ਸੁਪਰ ਸਟਾਰ ਰਜਨੀਕਾਂਤ ਦੀ ਅਗਲੇ ਸਾਲ ਸਿਆਸਤ ਵਿਚ ਹੋ ਸਕਦੀ ਐ ਧਮਾਕੇਦਾਰ ਐਂਟਰੀ
ਦੱਖਣੀ ਭਾਰਤੀ ਫਿਲਮਾਂ ਦੇ ਸੁਪਰ ਸਟਾਰ ਰਜਨੀਕਾਂਤ ਅਗਲੇ ਸਾਲ ਸਿਆਸਤ ਦੇ ਮੈਦਾਨ ਵਿਚ ਉਤਰ ਸਕਦੇ ਹਨ।
ਨਵੀਂ ਦਿੱਲੀ: ਦੱਖਣੀ ਭਾਰਤੀ ਫਿਲਮਾਂ ਦੇ ਸੁਪਰ ਸਟਾਰ ਰਜਨੀਕਾਂਤ ਅਗਲੇ ਸਾਲ ਸਿਆਸਤ ਦੇ ਮੈਦਾਨ ਵਿਚ ਉਤਰ ਸਕਦੇ ਹਨ। ਕਿਹਾ ਜਾ ਰਿਹਾ ਹੈ ਕਿ ਤਮਿਲਨਾਡੂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਯਾਨੀ ਅਗਲੇ ਸਾਲ ਦੇ ਅੱਧ ਵਿਚਕਾਰ ਉਹ ਸਿਆਸਤ ਵਿਚ ਨਵੀਂ ਪਾਰੀ ਦੀ ਸ਼ੁਰੂਆਤ ਕਰ ਸਕਦੇ ਹਨ। ਤਮਿਲਨਾਡੂ ਵਿਚ 2021 ‘ਚ ਵਿਧਾਨ ਸਭਾ ਚੋਣਾਂ ਹੋਣ ਜਾ ਰਹੀਆਂ ਹਨ।
ਇਕ ਅੰਗਰੇਜ਼ੀ ਅਖ਼ਬਾਰ ਮੁਤਾਬਕ ਉਹਨਾਂ ਦੀ ਪਾਰਟੀ ਦਾ ਨਾਂਅ ਰਜਨੀਕਾਂਤ ਦੇ ਫੈਨ ਕਲੱਬ ਰਜਨੀ ਮੱਕਲ ਮੰਦਰਮ ਦੇ ਨਾਂਅ ‘ਤੇ ਰੱਖਿਆ ਜਾ ਸਕਦਾ ਹੈ। ਅਖ਼ਬਾਰ ਨੇ ਸੂਤਰਾਂ ਦੇ ਹਵਾਲੇ ਤੋਂ ਦੱਸਿਆ ਹੈ ਕਿ ਅਗਲੇ ਸਾਲ ਅਗਸਤ-ਸਤੰਬਰ ਤੱਕ ਨਵੀਂ ਪਾਰਟੀ ਬਣ ਸਕਦੀ ਹੈ। ਰਜਨੀਕਾਂਤ ਦੀ ਸਿਆਸਤ ਵਿਚ ਉਸ ਸਮੇਂ ਐਂਟਰੀ ਹੋਈ ਰਹੀ ਹੈ ਜਦੋਂ ਤਮਿਲਨਾਡੂ ਦੇ ਦੋ ਦਿੱਗਜ਼ ਡੀਐਮਕੇ ਦੇ ਮੁਖੀ ਐਮਐਮ ਕਰੂਣਾਨਿਧੀ ਅਤੇ ਏਆਈਏਡੀਐਮ ਕੇ ਦੀ ਸਕੱਤਰ ਜੈਲਲਿਤਾ ਦੇ ਦੇਹਾਂਤ ਤੋਂ ਬਾਅਦ ਸੰਨਾਟਾ ਛਾਇਆ ਹੋਇਆ ਹੈ।
ਲੇਖਕ ਤਮਿਲੋਰੂਵੀ ਮਨਿਯਾਨ ਨੇ ਕਿਹਾ,’ਇਸ ਵਿਚ ਕੋਈ ਸ਼ੱਕ ਨਹੀਂ ਹੈ ਕਿ ਰਜਨੀਕਾਂਤ ਅਗਲੇ ਸਾਲ ਅਪਣੀ ਸਿਆਸੀ ਪਾਰਟੀ ਦਾ ਐਲ਼ਾਨ ਕਰਨਗੇ। ਉਹ ਕਿਸੇ ਸਿਆਸੀ ਗਠਜੋੜ ਦੀ ਅਗਵਾਈ ਕਰ ਸਕਦੇ ਹਨ’। ਪਿਛਲੇ ਦਿਨੀਂ ਰਜਨੀਕਾਂਤ ਨੇ ਕਿਹਾ ਸੀ ਕਿ ਭਾਜਪਾ ਨੇ ਉਹਨਾਂ ਨੂੰ ਪਾਰਟੀ ਵਿਚ ਸ਼ਾਮਲ ਹੋਣ ਦਾ ਸੱਦਾ ਨਹੀਂ ਦਿੱਤਾ ਸੀ, ਬਲਕਿ ਤਮਿਲ ਸੰਤ ਅਤੇ ਕਵੀ ਤਿਰੂਵਲੁਵਰ ਵੱਲੋਂ ਉਹਨਾਂ ਨੂੰ ਭਗਵੇਂ ਰੰਗ ਵਿਚ ਰੰਗਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ।
ਦੱਸ ਦਈਏ ਕਿ ਪਿਛਲੇ ਦਿਨੀਂ ਤਿਰੂਵਲੁਵਰ ਦੀ ਭਗਵੇਂ ਕੱਪੜਿਆਂ ਵਿਚ ਜਾਰੀ ਕੀਤੀ ਗਈ ਤਸਵੀਰ ਕਾਰਨ ਤਮਿਲਨਾਡੂ ਵਿਚ ਭਾਜਪਾ ਅਤੇ ਡੀਐਮਕੇ ਵਿਚ ਸਿਆਸੀ ਘਸਮਾਣ ਛਿੜ ਗਿਆ ਸੀ। ਰਜਨੀਕਾਂਤ ਨੇ ਕਿਹਾ ਕਿ ‘ਮੈਨੂੰ ਭਾਜਪਾ ਸਮਰਥਕ ਦੇ ਤੌਰ ‘ਤੇ ਪੇਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਇਸ ਵਿਚ ਕੋਈ ਸੱਚਾਈ ਨਹੀਂ ਹੈ। ਇਹੀ ਨਹੀਂ ਮੀਡੀਆ ਨੇ ਵੀ ਮੈਨੂੰ ਭਾਜਪਾ ਸਮਰਥਕ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਮੈਂ ਭਾਜਪਾ ਦਾ ਆਦਮੀ ਨਹੀਂ ਹਾਂ’।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।