇ ਵਲ ਜਾ ਰਿਹਾ ਹੈ ਅਤੇ ਇਸੇ ਕਰ ਕੇ ਉਸ ਨੂੰ ਡੱਕਾ ਲਾਉਣ ਦੀਆਂ ਸਾਰੀਆਂ ਕੋਸ਼ਿਸ਼ਾਂ ਮੂੰਹ ਦੇ ਭਾਰ ਡਿਗੀਆਂ ਹਨ। ਇਸ ਅੰਦੋਲਨ ਨੂੰ ਸਮਝਣ ਵਾਸਤੇ ਸਰਕਾਰ ਨੂੰ ਉਨ੍ਹਾਂ ਤਰਕੀਬਾਂ ਨੂੰ ਭੁਲਾ ਦੇਣਾ ਪਵੇਗਾ ਜਿਨ੍ਹਾਂ ਦੇ ਸਹਾਰੇ ਉਹ ਤਾਕਤ ਵਿਚ ਆਈ ਸੀ। ਸਰਕਾਰ ਨੂੰ ਇਸ ਅੰਦੋਲਨ ਵਿਚ ਹੁਣ ਤਕ ਮਾਰੇ ਗਏ 32 ਕਿਸਾਨਾਂ ਦਾ ਇਤਿਹਾਸ ਸਮਝ ਲੈਣਾ ਚਾਹੀਦਾ ਹੈ।
FARMER PROTEST and PM Modi
ਉਹ ਆਮ ਕਿਸਾਨ ਸਨ ਜਿਨ੍ਹਾਂ ਜਿੱਤ ਦੇ ਬਾਅਦ ਕੋਈ ਕੁਰਸੀ ਨਹੀਂ ਸੀ ਮੰਗਣੀ, ਨਾ ਅਪਣੀ ਮਿਹਨਤ ਦੀ ਵਸੂਲੀ ਕਰਨੀ ਸੀ। ਉਨ੍ਹਾਂ ਨੂੰ ਅਪਣੇ ਆਉਣ ਵਾਲੇ ਕਲ ਨੂੰ ਸੁਰੱਖਿਅਤ ਕਰਨ ਦੀ ਚਿੰਤਾ ਹੈ ਬਸ ਤੇ ਇਸ ਤੋਂ ਅੱਗੇ ਉਨ੍ਹਾਂ ਦਾ ਕੋਈ ਮਨਸੂਬਾ ਨਹੀਂ। ਐਤਵਾਰ ਨੂੰ ਇਕ ਕਿਸਾਨ ਦੀ ਮੌਤ ਹੋਈ। ਉਹ ਕਿਸਾਨ ਗ਼ਰੀਬ ਕਿਸਾਨ ਸੀ ਜਿਸ ਦੇ ਘਰ ਵਿਚ ਉਸ ਦੇ ਅੰਤਮ ਸਸਕਾਰ ਜੋਗੇ ਪੈਸੇ ਵੀ ਨਹੀਂ ਸਨ।
Farmers Protest
ਕਿਸਾਨ ਦੇ ਪ੍ਰਵਾਰ ਨੇ 60 ਹਜ਼ਾਰ ਰੁਪਏ ਦਾ ਕਰਜ਼ਾ ਚੁਕਿਆ ਤੇ ਸਾਰੇ ਕਾਰਜ ਪੂਰੇ ਕੀਤੇ। ਉਸ ਨੇ ਸੋਸ਼ਲ ਮੀਡੀਆ ਤੇ ਦਸਿਆ ਕਿ ਉਸ ਨੇ ਨਾ ਸਰਕਾਰ ਅੱਗੇ ਦੁਹਾਈ ਪਾਈ ਤੇ ਨਾ ਹੀ ਕਿਸਾਨ ਜਥੇਬੰਦੀਆਂ ਅੱਗੇ ਹੱਥ ਅੱਡੇ। ਉਹ ਅਪਣੀ ਹੋਂਦ ਦੇ ਬਚਾਅ ਵਾਸਤੇ ਅੰਦੋਲਨ ਵਿਚ ਯੋਗਦਾਨ ਪਾਉਣ ਗਿਆ ਸੀ ਤੇ ਚੁੱਪ ਚਾਪ ਅਪਣੇ ਗ਼ਮ ਨੂੰ ਸਹਾਰ ਗਿਆ।
ਅਜਿਹੇ ਕਿਸਾਨ ਨਾਲ ਸਰਕਾਰ ਕਿਸ ਤਰ੍ਹਾਂ ਲੜ ਕੇ ਜਿੱਤ ਸਕੇਗੀ? ਈ.ਡੀ. ਦੇ ਛਾਪਿਆਂ, ਕੰਗਨਾ ਦੀ ਬਦ-ਕਲਾਮੀ, ਪ੍ਰਧਾਨ ਮੰਤਰੀ ਦੇ ਭਾਵੁਕ ਭਾਸ਼ਣਾਂ ਨਾਲ ਕਿਸਾਨਾਂ ਨੂੰ ਫ਼ਰਕ ਨਹੀਂ ਪੈਣ ਵਾਲਾ। ਸਰਕਾਰ ਨੂੰ ਰਣਨੀਤੀਆਂ ਬਣਾਉਣ ਦੀ ਆਦਤ ਹੈ ਪਰ ਕੀ ਇਨ੍ਹਾਂ ਕੋਲ ਕੋਈ ਕਿਸਾਨਾਂ ਨੂੰ ਸਮਝ ਸਕਣ ਦੇ ਕਾਬਲ ਵੀ ਹੈ ਜਾਂ ਨਹੀਂ? - ਨਿਮਰਤ ਕੌਰ
