ਬਾਲੀਵੁਡ ਅਦਾਕਾਰਾ ਨੇਹਾ ਧੂਪੀਆ ਵਿਆਹ ਦੇ ਬੰਧਨ 'ਚ ਬੱਝੀ 

Neha Dhupia gets married to Angad Bedi

ਨਵੀਂ ਦਿੱਲੀ : ਬਾਲੀਵੁਡ ਅਦਾਕਾਰਾ ਸੋਨਮ ਕਪੂਰ ਤੋਂ ਬਾਅਦ ਹੁਣ ਨੇਹਾ ਧੂਪੀਆ ਵੀ ਵਿਆਹ ਦੇ ਬੰਧਨ 'ਚ ਬਝ ਗਈ ਹੈ। ਅਦਾਕਾਰਾ ਨੇ  ਅਚਾਨਕ ਵਿਆਹ ਦੀ ਖ਼ਬਰ ਦੇ ਕੇ ਸੱਭ ਨੂੰ ਹੈਰਾਨ ਕਰ ਦਿਤਾ। 37 ਸਾਲ ਦੀ ਅਦਾਕਾਰਾ ਨੇਹਾ ਧੂਪਿਆ ਨੇ ਅਪਣੀ ਉਮਰ ਤੋਂ ਦੋ ਸਾਲ ਛੋਟੇ ਅਦਾਕਾਰ ਅੰਗਦ ਬੇਦੀ ਨਾਲ ਪੰਜਾਬੀ ਰੀਤ - ਰਿਵਾਜ਼ ਮੁਤਾਬਕ ਅੱਜ ਵਿਆਹ ਕੀਤਾ ਹੈ।

ਆਨੰਦ ਕਾਰਜ ਦੀਆਂ ਰਸਮਾਂ ਦਿੱਲੀ ਵਿਚ ਹੋਈਆਂ। ਨੇਹਾ ਧੂਪੀਆ ਫ਼ਿਲਮਾਂ ਅਤੇ ਟੀਵੀ ਦਾ ਮਸ਼ਹੂਰ ਚਿਹਰਾ ਹੈ, ਅਚਾਨਕ ਆਈ ਉਨ੍ਹਾਂ ਦੀ ਵਿਆਹ ਦੀ ਖ਼ਬਰ ਨਾਲ ਬੇਸ਼ੱਕ ਫੈਨ ਵੀ ਹੈਰਾਨ ਰਹਿ ਗਏ ਹੋਣਗੇ। ਸੋਸ਼ਲ ਮੀਡੀਆ 'ਤੇ ਖੁਸ਼ਖਬਰੀ ਦਿੰਦੇ ਹੋਏ ਨੇਹਾ ਨੇ ਕਿਹਾ ਕਿ ਉਨ੍ਹਾਂ ਨੇ ਅਪਣੇ ਨਜ਼ਦੀਕੀ ਮਿੱਤਰ ਨਾਲ ਵਿਆਹ ਕਰ ਲਿਆ ਹੈ ਅਤੇ ਇਹ ਉਨ੍ਹਾਂ ਦੀ ਜ਼ਿੰਦਗੀ ਦਾ ਸੱਭ ਤੋਂ ਵਧੀਆ ਫ਼ੈਸਲਾ ਹੈ।

ਉਥੇ ਹੀ ਅੰਗਦ ਨੇ ਵੀ ਨੇਹਾ ਨਾਲ ਵਿਆਹ ਦੀ ਤਸਵੀਰ ਜਾਰੀ ਕਰ ਉਨ੍ਹਾਂ ਨੂੰ ਅਪਣੀ ਪਤਨੀ ਦਸਿਆ ਹੈ। ਨੇਹਾ ਨੇ ਹਲਕੇ ਗੁਲਾਬੀ ਰੰਗ ਦਾ ਲਹਿੰਗਾ ਪਾਇਆ ਹੋਇਆ ਸੀ ਜਿਸ 'ਚ ਉਹ ਬਹੁਤ ਖ਼ੂਬਸੂਰਤ ਲਗ ਰਹੀ ਸੀ। ਉਥੇ ਹੀ ਅੰਗਦ ਬੇਦੀ ਨੇ ਚਿੱਟੇ ਰੰਗ ਦੀ ਸ਼ੇਰਵਾਨੀ ਪਾਈ ਹੋਈ ਸੀ।