ਅਮਿਤਾਭ ਬੱਚਨ ਦਾ ਸਾਰਾ ਪ੍ਰਵਾਰ ਹੀ ਕੋਰੋਨਾ ਵਾਇਰਸ ਤੋਂ ਪੀੜਤ
ਐਸ਼ਵਰਿਆ ਤੇ ਬੇਟੀ ਅਰਾਧਨਾ ਵੀ ਕੋਰੋਨਾ ਪਾਜ਼ੇਟਿਵ
ਮੁੰਬਈ, 12 ਜੁਲਾਈ : ਅਦਾਕਾਰਾ ਐਸ਼ਵਰਿਆ ਰਾਏ ਬੱਚਨ ਅਤੇ ਉਸ ਦੀ ਬੇਟੀ ਆਰਾਧਿਆ ਦੇ ਵੀ ਕੋਰੋਨਾ ਵਾਇਰਸ ਤੋਂ ਪੀੜਤ ਹੋਣ ਦੀ ਪੁਸ਼ਟੀ ਹੋਈ ਹੈ। ਮਹਾਰਾਸ਼ਟਰ ਦੇ ਸਿਹਤ ਮੰਤਰੀ ਰਾਜੇਸ਼ ਟੋਪੇ ਨੇ ਇਸ ਗੱਲ ਦੀ ਜਾਣਕਾਰੀ ਦਿਤੀ। ਮੰਤਰੀ ਨੇ ਕਿਹਾ ਕਿ ਐਸ਼ਵਰਿਆ ਦੀ ਸੱਸ ਜਯਾ ਬੱਚਨ ਦੀ ਰੀਪੋਰਟ ਨੈਗੇਟਿਵ ਆਈ ਹੈ।
ਇਸ ਤੋਂ ਪਹਿਲਾਂ, ਮੁੰਬਈ ਦੀ ਮੇਅਰ ਕਿਸ਼ੋਰੀ ਪੇਡਨੇਕਰ ਨੇ ਕਿਹਾ ਸੀ ਕਿ ਜਯਾ ਅਤੇ ਐਸ਼ਵਰਿਆ ਦੀ ਜਾਂਚ ਰੀਪੋਰਟ ਨੈਗੇਟਿਵ ਆਈ ਹੈ। ਬਾਲੀਵੁਡ ਅਦਾਕਾਰ ਅਮਿਤਾਭ ਬੱਚਨ ਅਤੇ ਉਸ ਦੇ ਬੇਟੇ ਅਭਿਸ਼ੇਕ ਬੱਚਨ ਦੀ ਕੋਵਿਡ ਜਾਂਚ ਰੀਪੋਰਟ ਪਾਜ਼ੇਟਿਵ ਆਉਣ ਦੇ ਇਕ ਦਿਨ ਬਾਅਦ ਮੇਅਰ ਦਾ ਇਹ ਬਿਆਨ ਆਇਆ। ਅਮਿਤਾਭ ਅਤੇ ਅਭਿਸ਼ੇਕ ਇਸ ਵੇਲੇ ਹਸਪਤਾਲ ਵਿਚ ਦਾਖ਼ਲ ਹਨ।
ਮੇਅਰ ਨੇ ਕਿਹਾ ਸੀ ਕਿ ਬੱਚਨ ਦਾ ਘਰ ਹੁਣ ਪਾਬੰਦੀਸ਼ੁਦਾ ਖੇਤਰ ਹੈ ਅਤੇ ਉਸ ਵਿਚ ਰਹਿਣ ਵਾਲੇ ਸਾਰੇ ਲੋਕਾਂ ਨੂੰ 14 ਦਿਨਾਂ ਲਈ ਇਕਾਂਤਵਾਸ ਕਰ ਦਿਤਾ ਗਿਆ ਹੈ। ਪੇਡਨੇਕਰ ਨੇ ਕਿਹਾ ਕਿ ਆਰਾਧਿਆ ਸਣੇ ਬੱਚਨ ਪਰਵਾਰ ਦੇ ਜੀਆਂ ਦੀ ਰੈਪਿਡ ਐਂਟੀਜਨ ਜਾਂਚ ਕੀਤੀ ਗਈ। 77 ਸਾਲਾ ਅਮਿਤਾਭ ਨੇ ਕਲ ਟਵਿਟਰ ’ਤੇ ਦਸਿਆ ਸੀ, ‘ਜਾਂਚ ਵਿਚ ਮੈਨੂੰ ਕੋਰੋਨਾ ਵਾਇਰਸ ਦੀ ਪੁਸ਼ਟੀ ਹੋਈ ਹੈ। ਹਸਪਤਾਲ ਵਿਚ ਦਾਖ਼ਲ ਹੋ ਗਿਆ ਹਾਂ। ਘਰ ਵਾਲਿਆਂ ਅਤੇ ਸਟਾਫ਼ ਦੀ ਵੀ ਜਾਂਚ ਕੀਤੀ ਗਈ ਹੈ।’ (ਏਜੰਸੀ)
ਸੁਰੱਖਿਆ ਗਾਰਡ ਕੋਰੋਨਾ ਪਾਜ਼ੇਟਿਵ ਮਿਲਣ ਮਗਰੋਂ ਅਦਾਕਾਰਾ ਰੇਖਾ ਦਾ ਬੰਗਲਾ ਸੀਲ
ਮੁੰਬਈ, 12 ਜੁਲਾਈ : ਮੁੰਬਈ ਮਿਊਂਸਪਲ ਕਾਰਪੋਰੇਸ਼ਨ ਨੇ ਉਪਨਗਰ ਬਾਂਦਰਾ ਵਿਚ ਮਸ਼ਹੂਰ ਅਦਾਕਾਰਾ ਰੇਖਾ ਦੇ ਬੰਗਲੇ ਵਿਚ ਤੈਨਾਤ ਸੁਰੱਖਿਆ ਮੁਲਾਜ਼ਮ ਦੇ ਕੋਰੋਨਾ ਵਾਇਰਸ ਦੀ ਲਪੇਟ ਵਿਚ ਆਉਣ ਮਗਰੋਂ ਬੰਗਲਾ ਸੀਲ ਕਰ ਦਿਤਾ ਹੈ। ਅਧਿਕਾਰੀਆਂ ਨੇ ਦਸਿਆ ਕਿ 65 ਸਾਲਾ ਅਦਾਕਾਰਾ ਦੇ ਬੰਗਲੇ ‘ਸੀ ਸਪਰਿੰਗਜ਼’ ਵਿਚ ਮੰਗਲਵਾਰ ਨੂੰ ਗਾਰਡ ਪਾਜ਼ੇਟਿਵ ਮਿਲਿਆ ਸੀ। ਬੰਗਲੇ ਦੇ ਬਾਹਰ ਬੋਰਡ ਲਾ ਕੇ ਇਸ ਨੂੰ ਪਾਬੰਦੀਸ਼ੁਦਾ ਖੇਤਰ ਐਲਾਨ ਦਿਤਾ ਗਿਆ ਹੈ। (ਏਜੰਸੀ)